Super Six: సూపర్ సిక్స్ హామీలపై విమర్శలకు చెక్ పెట్టబోతున్న చంద్రబాబు సర్కార్..!

ఆంధ్రప్రదేశ్‌లో కూటమి ప్రభుత్వం (NDA Govt) ఏర్పడి ఏడాది కావస్తోంది. అయినా సూపర్ సిక్స్ (Super Six) హామీలు చేయట్లేదంటూ విమర్శలు వెల్లువెత్తుతున్నాయి. ఈ విమర్శలను చెక్ పెట్టేందుకు చంద్రబాబు (CM Chandrababu) ప్రభుత్వం కీలక నిర్ణయాలు తీసుకుంటోంది. ఎన్డీఏ కూటమి ప్రభుత్వం, గత ఏడాది కాలంలో అనేక సంక్షేమ కార్యక్రమాలను అమలు చేసినప్పటికీ, సూపర్ సిక్స్ హామీల అమలులో జాప్యం జరిగిందనే విమర్శలు ఎదుర్కొంటోంది. ఈ నేపథ్యంలో ప్రభుత్వం తాజాగా అన్నదాత సుఖీభవ (Annadatha Sukhibhava), తల్లికి వందనం (Thalliki Vandanam), ఉచిత బస్సు (Free Bus) సౌకర్యం వంటి పథకాలను అమలు చేయడానికి సిద్ధమవుతోంది.

సూపర్ సిక్స్ హామీలు కూటమి ప్రభుత్వ ఎన్నికల హామీలలో కీలకమైనవి. ఇందులో అన్నదాత సుఖీభవ (రైతులకు ఏడాదికి రూ.20,000 ఆర్థిక సాయం), తల్లికి వందనం (విద్యార్థులకు రూ.15వేల ఆర్థిక సహాయం), దీపం-2, ఆడబిడ్డ రక్షణ, యువగళం వంటి పథకాలు ఉన్నాయి. ఈ హామీలు ప్రజల్లో ఆశలను రేకెత్తించినప్పటికీ, అమలులో జాప్యం కారణంగా విపక్ష వైఎస్ఆర్ కాంగ్రెస్ పార్టీ తీవ్ర విమర్శలు చేస్తోంది. ఈ విమర్శలను తిప్పికొట్టేందుకు చంద్రబాబు ప్రభుత్వం సిద్ధమవుతోంది. గత ఏడాది కాలంలో ఇతర సంక్షేమ పథకాల అమలుపై దృష్టి సారించి, ఇప్పుడు సూపర్ సిక్స్ హామీల అమలుకు సన్నాహాలు చేస్తోంది.

కూటమి ప్రభుత్వం గత ఏడాది కాలంలో పింఛన్ల పెంపు ద్వారా నెలకు 64 లక్షల మందికి రూ.2,720 కోట్లు పంపిణీ చేసింది. ఈ మొత్తమే ఏడాదికి రూ.34,000 కోట్లు అయిందని ప్రభుత్వం చెప్తోంది. అలాగే, విద్యా రంగంలో 16,347 పోస్టులతో డీఎస్సీ నోటిఫికేషన్ జారీ చేసింది. ఆరోగ్య రంగంలో 76 పోస్టుల ఖాళీలను భర్తీ చేయడానికి మెడికల్ సర్వీసెస్ రిక్రూట్‌మెంట్ బోర్డు ఏర్పాటు చేసింది.

ఈ నెలలో అన్నదాత సుఖీభవ పథకం కింద రైతులకు ఏడాదికి రూ.20,000 ఆర్థిక సాయం అందించేందుకు సన్నాహాలు చేస్తోంది. కేంద్ర ప్రభుత్వం ఇచ్చే రూ.6000తో కలిపి దీన్ని అందించనుంది. మొదటి విడతలో రాష్ట్ర ప్రభుత్వం రూ.5వేలు, కేంద్రం రూ.2వేలు ఈ నెల 21న జమ చేస్తాయని తెలుస్తోంది. ఈ పథకం కోసం బడ్జెట్‌లో రూ.4,500 కోట్లు కేటాయించారు. అలాగే తల్లికి వందనం పథకం ద్వారా విద్యార్థులకు రూ.15వేల చొప్పున ఆర్థిక సహాయం చేయనుంది. ఈ నెల 12 లేదా 14లోపు ఈ నిధులు జమ అవుతాయని తెలుస్తోంది. ఈ రెండు పథకాలు ఈ నెలలో అమలులోకి రానున్నాయి., ఇది రైతులు, విద్యార్థుల ఆర్థిక స్థితిని బలోపేతం చేయడంలో కీలకమైన అడుగుగా భావించబడుతోంది.

ఆగస్టు 15 నుంచి మహిళలకు ఉచిత బస్సు సౌకర్యం అందుబాటులోకి తెచ్చేందుకు ప్రభుత్వం సన్నాహాలు చేస్తోంది. ఈ పథకం మహిళల ఆర్థిక స్వావలంబనను ప్రోత్సహించడమే కాకుండా, వారి రోజువారీ ప్రయాణ ఖర్చులను తగ్గించడంలో సహాయపడుతుంది. రాష్ట్ర ఆర్థిక పరిస్థితి, గత ప్రభుత్వం నుంచి వచ్చిన అప్పుల భారం వంటివి కూటమి ప్రభుత్వానికి పెద్ద అడ్డంకిగా ఉన్నాయి. అయినప్పటికీ, ప్రభుత్వం ఈ సవాళ్లను అధిగమించి, బడ్జెట్ కేటాయింపుల ద్వారా పథకాలను అమలు చేయడానికి కృషి చేస్తోంది.