Prasant Kishor: 2 గంటల్లో 11 కోట్లు..! దటీజ్ ప్రశాంత్ కిశోర్..!!

మన దేశ రాజకీయాల్లో కింగ్ మేకర్ గా పేరొందారు ప్రశాంత్ కిశోర్ (Prasant Kishor). ఎన్నికల స్ట్రాటజిస్ట్ గా ఆయన సుపరిచితులు. ఎన్నో రాజకీయ పార్టీలను అధికారంలోకి తీసుకొచ్చిన ఘనత ఆయనకు ఉంది. అయితే ఇప్పుడాయన స్ట్రాటజిస్ట్ సేవలు మానేసి రాజకీయ పార్టీ పెట్టుకున్నారు. బీహార్ (Bihar)లో అధికారంలోకి వచ్చేందుకు శతవిధాలా ప్రయత్నిస్తున్నారు. రాజకీయాల్లో విమర్శలు, ఆరోపణలు సహజం. ఇప్పుడు ప్రశాంత్ కిశోర్ కూడా పొలిటీషియన్ కాబట్టి ఆయన్ను కూడా చాలా మంది విమర్శిస్తున్నారు. రాజకీయ పార్టీ పెట్టేంత డబ్బు ప్రశాంత్ కిశోర్ కు ఎలా వచ్చిందని ప్రశ్నిస్తున్నారు. దీంతో ఆయన ప్రత్యర్థుల ప్రశ్నలకు సమాధానాలు ఇవ్వాల్సి వచ్చింది. అందులో భాగంగా ఆయన చెప్పిన సమాధానాలు ఇప్పుడు అందరినీ ఆశ్చర్యానికి గురి చేస్తున్నాయి.

ప్రశాంత్ కిశోర్ సంపాదన మూలాల బయటపెట్టాలని బీజేపీ నేతలు ఈ మధ్య సవాల్ విసిరారు. దీంతో ప్రశాంత్ కిశోర్ నోరు విప్పక తప్పలేదు. తాను మూడు సంవత్సరాల్లో 241 కోట్ల రూపాయలు సంపాదించానని, వాటిలో 98.5 కోట్లు తన జనసురాజ్ పార్టీకి విరాళం ఇచ్చానని ప్రశాంత్ కిశోర్ వెల్లడించారు. ఒక ప్రొడక్ట్ లాంచ్‌కు అవసరమైన సలహా ఇచ్చేందుకు రెండు గంటల సమయానికి 11 కోట్లు ఫీజు వసూలు చేశినట్లు చెప్పారు. దీంతో అందరూ ఆశ్చర్యానికి గురయ్యారు. ఎన్నికల స్ట్రాటజీ విలువేంటో ఆ ఫీజును బట్టి అర్థమవుతోంది.

ప్రశాంత్ కిశోర్ రాజకీయాల్లోకి ప్రవేశించడానికి ముందు యూనైటెడ్ నేషన్స్‌లో పనిచేశారు. 2011లో I-PACను స్థాపించారు. ఎన్నికల స్ట్రాటజీలతో దేశవ్యాప్తంగా పేరు తెచ్చుకున్నారు. 2014 లోక్‌సభ ఎన్నికల్లో మోదీకి క్యాంపెయిన్ చేశారు. తర్వాత కాంగ్రెస్, వైయస్ఆర్ కాంగ్రెస్, ఆప్, డీఎంకే, టీఆర్ఎస్‌, టీడీపీలకు సలహాలు ఇచ్చారు. 2020 బిహార్ అసెంబ్లీ ఎన్నికల్లో తీస్తా మొర్చా పేరుతో కాంగ్రెస్-ఆర్జేడీ అలయన్స్‌కు స్ట్రాటజీ ఇచ్చారు. అయితే, ఎన్నికల తర్వాత ఆయన రాజకీయ పార్టీ పెట్టాలని నిర్ణయించుకున్నారు. 2022 అక్టోబర్‌లో జనసురాజ్ అభియాన్ ప్రారంభించారు. త్వరలో జరగబోయే ఎన్నికల్లో 243 సీట్లకు పోటీ పడటానికి సిద్ధమవుతున్నారు.

ఈ నేపథ్యంలో బీజేపీ ఎంపీ ప్రవేశ్ జైన్ జనసురాజ్ పార్టీ ఫండింగ్‌పై ప్రశ్నలు లేవనెత్తారు. ప్రశాంత్ కిశోర్‌కు డబ్బు ఎక్కడి నుంచి వస్తోంది? షెల్ కంపెనీల ద్వారా డబ్బు తెస్తున్నారా అని ఎక్స్ లో పోస్ట్ చేశారు. ఇది చర్చనీయాంశంగా మారింది. దీనిపై ప్రశాంత్ కిశోర్ స్పందించారు. “నేను దొంగ కాదు, నా సంపాదన అందరి ముందు ఉంచడానికి సిద్ధంగా ఉన్నాను” అని చెప్పారు. 2021-22 నుంచి 2023-24 వరకు తన పర్సనల్ అకౌంట్లు, సంస్థల ద్వారా 241 కోట్ల రూపాయలు కన్సల్టెన్సీ ఫీజులుగా వసూలు చేశానని వెల్లడించారు. వాటిలో 31 కోట్లు జీఎస్‌టీగా, 20 కోట్లు ఇన్‌కమ్ ట్యాక్స్‌గా చెల్లించానన్నారు. మిగిలిన 98.5 కోట్లు జనసురాజ్ పార్టీకి దానంగా ఇచ్చానని స్పష్టం చేశారు. “ఇది షెల్ కంపెనీల ద్వారా వచ్చిన డబ్బు కాదు, నా ప్రొఫెషనల్ సర్వీసెస్ ద్వారా వచ్చినది” అని తేల్చి చెప్పారు. నవయుగా కన్‌స్ట్రక్షన్ కంపెనీ ప్రొడక్ట్ లాంచ్‌కు రెండు గంటలపాటు సలహా ఇచ్చినందుకు 11 కోట్లు ఛార్జ్ చేసినట్లు ప్రశాంత్ కిశోర్ చెప్పారు. బిహార్ కు చెందిన ఓ వ్యక్తి ఏ స్థాయికి ఎదిగారో చెప్పేందుకు ఇది నిదర్శనం అన్నారు.

బిహార్ రాజకీయాల్లో ఎలాగైనా సత్తా చాటాలని ప్రశాంత్ కిశోర్ భావిస్తున్నారు. తన స్ట్రాటజీల ద్వారా ఎంతోమందిని అధికారంలోకి తీసుకొచ్చిన ఘనత ప్రశాంత్ కిశోర్ ది. కానీ ఇప్పుడు ఆయన అధికారంలోకి రావాలని కలలు కంటున్నారు. ఇందుకోసం ఆయన ఎలాంటి స్ట్రాటజీలు అమలు చేస్తారనేది ఆసక్తిగా మారింది. ఇప్పటికే 10వేల మంది జనసురాజ్ కార్యకర్తలకు శిక్షణ ఇచ్చి గ్రామాల్లో పాదయాత్రలు చేయిస్తున్నారు. ప్రభుత్వ వైఫల్యాలను ప్రజల్లోకి తీసుకెళ్తున్నారు. ప్రజల్లో అసంతృప్తి, యువతకు ఉద్యోగాలు, వ్యవసాయ సమస్యలపై ప్రశాంత్ కిశోర్ ఎక్కువగా ఫోకస్ చేస్తున్నారు. వచ్చే ఎన్నికల్లో ప్రశాంత్ కిశోర్ పార్టీ కూడా కీలకంగా మారుతుందని సర్వేలు చెప్తున్నాయి.