Karnataka: కర్ణాటక ‘పవర్’ పాలిటిక్స్.. రాహుల్ ఎంట్రీ..!

కర్ణాటక (Karnataka) కాంగ్రెస్ (Congress) ప్రభుత్వంలో నాయకత్వ మార్పు అంశం మరోసారి తెరపైకి వచ్చి తీవ్ర దుమారం రేగుతున్న సంగతి తెలిసిందే. కొన్ని రోజులుగా ముఖ్యమంత్రి మార్పుపై జరుగుతున్న ప్రచారం, ఉప ముఖ్యమంత్రి డీకే శివకుమార్ (DK Siva Kumar) ఢిల్లీ పర్యటనలు, ముఖ్యమంత్రి సిద్ధరామయ్య మౌనం.. ఇవన్నీ బెంగళూరు నుంచి ఢిల్లీ వరకు రాజకీయ వేడిని పెంచాయి. ముఖ్యంగా ఈ వ్యవహారంలో కాంగ్రెస్ అగ్రనేత రాహుల్ గాంధీ (Rahul Gandhi) నేరుగా రంగంలోకి దిగడం, డీకే శివకుమార్‌కు పంపిన సందేశం ఇప్పుడు హాట్ టాపిక్‌గా మారింది.

ముఖ్యమంత్రి పీఠంపై కన్నేసిన డీకే శివకుమార్, రాహుల్ గాంధీ విదేశీ పర్యటనలో ఉన్న సమయంలోనే ఆయనను సంప్రదించేందుకు తీవ్రంగా ప్రయత్నించినట్లు సమాచారం. అధిష్ఠానం వద్ద తన వాదనను బలంగా వినిపించేందుకు డీకే సిద్ధమయ్యారు. అయితే, రాహుల్ గాంధీ నుంచి వచ్చిన స్పందన ఆసక్తికరంగా ఉంది. “కాస్త వేచి ఉండండి.. నేనే మీకు కాల్ చేస్తాను (Wait, I will call you)” అని రాహుల్ మెసేజ్ పంపినట్లు పార్టీ వర్గాలు చెబుతున్నాయి. ఈ ఒక్క సందేశం కర్ణాటక రాజకీయాల్లో అనేక చర్చలకు దారితీసింది. ఇది డీకే శివకుమార్‌ను శాంతింపజేయడానికా? లేక నాయకత్వ మార్పుపై అధిష్ఠానం ఇంకా ఒక నిర్ణయానికి రాలేదని సూచించడానికా? అనే ప్రశ్నలు తలెత్తుతున్నాయి. రాహుల్ గాంధీ ప్రస్తుతం తొందరపాటు నిర్ణయాలకు దూరంగా ఉంటూ, అన్ని వర్గాల అభిప్రాయాలను పరిగణనలోకి తీసుకుంటున్నారని విశ్లేషకులు భావిస్తున్నారు.

బయటకు సిద్ధరామయ్యే ఐదేళ్లు సీఎంగా ఉంటారని చెబుతున్నప్పటికీ, డీకే శివకుమార్ అంతర్గతంగా తన ప్రయత్నాలను ముమ్మరం చేశారు. తాజా సమాచారం ప్రకారం, ఆయన మరోసారి ఢిల్లీ వెళ్లేందుకు సిద్ధమయ్యారు. రాహుల్ గాంధీతో పాటు, పార్టీ అగ్రనేత సోనియా గాంధీని వ్యక్తిగతంగా కలిసి, గతంలో జరిగిన ఒప్పందాలను గుర్తు చేసే అవకాశం ఉందని తెలుస్తోంది. రాహుల్ గాంధీ జోక్యంతో ఈ భేటీకి ప్రాధాన్యం సంతరించుకుంది.

మరోవైపు, ముఖ్యమంత్రి సిద్ధరామయ్య తనదైన శైలిలో పావులు కదుపుతున్నారు. నాయకత్వ మార్పుపై వస్తున్న వార్తలు పాలనపై ప్రభావం చూపుతున్నాయని, కావున ఈ ఊహాగానాలకు తక్షణమే ముగింపు పలకాలని ఆయన అధిష్ఠానానికి విజ్ఞప్తి చేశారు. తనపై వస్తున్న ముడా (MUDA) కుంభకోణం ఆరోపణలను ఎదుర్కొంటూనే, పార్టీలో తన పట్టు నిలుపుకునేందుకు ఆయన ప్రయత్నిస్తున్నారు. సిద్ధరామయ్య వర్గం మాత్రం పూర్తి కాలం ఆయనే సీఎంగా ఉంటారని బల్లగుద్ది చెబుతోంది.

కర్ణాటక కాంగ్రెస్‌లో నెలకొన్న ఈ సందిగ్ధతకు డిసెంబర్ 1 లోపు ఒక పరిష్కారం లభించే అవకాశం ఉంది. పార్టీ జాతీయ అధ్యక్షుడు మల్లికార్జున ఖర్గే, రాహుల్ గాంధీ త్వరలో ప్రత్యేకంగా సమావేశమై కర్ణాటక అంశంపై చర్చించనున్నారు. ప్రస్తుత పరిస్థితుల్లో కాంగ్రెస్ అధిష్ఠానం ముందు రెండు ప్రధాన సవాళ్లు ఉన్నాయి. సిద్ధరామయ్యను తప్పిస్తే వెనుకబడిన వర్గాల ఓటు బ్యాంకుపై ప్రభావం పడుతుందనే ఆందోళన కలుగుతుంది. ఎన్నికల విజయంలో కీలక పాత్ర పోషించిన డీకే శివకుమార్‌ను విస్మరిస్తే, పార్టీలో అంతర్గత కుమ్ములాటలు పెరిగే ప్రమాదముంది.

మొత్తానికి, రాహుల్ గాంధీ ఎంట్రీతో కర్ణాటక రాజకీయాలు క్లైమాక్స్‌కు చేరాయి. “నేను కాల్ చేస్తాను” అని రాహుల్ చెప్పిన మాట, డీకే శివకుమార్‌కు పిలుపునిస్తుందా లేక యథాతథ స్థితిని (Status Quo) కొనసాగిస్తుందా అనేది వేచి చూడాలి.