Amaravati: అమరావతికోసం మరో 40 వేల ఎకరాలు! అవసరమా..!?

ఆంధ్రప్రదేశ్ రాజధాని అమరావతి (Amaravati) నిర్మాణం విషయంలో కూటమి ప్రభుత్వం గేరు మార్చింది. రాజధానిని కేవలం పరిపాలనా కేంద్రానికే పరిమితం చేయకుండా, అంతర్జాతీయ స్థాయి మహా నగరంగా తీర్చిదిద్దాలనే లక్ష్యంతో రెండో విడత భూ సమీకరణకు (Land Pooling) రంగం సిద్ధం చేస్తోంది. ఇటీవల అమరావతి రైతులతో జరిగిన సమావేశంలో ముఖ్యమంత్రి చంద్రబాబు (CM Chandrababu) చేసిన వ్యాఖ్యలు ఈ భారీ ప్రణాళికను స్పష్టం చేశాయి. అయితే, తొలి విడత సమీకరణ జరిగి పదేళ్లు దాటుతున్నా క్షేత్రస్థాయిలో ఇంకా పూర్తిస్థాయి అభివృద్ధి కనిపించకపోవడం, ఇప్పుడు మరో భారీ సమీకరణకు వెళ్లడంపై సర్వత్రా ఆసక్తితో పాటు ఆందోళన కూడా వ్యక్తమవుతోంది.

అమరావతిని కేవలం ఒక రాజధానిగా మాత్రమే కాకుండా, సంపద సృష్టించే కేంద్రంగా (Wealth Creation Center) మార్చాలన్నది ప్రభుత్వ ఆలోచనగా కనిపిస్తోంది. “భూ సమీకరణ మరోసారి జరగకపోతే అమరావతి ఒక గ్లోబల్ సిటీగా కాకుండా, కేవలం ఒక మున్సిపాలిటీగా మిగిలిపోతుంది,” అని సీఎం చంద్రబాబు వ్యాఖ్యానించడం వెనుక ఉన్న ఉద్దేశం ఇదే. భవిష్యత్తు అవసరాలను దృష్టిలో ఉంచుకుని నగరాన్ని విస్తరించకపోతే పెట్టుబడులు రావని, తద్వారా అభివృద్ధి స్తంభించిపోతుందన్నది ప్రభుత్వ వాదన.

రెండో విడతలో సుమారు 40వేల ఎకరాలకు పైగా భూమిని సమీకరించే అవకాశం ఉంది. ఇందుకోసం తుళ్లూరులోని మూడు మండలాలతో పాటు, పల్నాడు జిల్లాలోని పలు ప్రాంతాలను సీఆర్డీఏ (CRDA) పరిధిలోకి తీసుకురానున్నారు. ఈ భూముల్లో 5వేల ఎకరాలతో అంతర్జాతీయ విమానాశ్రయం ఏర్పాటు చేయాలనుకుంటున్నారు. ప్రస్తుతం ఉన్న గన్నవరం విమానాశ్రయం విస్తరణకు పరిమితులు ఉండటంతో, అమరావతిలోనే అతిపెద్ద ఇంటర్నేషనల్ ఎయిర్‌పోర్ట్ నిర్మించాలని యోచిస్తున్నారు. దీనికోసం మంగళగిరి లేదా తాడికొండ వైపు కాకుండా పల్నాడు వైపు భూములను పరిశీలిస్తున్నారు. ఇక 2500 ఎకరాల్లో అంతర్జాతీయ స్పోర్ట్స్ సిటీ నిర్మిస్తారు. ఒలింపిక్స్ స్థాయి క్రీడలకు ఆతిథ్యం ఇవ్వగలిగేలా ఒక స్పోర్ట్స్ హబ్‌ను ప్లాన్ చేస్తున్నారు. మరో 2500 ఎకరాల్లో స్మార్ట్ ఇండస్ట్రీ ప్రతిపాదించారు. కాలుష్య రహిత, హై-టెక్నాలజీ పరిశ్రమలకు ఈ జోన్ కేటాయించనున్నారు. సీఆర్డీఏ అథారిటీలో తుది చర్చలు జరిపిన అనంతరం దీనిపై అధికారిక నోటిఫికేషన్ విడుదలయ్యే అవకాశం ఉంది.

ప్రభుత్వ విజన్ బాగానే ఉన్నా, క్షేత్రస్థాయిలో పరిస్థితి భిన్నంగా ఉందనే విమర్శలు బలంగా వినిపిస్తున్నాయి. 2015లో తొలి విడత కింద రైతుల నుండి దాదాపు 33,000 ఎకరాలను సమీకరించారు. కానీ, ఇప్పటికీ ఆ భూముల్లో పూర్తిస్థాయి మౌలిక వసతులు కల్పించడంలో ప్రభుత్వాలు విఫలమయ్యాయి. పదేళ్లుగా కౌలు మాత్రమే తీసుకుంటూ, అభివృద్ధి చేసిన ప్లాట్ల కోసం ఎదురుచూస్తున్న రైతులు తీవ్ర అసంతృప్తితో ఉన్నారు. తమ భూముల్లో నిర్మాణాలు ఎప్పుడు పూర్తవుతాయో తెలియని అయోమయంలో వారున్నారు. “చేతిలో ఉన్న 33 వేల ఎకరాలనే ఇంకా అభివృద్ధి చేయలేదు, కొత్తగా మరో 40 వేల ఎకరాలు ఎందుకు?” అనే ప్రశ్న ప్రతిపక్షాలు, విశ్లేషకుల నుండి వస్తోంది. ఇది రియల్ ఎస్టేట్ హైప్ కోసమే తప్ప, వాస్తవ అభివృద్ధికి కాదన్న విమర్శలు కూడా ఉన్నాయి.

ప్రభుత్వం ముందు ఇప్పుడు రెండు పెద్ద సవాళ్లు ఉన్నాయి. ఒకటి, మొదటి విడత రైతులకు ఇచ్చిన హామీలను యుద్ధ ప్రాతిపదికన పూర్తి చేసి వారిలో విశ్వాసం నింపడం. రెండు, మలి విడత సమీకరణకు రైతులను ఒప్పించడం. గత ఐదేళ్లలో అమరావతి అభివృద్ధి కుంటుపడటంతో రైతులు తమ భూములను ఇవ్వడానికి ఎంతవరకు ముందుకు వస్తారన్నది ప్రశ్నార్థకం. అమరావతిని ప్రపంచ స్థాయి నగరంగా తీర్చిదిద్దాలంటే భూమి అవసరమే. కానీ, అది కాగితాల మీద గ్రాఫిక్స్ లా కాకుండా, వాస్తవ నిర్మాణాల రూపంలో కనిపిస్తేనే ప్రజల్లో, రైతుల్లో నమ్మకం కలుగుతుంది. మరి చంద్రబాబు ప్రభుత్వం ఈ సవాలును ఎలా అధిగమిస్తుందో వేచి చూడాలి.