Congress: ఇక కాంగ్రెస్ కోలుకోవడం కష్టమేనా..!?

దేశవ్యాప్తంగా ఆసక్తి రేపిన బీహార్ అసెంబ్లీ ఎన్నికల (Bihar Assembly Elections) పోలింగ్ ముగిసింది. ఆ వెంటనే ఎగ్జిట్ పోల్స్ ఫలితాలు వెలువడ్డాయి. భారతీయ జనతా పార్టీ (BJP) నేతృత్వంలోని నేషనల్ డెమోక్రటిక్ అలయన్స్ (NDA) కూటమి ఈ ఎన్నికల్లో ఘన విజయం ఖాయమని సర్వేలు వెల్లడించాయి. ఈ ఫలితాలు కాంగ్రెస్ (Congress) నేతృత్వంలోని మహాఘట్‌బంధన్ (Maha Ghatbandhan) శిబిరంలో తీవ్ర నిరాశను నింపాయి. బీజేపీ హవా ముందు కాంగ్రెస్ నిలబడలేకపోయిందని ఎగ్జిట్ పోల్స్ అంచనాలు స్పష్టం చేస్తున్నాయి. ఎన్నికల ఫలితాలు నవంబర్ 14న తేలనున్నాయి.

ఎగ్జిట్ పోల్స్ ప్రకారం, బీహార్‌లో మరోసారి నితీష్ కుమార్ కుమార్ (Nithish Kumar) ముఖ్యమంత్రి అయ్యే అవకాశం ఉంది. బీజేపీ నేతృత్వంలోని ఎన్డీయే కూటమి అధికారం చేపట్టడం దాదాపు ఖాయంగా కనిపిస్తోంది. సుదీర్ఘ కాలంగా, అంటే 2005 నుంచి నితీష్ కుమార్ రాష్ట్రంలో అధికారంలో కొనసాగుతున్నారు. ఇన్నేళ్ల తర్వాత కూడా ఆయనపై లేదా ప్రభుత్వంపై చెప్పుకోదగిన స్థాయిలో ప్రభుత్వ వ్యతిరేకత (Anti-incumbency) లేకపోవడం రాజకీయ పరిశీలకులను సైతం ఆశ్చర్యానికి గురి చేస్తోంది. ఈ ఫలితాలు నితీష్ కుమార్ ముఖ్యమంత్రిగా తన పరంపరను కొనసాగించే అవకాశాలు మెండుగా ఉన్నాయని స్పష్టం చేస్తున్నాయి.

ఎన్డీయే కూటమిలో బీజేపీ సింగిల్ లార్జెస్ట్ పార్టీగా అవతరిస్తుందని సర్వేలు అంచనా వేస్తున్నాయి. ఈ ఫలితాలు నిజమైతే, రాష్ట్రంలో బీజేపీ హవాకు ఇక తిరుగులేనట్టే. ముఖ్యంగా ప్రధాని నరేంద్ర మోదీ గ్లామర్, ఛరిష్మా ముందు ప్రతిపక్ష నేత రాహుల్ గాంధీ నిలబడలేకపోతున్నట్టు అర్థమవుతోంది. రాహుల్ గాంధీ బీహార్ ఎన్నికల్లో పెద్ద ఎత్తున ప్రచారం చేసినప్పటికీ, ఆ ప్రభావం ఏమాత్రం చూపలేకపోయిందని ఎగ్జిట్ పోల్స్ తేటతెల్లం చేశాయి. ఇప్పటికే పలు ఎన్నికల్లో మోదీ ముందు రాహుల్ గాంధీ సక్సెస్ కాలేకపోయారు. బీహార్ ఎన్నికల్లో అది మరోసారి రుజవు అవుతోంది.

ప్రతిపక్ష కాంగ్రెస్ కూటమికి ఈ ఎగ్జిట్ పోల్స్ ఫలితాలు గట్టి ఎదురుదెబ్బగా పరిణమించాయి. మహాఘట్బంధన్ కూటమికి ఓటమి తప్పదని దాదాపు అన్ని సర్వేలు వెల్లడించాయి. ముఖ్యంగా, కాంగ్రెస్ పార్టీ పరిస్థితి ఏమాత్రం మెరుగుపడలేదని సర్వేలు తేల్చి చెప్పాయి. రాహుల్ గాంధీ రాష్ట్రంలో విస్తృత ప్రచారం చేసినా, అది పార్టీకి ఓట్లుగా మళ్లించడంలో విఫలమైందని స్పష్టమైంది.

నూతనంగా ప్రారంభమైన జన్ సురాజ్ పార్టీ ఈ ఎన్నికల్లో కాంగ్రెస్ కంటే ఎక్కువ ఓటింగ్ శాతం సాధించే అవకాశం ఉందని పలు సర్వేలు అంచనా వేశాయి. ఇది కాంగ్రెస్ పార్టీకి తీవ్ర ఆందోళన కలిగించే అంశం. ఈ ఓటింగ్ శాతాలు, సీట్ల అంచనాలు నిజమైతే, కాంగ్రెస్ పార్టీ ఇక కోలుకోవడం కష్టమని, దాని ఉనికి మరింత ప్రశ్నార్థకమవుతుందని విశ్లేషణలు వెలువడుతున్నాయి. బీహార్‌లో ప్రతిపక్ష కూటమి అంచనాలకు తగ్గట్టుగా రాణించలేక, రాష్ట్రంలో తమ పట్టును కోల్పోయినట్టు ఎగ్జిట్ పోల్స్ ద్వారా తెలుస్తోంది.

ఈ ఎగ్జిట్ పోల్స్ అంచనాలు ఎంతవరకు నిజమవుతాయనే విషయం నవంబర్ 14న ఎన్నికల ఫలితాలు వెలువడిన తర్వాతే తేలనుంది. ప్రస్తుతం ఎన్డీయే కూటమి, ముఖ్యంగా బీజేపీ, అత్యంత ఉత్సాహంగా ఉండగా, కాంగ్రెస్ కూటమి మాత్రం నిరాశలో ఉంది. ఏదేమైనా, ఎగ్జిట్ పోల్స్ బీహార్ రాజకీయాల్లో మోదీ-నితీష్ ద్వయం శక్తిని మరోసారి నిరూపించాయని, బలమైన ప్రత్యామ్నాయంగా కాంగ్రెస్ కూటమి తమను తాము నిరూపించుకోలేకపోయిందని స్పష్టం చేశాయి.