Pawan Kalyan: అధికారంలో ఏడాది..పవన్ మారిన శైలి, మారిన అభిప్రాయాలు

2024 ఎన్నికల్లో జనసేనాని పవన్ కళ్యాణ్ (Pawan Kalyan) ప్రజల పై చూపిన ప్రభావం తక్కువేమీ కాదు. ఓటింగ్ సమయంలో ఆయనే అసలైన మార్గదర్శిగా కనిపించారు. తెలుగుదేశం పార్టీ (TDP)కు బలంగా నిలిచి, బీజేపీ (BJP)తో కలిసిన కూటమి అధికారంలోకి రావడంలో కీలక పాత్ర పోషించారు. అప్పట్లో ప్రధాని నరేంద్ర మోదీ (Narendra Modi) కూడా పవన్‌ను “సునామీ” అంటూ ప్రశంసించటం మరువలేని ఘట్టం. జనసేన పోటీ చేసిన స్థానాల్లో విజయాలు రావటం ద్వారా పవన్ మీద ప్రజల్లో నమ్మకం మరింత పెరిగింది. హామీలను పాటిస్తానని చెప్పి, పాలనలో అవినీతి చోటు చేసుకోదని హామీలు ఇచ్చి ప్రజల గుండెల్లో స్థానం సంపాదించారు.

పట్టం కట్టిన తర్వాత పవన్ డిప్యూటీ సీఎం (Deputy CM)గా బాధ్యతలు చేపట్టారు. తొలినాళ్లలో ప్రజల సమస్యలపై స్పందిస్తూ మంచి పేరు తెచ్చుకున్నారు. తిరుమలలో (Tirumala) తొక్కిసలాట ఘటనపై క్షమాపణ చెప్పడం, హోంమంత్రిని ప్రజల ముందే ప్రశ్నించడం లాంటి ఘటనలు చురుకైన నాయకుడిగా పవన్‌ను నిలబెట్టాయి. కానీ కాలక్రమంలో ఆయన వైఖరి మారినట్లు కనిపించటం మొదలైంది. టీడీపీ నిర్ణయాలకు మద్దతు ఇస్తుండటంతో ఆయన పార్టీ కార్యకర్తలే అసహనం వ్యక్తం చేస్తున్నారు. ముఖ్యంగా, తన పార్టీ అభివృద్ధికి అవసరమైన చర్యలకు మార్గం వేయకపోవడం జనసేన అభిమానులను నిరాశకు గురిచేసింది.

కొన్ని ప్రాంతాల్లో జరిగిన సామాజిక అన్యాయాలపై పవన్ స్పందించకపోవడం కూడా ప్రశ్నార్థకంగా మారింది. పిఠాపురం (Pithapuram) లో దళితుల పై జరిగిన భేదభావం వంటి ఘటనలపై మౌనంగా ఉండటంపై విమర్శలు వెల్లువెత్తుతున్నాయి. ఇక సినిమా రంగంపై ఆయన వ్యాఖ్యలు కూడా కలకలం సృష్టించాయి. మరోవైపు లోకేష్ (Lokesh) ప్రభుత్వంలో తన ప్రాధాన్యత పెంచుకుంటూ ఉండగా, పవన్ మాత్రం తమ పార్టీకి బలోపేతం చేసే దిశగా సమావేశాలు కూడా నిర్వహించకపోవడం గమనార్హం.

భారీ ఆశలతో అధికారంలోకి వచ్చిన పవన్ కళ్యాణ్ ఏడాది తరువాత ప్రజలలో తటస్థ దృక్పథం ఏర్పడుతోంది. పార్టీ నామినేటెడ్ పదవుల్లో కార్యకర్తలకు తగిన గుర్తింపు రాకపోవడం, అవినీతిపై చర్యలు తీసుకోవడంలో విఫలత వంటి అంశాలు పవన్ పరిస్థితిని కష్టతరంగా మారుస్తున్నాయి. తాను తనకోసం కాదని, ప్రజల కోసం మాత్రమే పనిచేస్తున్నానన్న మాటలను కొనసాగించాలంటే ముందుగా పార్టీకి ప్రాధాన్యత ఇవ్వాల్సిన అవసరం ఉంది. మిగిలిన నాలుగేళ్లలో ప్రజల నమ్మకాన్ని తిరిగి పొందగలరా అనేదే ఇప్పుడు కీలక ప్రశ్నగా మారింది..