Vice President: బీజేపీ నుంచే ఉప రాష్ట్రపతి అభ్యర్థి..? రేసులో రాజ్‌నాథ్, నడ్డా, చౌహాన్..!

జగదీప్ ధన్‌ఖడ్ (Jagdeep Dhankar) ఉపరాష్ట్రపతి (Vice President) పదవి నుంచి ఆకస్మికంగా రాజీనామా చేయడంతో కొత్త ఉపరాష్ట్రపతి ఎన్నికపై రాజకీయ చర్చలు ఊపందుకున్నాయి. ఈ నేపథ్యంలో భారతీయ జనతా పార్టీ (BJP) తమ పార్టీ నుంచే అభ్యర్థిని నిలిపేందుకు సిద్ధమవుతోంది. బీజేపీ తమ నిర్ణయాన్ని ఎన్డీఏ భాగస్వామ్య పక్షాలకు ఇప్పటికే తెలియజేసినట్లు సమాచారం. ఈ పరిణామంతో JDU అధినేత నితీష్ కుమార్ (Nitish Kumar), కాంగ్రెస్ ఎంపీ శశి థరూర్ (Sashi Tharoor) వంటి పార్టీయేతర నేతలకు ఉపరాష్ట్రపతి అవకాశం లేనట్లేనని బీజేపీ స్పష్టం చేసింది. రక్షణ శాఖ మంత్రి రాజ్‌నాథ్ సింగ్ (Rajnath Singh), బీజేపీ జాతీయ అధ్యక్షుడు జేపీ నడ్డా (JP Nadda) , కేంద్ర మంత్రి శివరాజ్ సింగ్ చౌహాన్ (Shivraj Singh Chouhan) పేర్లు ఉపరాష్ట్రపతి రేసులో ప్రముఖంగా వినిపిస్తున్నాయి.

పార్టీ సిద్ధాంతానికి కట్టుబడి ఉండే సీనియర్ నాయకుడిని ఉపరాష్ట్రపతి పదవికి ఎంపిక చేయాలని బీజేపీ నిర్ణయించినట్లు సమాచారం. దీంతో బీహార్ ముఖ్యమంత్రి, ఆర్జీడీ నేత నితీష్ కుమార్‌ను ఉపరాష్ట్రపతిగా నిలిపే అవకాశం లేదని బీజేపీ స్పష్టం చేసింది. గతంలో నితీష్ కుమార్ పేరు తెరపైకి వచ్చినప్పటికీ, బీజేపీ ఈ ప్రతిపాదనను తోసిపుచ్చింది. బీజేపీ ఎమ్మెల్యే హరిభూషణ్ ఠాకూర్ బచౌల్, బీహార్ మంత్రి నీరజ్ కుమార్ సింగ్ బబ్లూ వంటి నాయకులు నితీష్‌ను ఉపరాష్ట్రపతిగా చూడాలని కోరుకున్నప్పటికీ, పార్టీ అధిష్ఠానం ఈ ఆలోచనను కొట్టిపారేసింది. అలాగే, కాంగ్రెస్ ఎంపీ శశి థరూర్ పేరు కూడా సోషల్ మీడియాలో చర్చనీయాంశమైంది. ఆపరేషన్ సిందూర్‌లో భాగంగా థరూర్ మోదీ ప్రభుత్వంతో సన్నిహితంగా పనిచేయడం వల్ల ఆయన పేరు తెరపైకి వచ్చినప్పటికీ, బీజేపీ ఈ అవకాశాన్ని తిరస్కరించింది.

జగదీప్ ధన్‌ఖడ్ రాజీనామా చేసిన నేపథ్యంలో, ఎన్నికల సంఘం ఉపరాష్ట్రపతి ఎన్నికకు సన్నాహాలు ప్రారంభించింది. భారత రాజ్యాంగంలోని ఆర్టికల్ 92 ప్రకారం, ఉపరాష్ట్రపతి లేని సమయంలో రాజ్యసభ డిప్యూటీ ఛైర్మన్ లేదా హౌస్ నియమించిన సభ్యుడు రాజ్యసభ కార్యకలాపాలను నిర్వహిస్తారు. ప్రస్తుతం రాజ్యసభ డిప్యూటీ ఛైర్మన్ హరివంశ్ నారాయణ్ సింగ్ ఈ బాధ్యతలను నిర్వహిస్తున్నారు. ఎన్నికల సంఘం జులై 23న ఎన్నికల షెడ్యూల్‌ను త్వరలో ప్రకటించనున్నట్లు తెలిపింది. ఈ ఎన్నికలో పార్లమెంటు రెండు సభల సభ్యులు (లోక్‌సభ 543, రాజ్యసభ 245) ఓటు వేస్తారు. ప్రస్తుతం ఎన్డీఏ కూటమికి 293 మంది ఎంపీల మద్దతు ఉండటంతో ఎన్డీఏ అభ్యర్థి గెలుపు ఖాయం.

ఉపరాష్ట్రపతి రేసులో రాజ్‌నాథ్ సింగ్, జేపీ నడ్డా, శివరాజ్ సింగ్ చౌహాన్ పేర్లు ప్రముఖంగా వినిపిస్తున్నాయి. రాజ్‌నాథ్ సింగ్, గతంలో హోం మంత్రిగా, బీజేపీ అధ్యక్షుడిగా కీలక బాధ్యతలు నిర్వర్తించిన అనుభవజ్ఞుడు. 2022లో జరిగిన ఉపరాష్ట్రపతి ఎన్నికల సమయంలో కూడా ఆయన పేరు తెరపైకి వచ్చింది. జేపీ నడ్డా, ప్రస్తుత బీజేపీ జాతీయ అధ్యక్షుడిగా ఉన్నారు. వీళ్లిద్దరూ ప్రధానమంత్రి నరేంద్ర మోదీ, హోం మంత్రి అమిత్ షాతో సన్నిహిత సంబంధాలు కలిగి ఉన్నారు. ఈ ఇద్దరితో పాటు శివరాజ్ సింగ్ చౌహాన్ పేరు కూడా ప్రముఖంగా వినిపిస్తోంది. అయితే చౌహాన్ ను జాతీయాధ్యుడిగా నియమించే అవకాశం ఉందని సమాచారం.

ప్రధానమంత్రి నరేంద్ర మోదీ జులై 26న యూకే, మాల్దీవుల పర్యటన నుంచి తిరిగి వచ్చిన తర్వాత ఎన్డీఏ అభ్యర్థిపై మరింత స్పష్టత వచ్చే అవకాశం ఉంది. ప్రస్తుత వర్షాకాల సమావేశాల్లో ఉపరాష్ట్రపతి ఎన్నిక జరిగే అవకాశం లేదని, ఈ ఎన్నిక కోసం ప్రత్యేక సమావేశాలు నిర్వహించే యోచనలో ఎన్నికల సంఘం ఉన్నట్లు తెలుస్తోంది. రాజ్యాంగం ప్రకారం, ఉపరాష్ట్రపతి ఎన్నిక 60 రోజుల్లోపు పూర్తి కావాల్సి ఉంటుంది. అంటే సెప్టెంబర్ 19 నాటికి కొత్త ఉపరాష్ట్రపతి ఎన్నికై ఉండాలి.