Pawan Kalyan: విశాఖలో సేనతో సేనాని..పవన్ స్పీచ్ పై సర్వత్రా ఆసక్తి..

విశాఖపట్నం (Visakhapatnam) లో చాలా రోజుల తరువాత జనసేన (Janasena) పార్టీ అధినేత, రాష్ట్ర ఉప ముఖ్యమంత్రి పవన్ కళ్యాణ్ (Pawan Kalyan) పెద్ద ఎత్తున బహిరంగ సభకు సిద్ధమవుతున్నారు. ఆయన ఉప ముఖ్యమంత్రి బాధ్యతలు స్వీకరించిన తర్వాత ఇది జరుగుతున్న మొదటి సభ కావడంతో ఈ కార్యక్రమంపై అందరి దృష్టి పడింది. గతంలో ఆయన ఎన్నో సార్లు జనసేన అధ్యక్షుడిగా విశాఖలో సభలు నిర్వహించారు. ముఖ్యంగా జగదాంబ జంక్షన్ (Jagadamba Junction) వద్ద ఏర్పాటు చేసిన వారాహి సభ ఎంతో గుర్తుండిపోయేలా నిలిచింది. అయితే ఈసారి సభ వేదికగా విశాఖ దక్షిణ నియోజకవర్గంలోని ఇందిరా ప్రియదర్శిని స్టేడియం (Indira Priyadarshini Stadium) ను ఎంచుకున్నారు.

విశాఖ సౌత్ (Visakha South) లో గత ఎన్నికల్లో తొలిసారిగా జనసేన గెలిచింది. బలమైన సామాజిక వర్గానికి చెందిన వంశీ క్రిష్ణ శ్రీనివాస్ (Vamsi Krishna Srinivas) ఎమ్మెల్యేగా గెలవడమే కాకుండా ప్రస్తుతం ఆయన విశాఖ జిల్లా జనసేన అధ్యక్షుడిగా ఉన్నారు. ఈ నేపథ్యంలోనే ఆయన నియోజకవర్గంలోనే సభ జరగడం ప్రాధాన్యం సంతరించుకుంది. ఈ సభకు సంబంధించి పార్టీ నేతలు వారాలుగా ఏర్పాట్లను పర్యవేక్షిస్తున్నారు. పెద్ద సంఖ్యలో ప్రజలు తరలివచ్చే అవకాశం ఉండడంతో వారిని నియంత్రించడం సవాలుగా భావిస్తున్నారు.

ఇక పవన్ కళ్యాణ్ ఇప్పుడు కేవలం జనసేన అధినేత మాత్రమే కాదు, అధికారంలో భాగమైన ఉప ముఖ్యమంత్రి. కాబట్టి ఆయన ప్రసంగం ఎలా ఉండబోతోందో అన్నది పెద్ద చర్చగా మారింది. సభలో ఆయన ప్రజలను ఉద్దేశించి కూటమి ప్రభుత్వం గత పదిహేనునెలలుగా చేసిన అభివృద్ధి, సంక్షేమ కార్యక్రమాలను ప్రస్తావిస్తారని అంటున్నారు. అలాగే జనసేన పార్టీకి బలం చేకూరేలా వైసీపీ (YSRCP) పై కఠిన వ్యాఖ్యలు చేసే అవకాశం ఉందని అంచనా. అంతేకాక కూటమి ఐక్యత, భవిష్యత్తులో పొత్తుల దిశగా మరింత స్పష్టత ఇవ్వవచ్చని పార్టీ వర్గాలు చెబుతున్నాయి.

ఇదిలా ఉండగా, పవన్ విశాఖ పర్యటనపై ఇప్పటికే రాజకీయ వాతావరణం వేడెక్కింది. సుగాలీ ప్రీతి (Sugali Preethi) ఘటనను ఉద్దేశిస్తూ ఆమె తల్లి వీల్‌చైర్‌పై పాదయాత్ర ప్రకటించడం సంచలనం రేపింది. ఆ విషయం మీద పవన్ గతంలోనే స్పందించి వివరణ ఇచ్చినా, ఈ సభలో ఆయన మరోసారి స్పష్టంగా మాట్లాడతారని ఊహిస్తున్నారు. అదేవిధంగా విశాఖ ఉక్కు కర్మాగారం (Visakha Steel Plant) భవిష్యత్తు గురించి కూడా ఆయన ప్రస్తావించాల్సిందిగా కార్మిక సంఘాలు కోరుతున్నాయి. పవన్ ఈ అంశంపై తన వైఖరిని బహిరంగంగా ప్రకటిస్తారా అన్నదే ఇప్పుడు హాట్ టాపిక్.
మొత్తానికి పవన్ కళ్యాణ్ విశాఖ సభపై అందరి అంచనాలు పెరిగిపోయాయి. ఆయన పవర్‌ఫుల్‌గా మాట్లాడతారా లేక ఉప ముఖ్యమంత్రి హోదాకి తగ్గట్టుగా సమతుల్యంగా ప్రసంగిస్తారా అన్నదే ఇప్పుడు రాష్ట్రవ్యాప్తంగా చర్చనీయాంశంగా మారింది.