Putin-Modi: మోడీ గ్రేట్ లీడర్.. పుతిన్ ప్రశంసల జల్లు…

రష్యా అధ్యక్షుడు పుతిన్ (Putin) .. భారత ప్రధాని మోడీపై ప్రశంసల జల్లు కురిపించారు. రెండు రోజుల శిఖరాగ్ర సదస్సు సందర్భంగా ఢిల్లీ లో పర్యటన సందర్భంగా.. వ్లాదిమిర్ పుతిన్, మోడీపై ఈ వ్యాఖ్యలు చేశారు. మోడీ ఎవరి ఒత్తిళ్లకూ సులభంగా తలొగ్గరని, ఆయన నాయకత్వాన్ని చూసి భారత ప్రజలు గర్వపడాలని వ్యాఖ్యానించారు. భారత్-రష్యా బంధం ఏ మూడో దేశానికీ వ్యతిరేకం కాదని, కేవలం ఇరు దేశాల జాతీయ ప్రయోజనాల ఆధారంగానే తమ భాగస్వామ్యం కొనసాగుతోందని పుతిన్ స్పష్టం చేశారు.

ప్రధాని మోదీతో భేటీకి కొన్ని గంటల ముందు ఓ ప్రముఖ మీడియా సంస్థకు ఇచ్చిన ఇంటర్వ్యూలో పుతిన్ ఈ కీలక వ్యాఖ్యలు చేశారు. “కొన్ని బాహ్య శక్తుల నుంచి ఒత్తిళ్లు ఎదురవుతున్నప్పటికీ, నేనూ, ప్రధాని మోడీ… ఎప్పుడూ ఎవరికీ వ్యతిరేకంగా పనిచేయాలని భావించలేదు. మా లక్ష్యాలు వేరు. ఇరు దేశాల ప్రయోజనాలను కాపాడుకోవడంపైనే మా దృష్టి ఉంటుంది” అని పుతిన్ వివరించారు.

ఇంధన రంగంలో భారత్‌తో పెరుగుతున్న సహకారాన్ని చూసి కొందరు ప్రపంచ ఆటగాళ్లు అసంతృప్తితో ఉన్నారని ఆయన అమెరికాను దృష్టిలో పెట్టుకుని వ్యాఖ్యానించారు. ఆంక్షలు ఉన్నప్పటికీ ఇరు దేశాల మధ్య ఇంధన సహకారం స్థిరంగా కొనసాగుతోందన్నారు. వాణిజ్య లావాదేవీలు కూడా ఎక్కువగా పాశ్చాత్య బ్యాంకింగ్ వ్యవస్థలకు దూరంగా, జాతీయ కరెన్సీలలోనే జరుగుతున్నాయని తెలిపారు.

“ప్రధాని మోడీ …..దేశం ముందు, తన ముందు చాలా సవాలుతో కూడిన లక్ష్యాలను నిర్దేశించుకుంటారు. ఆయన వైఖరి ఎంతో నిక్కచ్చిగా ఉంటుంది. దశాబ్దాల క్రితం చూసినట్టుగా ఇప్పుడు ఎవరూ భారత్‌ను చూడలేరు” అని పుతిన్ అన్నారు. ఉక్రెయిన్ సంక్షోభంపై మాట్లాడుతూ అమెరికా ఇప్పుడు చర్చల మార్గాన్ని అన్వేషిస్తున్నట్లు తనకు అనిపిస్తోందని అభిప్రాయపడ్డారు.