Rayachoti: అన్నమయ్య జిల్లా కేంద్రం మార్పుపై హైకోర్టు కీలక ఆదేశాలు

అన్నమయ్య జిల్లా ప్రధాన కేంద్రం మార్పు వ్యవహారం ఇప్పుడు న్యాయస్థానం గడప తొక్కింది. జిల్లా కేంద్రాన్ని రాయచోటి నుంచి మదనపల్లెకు మారుస్తూ రాష్ట్ర ప్రభుత్వం తీసుకున్న నిర్ణయంపై దాఖలైన ప్రజా ప్రయోజన వ్యాజ్యం (PIL)పై ఆంధ్రప్రదేశ్ హైకోర్టు ఇవాళ కీలక విచారణ జరిపింది. ఈ వ్యవహారంలో ప్రభుత్వ నిర్ణయాన్ని సవాల్ చేస్తూ దాఖలైన పిటిషన్‌ను పరిశీలించిన ధర్మాసనం, పూర్తి వివరాలతో కౌంటర్ దాఖలు చేయాలని రాష్ట్ర ప్రభుత్వాన్ని ఆదేశించింది.

రాయచోటి నుంచి జిల్లా కేంద్రాన్ని తరలించడాన్ని వ్యతిరేకిస్తూ దాఖలైన పిటిషన్‌పై విచారణ సందర్భంగా కోర్టులో ఆసక్తికర వాదనలు జరిగాయి. 2022లో జిల్లాల పునర్విభజన జరిగినప్పుడు అన్నమయ్య జిల్లాకు రాయచోటిని కేంద్రంగా నిర్ణయించారని పిటిషనర్ తరఫు న్యాయవాది గుర్తు చేశారు. అప్పటి నుంచి గత మూడేళ్లుగా అక్కడ పరిపాలన సాగుతోందని, ఇప్పుడు ఆకస్మికంగా ఎటువంటి బలమైన కారణం లేకుండా జిల్లా కేంద్రాన్ని మదనపల్లెకు మార్చడం సమంజసం కాదని కోర్టు దృష్టికి తెచ్చారు.

ప్రధానంగా, పిటిషనర్ రెండు కీలక అంశాలను హైకోర్టు ముందు ఉంచారు. రాయచోటిని జిల్లా కేంద్రంగా ప్రకటించిన తర్వాత, గత మూడేళ్లలో అక్కడ కలెక్టరేట్, ఇతర కార్యాలయాల కోసం, మౌలిక సదుపాయాల కల్పన కోసం ప్రభుత్వం కోట్లాది రూపాయల ప్రజాధనాన్ని వెచ్చించింది. ఇప్పుడు ఆ కేంద్రాన్ని మారుస్తే, ఆ డబ్బంతా వృధా అయినట్లేనని పిటిషనర్ వాదించారు. అంతేకాక.. ఏదైనా జిల్లా కేంద్రాన్ని మార్చాలనుకున్నప్పుడు ప్రజాభిప్రాయ సేకరణ జరగాలి. కానీ, ప్రభుత్వం ప్రజల నుంచి ఎలాంటి అభ్యంతరాలు స్వీకరించకుండానే, ఏకపక్షంగా నిర్ణయం తీసుకుందని పిటిషనర్ ఆరోపించారు.

పిటిషనర్ వాదనలు విన్న తర్వాత ధర్మాసనం స్పందిస్తూ.. “పరిపాలనా సౌలభ్యం కోసం లేదా రాయచోటి కంటే మదనపల్లె మరింత మెరుగైన ప్రదేశం అని ప్రభుత్వం భావించి ఈ నిర్ణయం తీసుకుని ఉండవచ్చు కదా?” అని వ్యాఖ్యానించింది. అయితే, దీని వెనుక ఉన్న పూర్తి కారణాలు, పాటించిన విధివిధానాలు తెలియాల్సి ఉందని అభిప్రాయపడింది. ఈ మేరకు జిల్లా కేంద్రం మార్పు నిర్ణయం వెనుక ఉన్న కారణాలను వివరిస్తూ, పూర్తి వివరాలతో కౌంటర్ అఫిడవిట్ దాఖలు చేయాలని రాష్ట్ర ప్రభుత్వానికి నోటీసులు జారీ చేసింది. తదుపరి విచారణను నాలుగు వారాలకు వాయిదా వేసింది.

గత వైఎస్ఆర్‌సీపీ ప్రభుత్వ హయాంలో 26 జిల్లాల ఏర్పాటు సందర్భంగా అన్నమయ్య జిల్లాకు రాయచోటిని కేంద్రంగా ఎంపిక చేశారు. భౌగోళికంగా జిల్లాకు మధ్యలో ఉండటం దీనికి ప్రధాన కారణంగా అప్పట్లో చూపించారు. అయితే, ఇటీవల అధికారంలోకి వచ్చిన కూటమి ప్రభుత్వం, మదనపల్లెకు ఉన్న చారిత్రక ప్రాధాన్యత, వాతావరణం, ఇతర సౌకర్యాల దృష్ట్యా జిల్లా కేంద్రాన్ని అక్కడికి మార్చాలని ప్రాథమికంగా నిర్ణయించింది. ఈ నిర్ణయం రాయచోటి ప్రాంతంలో తీవ్ర నిరసనలకు దారితీసింది. రాయచోటిలో అఖిలపక్షం ఆధ్వర్యంలో బంద్‌లు, రాస్తారోకోలు జరిగాయి. అభివృద్ధి చెందుతున్న రాయచోటిని కాదని, మదనపల్లెకు హెడ్ క్వార్టర్ తరలించడం అన్యాయమని స్థానికులు ఆందోళన వ్యక్తం చేస్తున్నారు. మరోవైపు, మదనపల్లె వాసులు ప్రభుత్వ నిర్ణయాన్ని స్వాగతిస్తున్నారు.

హైకోర్టు ఆదేశాలతో బంతి ఇప్పుడు ప్రభుత్వం కోర్టులో ఉంది. రాయచోటి నుంచి మదనపల్లెకు మార్చడానికి గల బలమైన కారణాలను ప్రభుత్వం కోర్టుకు వివరించాల్సి ఉంటుంది. మౌలిక సదుపాయాలపై జరిగిన ఖర్చు, భవిష్యత్తు ప్రణాళికలపై ప్రభుత్వం ఇచ్చే వివరణ ఈ కేసులో కీలకం కానుంది. నాలుగు వారాల తర్వాత జరిగే విచారణలో కోర్టు ఎలాంటి తీర్పు ఇస్తుందనేది ఇప్పుడు అన్నమయ్య జిల్లా వ్యాప్తంగా ఉత్కంఠ రేపుతోంది.