IPAC – ED: బెంగాల్‌లో ఐప్యాక్‌కు ‘ఈడీ’ సెగ.. రంగంలోకి దీదీ!!

పశ్చిమ బెంగాల్‌లో ఎన్నికలు ఉన్నా లేకపోయినా రాజకీయం ఎప్పుడూ హీట్ మీదే ఉంటుంది. తాజాగా, ప్రముఖ ఎన్నికల వ్యూహరచన సంస్థ ఐ-ప్యాక్ (I-PAC) కార్యాలయాలపై ఎన్‌ఫోర్స్‌మెంట్ డైరెక్టరేట్ నిర్వహించిన సోదాలు రాష్ట్రంలో పెను సంచలనానికి దారితీశాయి. కేవలం సోదాలు జరగడమే కాకుండా, స్వయంగా ముఖ్యమంత్రి మమతా బెనర్జీ సంఘటనా స్థలానికి చేరుకోవడం ఈ అంశాన్ని జాతీయ స్థాయి చర్చగా మార్చింది.

గురువారం ఉదయం కోల్‌కతాలోని సాల్ట్ లేక్ ప్రాంతంలో ఉన్న ఐ-ప్యాక్ ప్రధాన కార్యాలయం, అలాగే ఆ సంస్థ సహ వ్యవస్థాపకుడు ప్రతీక్ జైన్ నివాసంపై ఈడీ అధికారులు ఏకకాలంలో దాడులు చేశారు. విదేశీ మారక ద్రవ్య నిర్వహణ చట్టం (FEMA) ఉల్లంఘనల ఆరోపణలతో ఈ సోదాలు జరిగినట్లు తెలుస్తోంది. కేంద్ర సాయుధ బలగాల పహారాలో ఈ ప్రక్రియ కొనసాగుతుండగానే, మమతా బెనర్జీ అక్కడికి చేరుకోవడం అందరినీ ఆశ్చర్యపరిచింది.

సాధారణంగా దర్యాప్తు సంస్థల దాడులు జరిగినప్పుడు రాజకీయ నేతలు ప్రకటనలకు పరిమితమవుతారు. కానీ మమత శైలి వేరు. ఆమె నేరుగా ప్రతీక్ జైన్ ఇంటికి వెళ్లి, అక్కడ ఉన్న ఈడీ అధికారులతో వాగ్వాదానికి దిగారు. బయటకు వచ్చిన తర్వాత ఆమె చేసిన వ్యాఖ్యలు రాజకీయ వర్గాల్లో ప్రకంపనలు సృష్టించాయి. ఇది కేంద్ర హోంమంత్రి అమిత్ షా పన్నిన కుట్ర అని ఆమె బాహాటంగా విమర్శించారు. తన పార్టీకి సంబంధించిన కీలక పత్రాలను ఈడీ అధికారులు తీసుకెళ్లకుండా అడ్డుకున్నానని, వాటిని తిరిగి స్వాధీనం చేసుకున్నానని ఆమె ప్రకటించడం గమనార్హం. ఒక ప్రైవేట్ వ్యక్తి ఫోన్, హార్డ్ డిస్క్‌లను లాక్కోవడం రాజ్యాంగ విరుద్ధమని ఆమె మండిపడ్డారు.

మమత చర్యను ప్రతిపక్ష నేత సువేందు అధికారి తీవ్రంగా తప్పుపట్టారు. 2019లో శారదా స్కామ్ విచారణ సమయంలో అప్పటి పోలీస్ కమిషనర్ రాజీవ్ కుమార్ కోసం మమత ధర్నా చేసిన విషయాన్ని ఆయన గుర్తు చేశారు. “ఒక ప్రైవేట్ సంస్థపై దాడులు జరిగితే ముఖ్యమంత్రికి ఎందుకు అంత కంగారు? అక్కడ దాచాల్సింది ఏముంది?” అన్నది సువేందు సంధిస్తున్న ప్రశ్న. దర్యాప్తు సంస్థల విధులకు ఆటంకం కలిగించినందుకు ఆమెపై చట్టపరమైన చర్యలు తీసుకోవాలని ఆయన డిమాండ్ చేస్తున్నారు.

ఐ-ప్యాక్ అనేది కేవలం ఒక సంస్థ మాత్రమే కాదు, 2021 అసెంబ్లీ ఎన్నికల నుండి తృణమూల్ కాంగ్రెస్ విజయాల్లో కీలక పాత్ర పోషిస్తున్న థింక్ ట్యాంక్. ఐ-ప్యాక్ వద్ద టీఎంసీకి సంబంధించిన డేటా, భవిష్యత్ వ్యూహాలు, ఆర్థిక లావాదేవీల వివరాలు ఉండే అవకాశం ఉంది. ఈ వివరాలు ఈడీ చేతికి చిక్కితే పార్టీకి ఇబ్బందికరంగా మారుతుందన్నది మమత ఆందోళన కావచ్చు. దర్యాప్తు సంస్థలను అడ్డుకోవడం ద్వారా, తన కేడర్‌కు నేను మీకు అండగా ఉంటాను అనే బలమైన సందేశాన్ని మమత పంపాలనుకుంటున్నారు. ఇది మరోసారి కేంద్ర-రాష్ట్ర సంబంధాల మధ్య ఉన్న అగాధాన్ని బయటపెట్టింది. ఫెడరల్ స్ఫూర్తిని కేంద్రం దెబ్బతీస్తోందని మమత వాదిస్తుంటే, అవినీతిని వెలికితీస్తుంటే అడ్డుకుంటున్నారని బీజేపీ ఆరోపిస్తోంది.

బెంగాల్ రాజకీయం ఇప్పుడు ఈడీ సోదాల చుట్టూ తిరుగుతోంది. మమతా బెనర్జీ దూకుడుగా వ్యవహరించడం ద్వారా ఈ అంశాన్ని రాజకీయ కక్షసాధింపుగా ప్రజల్లోకి తీసుకెళ్లాలని చూస్తున్నారు. మరోవైపు, ఈ దాడుల ద్వారా టీఎంసీ ఆర్థిక మూలాలను దెబ్బతీయాలని కేంద్రం భావిస్తోందనేది రాజకీయ విశ్లేషకుల అభిప్రాయం. ఈ పోరులో చట్టం తన పని తాను చేసుకుపోతుందా లేక రాజకీయ వ్యూహాలే పైచేయి సాధిస్తాయా అనేది వేచి చూడాలి.