Lulu Mall: కూటమి ప్రభుత్వం కీలక నిర్ణయం.. రెండు మెగా మాల్స్‌కు గ్రీన్ సిగ్నల్

ఆంధ్రప్రదేశ్ కూటమి ప్రభుత్వం అన్ని ప్రాంతాల అభివృద్ధిపై దృష్టి పెట్టింది. అమరావతి (Amaravati), విశాఖపట్నం (Visakhapatnam) వంటి ప్రాంతాల్లో అభివృద్ధి పనులకు పునాదులు వేస్తోంది. ఈ దిశగా తాజాగా తీసుకున్న నిర్ణయాల్లో భాగంగా, లులు గ్రూప్‌ (Lulu Group) సంస్థతో భాగస్వామ్యం కుదిరింది. రాష్ట్రంలోని రెండు ముఖ్యమైన నగరాల్లో మెగా షాపింగ్ మాల్స్ ఏర్పాటుకు ప్రభుత్వం గ్రీన్ సిగ్నల్ ఇచ్చింది.

విశాఖ బీచ్‌ రోడ్ (Beach Road) సమీపంలో ఉన్న హార్బర్ పార్క్ (Harbour Park) ప్రాంతంలో లులు ఇంటర్నేషనల్ షాపింగ్ మాల్స్ ప్రైవేట్ లిమిటెడ్‌ (Lulu mall) కు 99 సంవత్సరాల లీజు ప్రాతిపదికన 13.74 ఎకరాల భూమిని కేటాయించింది. ఈ స్థలంలో సుమారు 13.5 లక్షల చదరపు అడుగుల విస్తీర్ణంలో అంతర్జాతీయ స్థాయిలో మాల్‌ను నిర్మించనున్నట్లు తెలుస్తోంది. ఇది నగర అభివృద్ధిలో ఓ మైలురాయి అవుతుందనడం ఎంతమాత్రం అతిశయోక్తి కాదు.

ఈ ప్రాజెక్టును ప్రోత్సహించేందుకు రాష్ట్ర ప్రభుత్వం మూడేళ్ల పాటు లీజు చెల్లింపును మాఫీ చేయాలని నిర్ణయం తీసుకుంది. దీనితో పాటు, పర్యాటక భూముల కేటాయింపు విధానం – 2024 నుండి 2029 మధ్య వర్తించే విధానం ప్రకారం, భూమి ధరను నిర్ణయించనుంది. కోర్టు కేసుల పరిష్కారం కోసం ఏపీఐఐసీ (APIIC) మరియు రెవెన్యూ శాఖ సంయుక్తంగా చర్యలు తీసుకోవాలని ప్రభుత్వం ఇప్పటికే ఆదేశాలు జారీ చేసింది.

ఇక విజయవాడ (Vijayawada) నగరంలో కూడా లులు మాల్ ఏర్పాటుకు గ్రీన్ సిగ్నల్ ఇచ్చారు. ఈ ప్రాజెక్ట్ కోసం 4.15 ఎకరాల భూమిని లీజు పద్ధతిలో ఇవ్వనున్నట్లు సమాచారం. ఇక్కడ సుమారు 2.23 లక్షల చదరపు అడుగుల మాల్ నిర్మించనున్నారు. ఈ ప్రాంతంలో ప్రస్తుతం ఉన్న ఆర్టీసీ (APSRTC) భవనాలను ఇతర ప్రాంతాలకు తరలించేందుకు ఎన్టీఆర్ జిల్లా కలెక్టర్ (NTR District Collector) చర్యలు తీసుకోవాలని ప్రభుత్వం ఆదేశించింది. ఈ విధంగా, విశాఖ మరియు విజయవాడ నగరాల్లో అభివృద్ధి జోరు పెరుగుతుండగా, ప్రభుత్వ ప్రతిష్టాత్మక ప్రాజెక్టులుగా మారనున్న లులు మాల్స్ రాబోయే రోజుల్లో ఆర్థికంగా, పర్యాటకంగా రెండు నగరాలకూ పెద్ద ఆస్తిగా నిలవనున్నాయి.