Pawan Kalyan: సాంస్కృతిక వైభవంతో పిఠాపురంలో పవన్ కళ్యాణ్ సంక్రాంతి ఉత్సవాలు..

జనసేన అధినేత, ఉప ముఖ్యమంత్రి పవన్ కళ్యాణ్ (Pawan Kalyan) తన సొంత నియోజకవర్గమైన పిఠాపురంలో ఈసారి సంక్రాంతి వేడుకలను అత్యంత వైభవంగా నిర్వహించేందుకు సిద్ధమయ్యారు. సాధారణంగా పిఠాపురం అని పిలిచినా, అసలు పేరు పీఠికాపురం (Pithikapuram) కావడం విశేషం. ఆధ్యాత్మిక నేపథ్యం ఉన్న ఈ ప్రాంతానికి ప్రత్యేక గుర్తింపు తీసుకురావాలనే ఉద్దేశంతో ఈ ఉత్సవాలకు “పీఠికాపుర సంక్రాంతి మహోత్సవం” అనే పేరును పెట్టారు. ఈ నెల 9 నుంచి 11వ తేదీ వరకు మూడు రోజుల పాటు ఈ సంబరాలు ఘనంగా జరగనున్నాయి.

ఈ ఉత్సవాల కోసం పవన్ కళ్యాణ్ ముందుగానే పిఠాపురం చేరుకోనున్నారు. ఆర్‌ఆర్‌బీహెచ్‌ఆర్ కళాశాల మైదానం (RRBHR College) వేదికగా సంక్రాంతి సంబరాలకు ఆయన శ్రీకారం చుడతారు. ఇదే సందర్భంలో నియోజకవర్గ అభివృద్ధికి సంబంధించిన కీలక కార్యక్రమాలు కూడా చేపట్టనున్నారు. దాదాపు రూ.186 కోట్ల విలువైన పలు అభివృద్ధి పనులకు శంకుస్థాపనలు చేయడంతో పాటు, ఇప్పటికే పూర్తైన రూ.26 కోట్ల పనులను ప్రజలకు అంకితం చేయనున్నారు. ఈ కార్యక్రమాల ద్వారా పిఠాపురం అభివృద్ధిపై తన ప్రత్యేక దృష్టిని మరోసారి పవన్ చాటనున్నారు.

పీఠికాపుర సంక్రాంతి మహోత్సవంలో భాగంగా సాంస్కృతిక వైభవం ఉట్టిపడేలా ఏర్పాట్లు చేశారు. పవన్ కళ్యాణ్ స్వయంగా ఈ కార్యక్రమాలను వీక్షించి కళాకారులను ప్రోత్సహించనున్నారు. ఉత్సవాల్లో ఏర్పాటు చేసిన వివిధ స్టాళ్లను పరిశీలిస్తూ స్థానిక ఉత్పత్తులకు ప్రాధాన్యం కల్పించనున్నారు. అలాగే ఇటీవల వరదలతో ఇబ్బంది పడిన ఇందిరానగర్ కాలనీ (Indira Nagar Colony), రైల్వే స్టేషన్ సమీపంలోని మోహన్‌నగర్ (Mohan Nagar) ప్రాంతాలను సందర్శించి పరిస్థితిని ప్రత్యక్షంగా తెలుసుకోనున్నారు.

ఈ నెల 10వ తేదీన గొల్లప్రోలు (Gollaprolu) ప్రాంతంలోని ఇళ్ల స్థలాలను పరిశీలించిన తర్వాత, కాకినాడ (Kakinada) చేరుకుని జిల్లా పోలీస్ కార్యాలయంలో అధికారులతో శాంతి భద్రతలపై సమీక్ష సమావేశం నిర్వహిస్తారు. అనంతరం రంగరాయ మెడికల్ కాలేజ్ (Rangaraya Medical College)లో రూ.10.11 కోట్లతో చేపట్టనున్న అభివృద్ధి పనులకు శంకుస్థాపన చేయనున్నారు.

ఈసారి సంక్రాంతి ఉత్సవాలు గతంలో ఎన్నడూ లేనంత వైభవంగా ఉండనున్నాయి. తొలి రోజు హరిదాసుల కీర్తనలు, గంగిరెద్దుల ఆటలు, జానపద గీతాలు, వీర నాట్యాలు, ఉరుముల నృత్యాలు, తప్పెట గుళ్లు, గరగు నృత్యాలు, లంబాడా నృత్యం, డప్పులు, గిరిజనుల సంప్రదాయ థింసా నృత్యం వంటి కార్యక్రమాలు ప్రత్యేక ఆకర్షణగా నిలవనున్నాయి. అలాగే కూచిపూడి, భరతనాట్యం వంటి శాస్త్రీయ నాట్య ప్రదర్శనలు కూడా ఏర్పాటు చేశారు. కోలాటాలు, కేరళ సంప్రదాయ మార్షల్ ఆర్ట్స్ ప్రదర్శనలు కూడా ప్రేక్షకులను ఆకట్టుకోనున్నాయి.

చివరి రోజు గ్రామీణ జానపద గీతాలు, సినీ మ్యూజికల్ నైట్ కార్యక్రమాలతో ఉత్సవాలు ముగియనున్నాయి. ఈ మూడు రోజుల పాటు పవన్ కళ్యాణ్ పిఠాపురంలోనే ఉంటూ ప్రజలకు అందుబాటులో ఉండనున్నారు. మొత్తంగా ఈ సంక్రాంతి మహోత్సవాలు పిఠాపురానికి ప్రత్యేక గుర్తింపును తీసుకువచ్చేలా, ఆ ప్రాంత కీర్తిని నలుదిశలా వ్యాపింపజేసేలా నిలవనున్నాయని చెప్పవచ్చు.