Jagan: జగన్ భవిష్యత్తు పై వర్షాకాల సమావేశాల ఎఫెక్ట్..కూటమి ప్లాన్ ఏమిటో?

ఆంధ్రప్రదేశ్ (Andhra Pradesh) రాజకీయాల్లో పులివెందుల (Pulivendula) మరోసారి చర్చలోకి వచ్చింది. ఇటీవల అక్కడ జరిగిన జెడ్పీటీసీ ఉప ఎన్నికలో వైసీపీ (YCP) అంచనాలు తారుమారయ్యాయి. ఎన్నాళ్లుగా తమ గడపలో ఓటమి అనే మాట విననని వైసీపీ, ఈసారి మాత్రం గట్టి ఎదురుదెబ్బ తిన్నది. దీంతోనే ఇప్పుడు అక్కడి అసెంబ్లీ సీటు భవిష్యత్తు గురించే చర్చలు మొదలయ్యాయి. ముఖ్యంగా జగన్ మోహన్ రెడ్డి (Jagan Mohan Reddy) ప్రాతినిధ్యం వహిస్తున్న పులివెందుల సీటు కూడా ప్రమాదంలో పడుతుందా అన్న అనుమానాలు పెరుగుతున్నాయి.

నియమాల ప్రకారం వరుసగా అరవై రోజులు ఎమ్మెల్యే సభకు హాజరుకాకపోతే స్వయంచాలకంగా సభ్యత్వం రద్దు అవుతుంది. అయితే స్పీకర్ అనుమతితో గైర్హాజరు అయితే మినహాయింపు ఉంటుంది. కొత్త కూటమి ప్రభుత్వం అధికారంలోకి వచ్చిన తర్వాత వైసీపీ సభ్యులు అసెంబ్లీకి హాజరుకావడం లేదు. గవర్నర్ ప్రసంగం సమయంలో మాత్రం హాజరైనప్పటికీ, అది సాంకేతికంగా పరిగణించబడదని చెబుతున్నారు. ఈ నేపథ్యంలో రాబోయే వర్షాకాల సమావేశాలు చాలా కీలకంగా మారాయి.

ప్రస్తుతం వైసీపీకి మొత్తం 11 మంది ఎమ్మెల్యేలు ఉన్నారు. ఈసారి కూడా ఎవ్వరూ హాజరుకాకపోతే వారి సభ్యత్వం పోతుందని అంటున్నారు. ఈ అంశంపై అసెంబ్లీ ఉపసభాపతి రఘురామ కృష్ణం రాజు (Raghu Rama Krishna Raju) చేసిన వ్యాఖ్యలు సంచలనమయ్యాయి. జగన్ ప్రవర్తనను చిన్న పిల్లాడు చంద్రుడి కోసం పట్టుబడినట్లుగా పోలుస్తూ, సభకు హాజరు కావాలని ఆయన స్పష్టంగా సూచించారు. లేకపోతే పులివెందుల సీటుతో సహా ఉప ఎన్నికలు తప్పవని హెచ్చరించారు.

వైసీపీ మాత్రం గైర్హాజరు కొనసాగించాలని భావిస్తోందన్న ప్రచారం ఉంది. అలాంటి పరిస్థితిలో కూటమి ప్రభుత్వం మరింత దూకుడు ప్రదర్శించే అవకాశం ఉందని అంటున్నారు. అన్ని 11 స్థానాలు ఖాళీ అయితే ఉప ఎన్నికలు జరిగి, అధికారంలో ఉన్న తెలుగు దేశం పార్టీ (TDP) గట్టి కసరత్తు చేస్తే గెలుపు సాధ్యమని రాజకీయ వర్గాల అభిప్రాయం.పైగా ఎప్పటినుంచో కూటమి నేతల దృష్టి పులివెందుల వైపే ఉందని టాక్.

జగన్ ఇప్పటివరకు ఆ ప్రాంతంలో ఎప్పుడూ ఓటమి చూడలేదు. కానీ ప్రస్తుత రాజకీయ పరిస్థితుల్లో కూటమి వ్యూహాత్మకంగా వ్యవహరిస్తూ ముందుకెళ్తోంది. ప్రజల్లోనూ మార్పు సంకేతాలు కనిపిస్తున్నాయని విశ్లేషకులు అంటున్నారు. దీంతో పులివెందులలో జరిగే పరిణామాలు కేవలం ఒక నియోజకవర్గానికి పరిమితం కాకుండా, రాష్ట్ర రాజకీయాలపై పెద్ద ఎత్తున ప్రభావం చూపే అవకాశం ఉంది.

రాబోయే వర్షాకాల సమావేశాల తరువాత ఏపీలో సంచలనాత్మక పరిణామాలు చోటు చేసుకోవచ్చని అందరూ భావిస్తున్నారు. జగన్ సభకు హాజరవుతారా లేదా అన్నది ఇప్పుడు పెద్ద ప్రశ్నగా మారింది. హాజరు కాకుంటే ఆయన సభ్యత్వమే కాదు, పులివెందుల అసెంబ్లీ ఎన్నికలపై కూడా కొత్త చరిత్ర రాయబడే అవకాశం ఉందని రాజకీయ పరిశీలకులు చెబుతున్నారు.