Appanna: కింజరాపు అప్పన్న మిస్సింగ్.. దివ్వెల మాధురి ఇష్యూలో ట్విస్ట్..!

శ్రీకాకుళం జిల్లా రాజకీయాలు ఎప్పుడూ వేడిగానే ఉంటాయి. అందులోనూ టెక్కలి నియోజకవర్గం, నిమ్మాడ వంటి ప్రాంతాల్లో రాజకీయ వైరం తరచూ భగ్గుమంటూనే ఉంటుంది. తాజాగా, నిమ్మాడకు చెందిన కింజరాపు అప్పన్న అదృశ్యం వ్యవహారం జిల్లాలో కొత్త కలకలాన్ని రేపుతోంది. ఎమ్మెల్సీ దువ్వాడ శ్రీనివాస్, దివ్వెల మాధురి ఎపిసోడ్‌లో అనూహ్య మలుపుగా భావిస్తున్న ఈ ఘటన.. ఇప్పుడు పోలీసుల తీరుపై కూడా అనుమానాలను రేకెత్తిస్తోంది.

నిమ్మాడ గ్రామానికి చెందిన కింజరాపు అప్పన్న గురువారం అదృశ్యమయ్యారు. అప్పన్న భార్య చంద్రకళ కథనం ప్రకారం.. ఇద్దరు వ్యక్తులు బైక్‌పై ఇంటికి వచ్చారు. తాము పోలీసులమని పరిచయం చేసుకున్నారు. విచారణ కోసమని చెప్పి అప్పన్నను బైక్‌పై ఎక్కించుకుని తీసుకెళ్లారు. అయితే, గంటలు గడుస్తున్నా తన భర్త తిరిగి రాకపోవడం, ఫోన్ స్విచ్ ఆఫ్ రావడంతో ఆందోళన చెందిన కుటుంబ సభ్యులు మెళియాపుట్టి పోలీస్ స్టేషన్‌ను ఆశ్రయించారు.

అక్కడ అసలు ట్విస్ట్ ఎదురైంది. తాము అప్పన్నను తీసుకురాలేదని, అసలు తమకు ఆ విషయం తెలియదని పోలీసులు చెప్పినట్లు సమాచారం. అంతేకాకుండా, దీనిపై ఫిర్యాదు చేయడానికి వెళ్తే.. పోలీసులు ఫిర్యాదు స్వీకరించడానికి నిరాకరిస్తున్నారని చంద్రకళ ఆరోపిస్తున్నారు. “పోలీసులమని చెప్పి తీసుకెళ్లారు.. ఇప్పుడు పోలీసులేమో మాకు తెలియదు అంటున్నారు.. నా భర్త ఏమయ్యాడో తెలియక భయంగా ఉంది” అని ఆమె కన్నీరుమున్నీరవుతున్నారు.

అప్పన్న అదృశ్యానికి, కొద్ది రోజుల క్రితం సోషల్ మీడియాలో వైరల్ అయిన ఒక ఆడియో టేప్‌కు బలమైన సంబంధం ఉందనే వాదన వినిపిస్తోంది. ఆ ఆడియోలో ఎమ్మెల్సీ దువ్వాడ శ్రీనివాస్ సన్నిహితురాలు దివ్వెల మాధురితో అప్పన్న ఫోన్లో మాట్లాడుతున్నట్లు ఉంది. ఈ సంభాషణలో అప్పన్న చెప్పిన విషయాలు వైసీపీ వర్గాల్లో ప్రకంపనలు సృష్టించాయి. మాజీ ఉప ముఖ్యమంత్రి, వైఎస్ఆర్సిపి సీనియర్ నేత ధర్మాన కృష్ణదాస్ పేరును ఆ ఆడియోలో ప్రస్తావించారు. “దువ్వాడ శ్రీనివాస్‌పై దాడి చేస్తాం.. ఆ పని మనం చేద్దామని కృష్ణదాస్ గారు నాతో చెప్పారు” అని అప్పన్న ఆ ఆడియోలో పేర్కొన్నట్లు ప్రచారం జరిగింది. సొంత పార్టీ ఎమ్మెల్సీపై దాడికి సీనియర్ నేత ప్లాన్ చేశారన్న వ్యాఖ్యలు జిల్లా రాజకీయాల్లో పెను దుమారం రేపాయి.

ఈ మొత్తం వ్యవహారాన్ని నిశితంగా గమనిస్తే కొన్ని కీలక ప్రశ్నలు, అనుమానాలు తలెత్తుతున్నాయి. వచ్చిన వారు తాము పోలీసులమని చెప్పారు. కానీ, స్థానిక పోలీసులు తమకు సంబంధం లేదంటున్నారు. ఒకవేళ వేరే ప్రాంతం నుంచి ఎవరైనా వచ్చి పోలీసుల ముసుగులో కిడ్నాప్ చేశారా? అనే కోణంలో స్థానికులు అనుమానిస్తున్నారు. గత కొంతకాలంగా దువ్వాడ శ్రీనివాస్ వ్యవహారశైలిపై పార్టీ అధిష్టానం, స్థానిక నేతలు అసహనంతో ఉన్నారు. ఈ క్రమంలో ధర్మాన కృష్ణదాస్ పేరును అప్పన్న ప్రస్తావించడం.. రెండు వర్గాల మధ్య ఉన్న విభేదాలకు ఆజ్యం పోసింది. అప్పన్నను బయట ఉంచితే మరింత డ్యామేజ్ జరుగుతుందనే ఉద్దేశంతో ఎవరైనా ఈ పని చేయించారా? సాధారణంగా ఒక వ్యక్తి కనిపించడం లేదని ఫిర్యాదు వస్తే మిస్సింగ్ కేసు నమోదు చేయాలి. కానీ, పోలీసులు ఫిర్యాదు తీసుకోవడానికి నిరాకరిస్తున్నారంటే.. దీని వెనుక ఏదో పెద్ద ఒత్తిడి ఉందనే అనుమానాలు బలపడుతున్నాయి. ఇది అనధికారిక కస్టడీ అయ్యే అవకాశం కూడా లేకపోలేదు. ఈ ఆడియో లీక్ వెనుక అసలు ఉద్దేశం ఏంటి? అప్పన్న నిజంగానే ధర్మాన మాటలను కోట్ చేశారా? లేక మాధురిని నమ్మించడానికి అలా చెప్పారా? ఇప్పుడు అప్పన్న అదృశ్యంతో ఈ ప్రశ్నలకు సమాధానం దొరకడం కష్టంగా మారింది.

కింజరాపు అప్పన్న అదృశ్యం కేవలం ఒక వ్యక్తి మిస్సింగ్ కేసు కాదు. ఇది శ్రీకాకుళం జిల్లాలోని అధికార, ప్రతిపక్ష రాజకీయాలు, సొంత పార్టీలోని వర్గ పోరు, వ్యక్తిగత కక్షల సమ్మేళనంగా కనిపిస్తోంది. అప్పన్న ఆచూకీ లభిస్తే తప్ప.. ఆ వైరల్ ఆడియోలో ఉన్నది నిజమా? లేక అదొక రాజకీయ నాటకమా? అనేది బయటపడదు. ప్రస్తుతానికి అప్పన్న కుటుంబం ప్రాణభయంతో బిక్కుబిక్కుమంటోంది. పోలీసులు తక్షణమే స్పందించి వాస్తవాలను వెలికితీయాల్సిన అవసరం ఉంది.