Pulivendula: పులివెందులలో రాజకీయం ఏ మలుపు తిరుగుతుంది?

ఆంధ్రప్రదేశ్‌ (Andhra Pradesh) రాజకీయాలలో కొన్ని ప్రాంతాలకు ప్రత్యేక గుర్తింపు ఉంటుంది. అలాంటి ప్రాంతాల్లో పులివెందుల (Pulivendula) ఒకటి. ఈ పేరు వినగానే వెంటనే గుర్తొచ్చేది వైఎస్సార్ (YSR) కుటుంబమే. అనేక దశాబ్దాలుగా ఈ ప్రాంతంలో ఒకే కుటుంబం రాజకీయంగా ఆధిపత్యం చూపుతోంది. కాలం మారినా , ప్రభుత్వం మారినా , రాజకీయ ఒడిదుడుకులు ఎన్ని ఎదురైనా పులివెందుల మాత్రం వైఎస్సార్ కుటుంబానికి కంచుకోటగానే కొనసాగుతోంది. అయితే ఇప్పటికీ అదే పరిస్థితి కొనసాగుతుందా? ప్రస్తుత రాజకీయ పరిస్థితుల రీత్యా ప్రజల మనసు ఇప్పుడు ఎటు మొగ్గుతున్నదనే అంశం ఆసక్తిగా మారింది.

ఇప్పటికే పులివెందులలో జెడ్పీటీసీ (ZPTC) ఉపఎన్నికలు రాబోతున్నాయి. ఈ నేపథ్యంలో వైఎస్సార్ కాంగ్రెస్ (YSR Congress) పై ప్రజల విశ్వాసం కొనసాగుతుందా అన్నది పెద్ద ప్రశ్నగా మారింది. గతంలో ఎన్నోసార్లు ఈ నియోజకవర్గం వైఎస్సార్ కుటుంబానికి అండగా నిలిచింది. కుటుంబం నుంచి ఎవరు ఎన్నికల్లో నిలిచినా ఆదరణ తారాస్థాయిలో ఉండేది. కానీ ఈసారి పరిస్థితులు కొంత భిన్నంగా కనిపిస్తున్నాయని పలువురు విశ్లేషకులు చెబుతున్నారు.

మరోపక్క తెలుగుదేశం పార్టీ (TDP) ఈ చిన్న ఎన్నికను పెద్దగా భావిస్తోంది. ముఖ్యంగా జగన్ (Jagan) స్వగ్రామం కావడం వల్ల పులివెందులలో విజయం దక్కితే ఇక కూటమి ప్రభుత్వానికి తిరుగు ఉండదు అన్న టాక్ కూడా వినిపిస్తోంది. అందుకే కేవలం పదివేలకు దగ్గరగా ఉన్న ఓటర్లను ఆకట్టుకోవడానికి తెలుగుదేశం పార్టీ విస్తృతంగా వ్యూహాలు అమలు చేస్తోంది. వైసీపీకి సానుభూతి చూపే గ్రామాల్లో చురుకైన ప్రచారాలు చేస్తోంది. అదే సమయంలో అధికార పక్షం మాత్రం ప్రభుత్వంలో ఉన్న ప్రాధాన్యతను ఉపయోగించుకుంటోంది.

ప్రస్తుతానికి రాష్ట్రాన్ని పాలిస్తున్న టీడీపీ కూటమి చేతిలో అధికార హక్కులు ఉన్నందున, ప్రజలకు సంక్షేమ పధకాలపై ఎక్కువ ఆసక్తి నెలకొంది. ఈ అవకాశాన్ని టీడీపీ విస్తృతంగా వినియోగిస్తోంది. “పధకాలు పొందాలంటే మీ ఓటు మాకే వేయాలి” అనే సందేశాన్ని ఇండైరెక్ట్ గా ప్రజల్లోకి తీసుకెళ్తోంది. దీంతో కొంతమంది ప్రజల్లో ఓటు వేయకపోతే పధకాలు నిలిపేస్తారేమో అనే భయం కూడా కనిపిస్తోంది.

పధకాలే ముఖ్యమా? లేక వారు నమ్మిన నాయకుడి, కుటుంబం పట్ల విశ్వాసమా? అనే ప్రశ్న ఇప్పుడు పులివెందులలో ప్రజల మనసుల్లో ఉక్కిరిబిక్కిరి చేస్తోంది. ఒకవేళ ఇక్కడ వైఎస్సార్ కుటుంబానికి ఓటర్లు వ్యతిరేకంగా ఓటేస్తే అది పెద్ద పరిణామంగా మారే అవకాశం ఉంది. అలా జరిగితే టీడీపీకి అది మంచి మైలురాయిగా నిలుస్తుందని రాజకీయ పరిశీలకులు అభిప్రాయపడుతున్నారు. మరి చివరికి ప్రజల తీర్పు ఏమవుతుందో, విశ్వాసం గెలుస్తుందా లేదా పధకాలు ప్రభావితం చేస్తాయా అన్నది త్వరలోనే తేలనుంది.