Jagan: ఎంతకీ తేలని జగన్ కేసులు.. బీజేపీ సపోర్ట్ ఉందా?

వైసీపీ అధినేత వైఎస్ జగన్ మోహన్ రెడ్డి (YS Jagan Mohan Reddy) పరిస్థితి ప్రస్తుతం రాజకీయ వర్గాల్లో చర్చనీయాంశమైంది. ఆయనపై కేసులు ఉన్నా పెద్దగా ఎలాంటి ఇబ్బంది తలెత్తకపోవడం, విచారణలు నెమ్మదించడం వెనుక రాజకీయ సమీకరణలున్నాయనే అభిప్రాయం వినిపిస్తోంది. ముఖ్యంగా మూడు అంశాలు ప్రాధాన్యం సంతరించుకున్నాయి.

మొదటిగా, వైసీపీ పాలనలో వెలుగులోకి వచ్చిన మధ్య కుంభకోణం (Liquor Scam) . ఈ కేసులో పలువురు అరెస్టు అయ్యారు. ఇప్పటికే అధికారులు రెండు చార్జ్ షీట్లు దాఖలు చేశారు. అందులో జగన్ పేరు ప్రస్తావనలోకి రావడం గమనార్హం. కానీ అనూహ్యంగా ఉపరాష్ట్రపతి ఎన్నికల ప్రక్రియ (Vice President Elections) ప్రారంభమైన తర్వాత ఈ విచారణ వేగం తగ్గిపోయింది. దీని వెనుక బీజేపీ (BJP) పెద్దల ప్రభావముందనే చర్చ సాగుతోంది.

రెండవది, మాజీ ఎమ్మెల్సీ వైఎస్ వివేకానంద రెడ్డి (YS Vivekananda Reddy) హత్య కేసు. ఈ కేసు రాష్ట్రాన్ని కుదిపేసింది. అయితే విచారణలో జగన్ పేరు దాదాపు బయటపడ్డట్టే అని అందరూ భావించారు. కేంద్ర నాయకులు వైసీపీతో టచ్‌లో ఉండటం, పుట్టినరోజులు, వివాహ వార్షికోత్సవాల సందర్భాల్లో శుభాకాంక్షలు తెలియజేయడం వంటి అంశాలు రాజకీయంగా ఎక్కువ చర్చనీయాంశమయ్యాయి. దీంతో ఈ కేసులో కీలక ఆరోపణలు ఎదుర్కొంటున్నవారు కూడా ధైర్యంగా ఉన్నారని చెబుతున్నారు.

మూడవది, జగనన్న ఇళ్ల పథకం (Jagananna Housing Scheme). ఈ కార్యక్రమంలో అనేక అవకతవకలు జరిగాయని ఆరోపణలు వచ్చాయి. ప్రభుత్వ నిధులను కొంతమంది నాయకులు దుర్వినియోగం చేశారని విమర్శలు వినిపించాయి. సీఎం చంద్రబాబు నాయుడు (N. Chandrababu Naidu) దీనిపై విచారణ జరపాలని నిర్ణయం తీసుకున్నా, ఈ అంశం కూడా నెమ్మదించిపోయింది. ఇక్కడ కూడా బీజేపీ వ్యూహమే కారణమని టీడీపీ వర్గాలు భావిస్తున్నాయి.

ఇలా చూస్తే జగన్‌పై పెద్ద ఎత్తున చర్యలు తీసుకునే పరిస్థితి కనిపించడం లేదు. విచారణలు కొనసాగుతున్నా, చట్టపరమైన కఠిన చర్యలు ఎదుర్కొనే పరిస్థితి రానట్టే ఉంది. రాజకీయంగా విమర్శలు తప్పవు కానీ, న్యాయస్థానంలో నిలబెట్టే స్థాయిలో పరిణామాలు జరగవని పలువురు విశ్లేషకులు అంటున్నారు.

ముఖ్యంగా ఉపరాష్ట్రపతి ఎన్నికల్లో వైసీపీ బీజేపీ వైపు మొగ్గు చూపడం, కాంగ్రెస్ (Congress) నుంచి ఒత్తిళ్లు వచ్చినా పట్టించుకోకపోవడం, ఢిల్లీలో (Delhi) ఉన్న పెద్దలకు స్పష్టమైన సందేశం ఇచ్చినట్టుగా భావిస్తున్నారు. దీనితో వైసీపీకి రక్షణ కల్పించే విధంగా బీజేపీ పావులు కదుపుతోందన్న అభిప్రాయం బలపడుతోంది.

ఈ పరిస్థితుల్లో జగన్ సేఫ్ జోన్‌లో ఉన్నారని రాజకీయ విశ్లేషకులు చెబుతున్నారు. విచారణలు ఉన్నా, ఆయనకు పెద్దగా ఇబ్బంది ఉండకపోవచ్చని అభిప్రాయం వ్యక్తమవుతోంది. ఇకపై రాష్ట్ర ప్రభుత్వం జగన్‌పై నేరుగా దాడి చేసే అవకాశం తగ్గిపోయిందనే భావన రాజకీయ వర్గాల్లో స్పష్టమవుతోంది. మొత్తం మీద, జగన్‌కి బీజేపీ వ్యూహాత్మకంగా కవచం అందిస్తుందనే అభిప్రాయం పెరుగుతోంది.