TVK Vijay: విజయ్‌కి షాక్ ఇచ్చిన మద్రాస్ హైకోర్ట్..!

తమిళనాడులోని కరూర్ జిల్లాలో నటుడు, టీవీకే పార్టీ అధినేత విజయ్ (TVK Vijay) నిర్వహించిన ప్రచార ర్యాలీలో తొక్కిసలాట (stampede) జరిగి 41 మంది ప్రాణాలు కోల్పోయిన విషయం తెలిసిందే. ఈ ఘటనపై సీబీఐ (CBI) దర్యాప్తు కోరుతూ టీవీకే దాఖలు చేసిన పిటిషన్‌ను మద్రాస్ హైకోర్టు (మధురై బెంచ్) (Madras High Court) కొట్టివేసింది. ఈ సందర్భంగా న్యాయస్థానం టీవీకే పార్టీపైన, అధినేత విజయ్‌పైన తీవ్ర ఆగ్రహం వ్యక్తం చేసింది.

కరూర్ (Karur) ఘటనపై పోలీసుల దర్యాప్తు ఇంకా ప్రాథమిక దశలోనే ఉందని కోర్టు గుర్తు చేసింది. ఈ సమయంలోనే సీబీఐ దర్యాప్తు కోరడం సముచితం కాదని పేర్కొంది. కోర్టులను రాజకీయ వేదికలుగా మార్చవద్దని ధర్మాసనం టీవీకే పార్టీకి గట్టిగా హితవు పలికింది. ఇదే అంశంపై సీబీఐ దర్యాప్తు కోరుతూ బీజేపీ న్యాయవాది జీఎస్ మణి దాఖలు చేసిన మరో పిటిషన్‌ను కూడా కోర్టు తోసిపుచ్చింది.

ప్రజల భద్రతకు అత్యంత ప్రాధాన్యత ఇవ్వాలని కోర్టు ఈ సందర్భంగా స్పష్టం చేసింది. భవిష్యత్తులో రాజకీయ పార్టీలు నిర్వహించే బహిరంగ సభలు, సమావేశాల నిర్వహణపై కీలక మార్గదర్శకాలు జారీ చేసింది. సభలు, సమావేశాల్లో తాగునీరు, పారిశుద్ధ్య సౌకర్యాలు, అంబులెన్స్ వంటి ప్రాథమిక సౌకర్యాలను తప్పనిసరిగా ఏర్పాటు చేయాలని కోర్టు ఆదేశించింది. రాజకీయ ప్రయోజనాల కంటే ప్రజల ప్రాణాల రక్షణకే తొలి ప్రాధాన్యం ఇవ్వాలని సూచించింది. కోర్టు ఆదేశాల నేపథ్యంలో తమిళనాడు ప్రభుత్వం కీలక విషయాన్ని ధర్మాసనానికి తెలియజేసింది. బహిరంగ సభల నిర్వహణకు సంబంధించి స్టాండర్డ్ రూల్స్ రూపొందించే వరకు, హైవేలపై ఏ రాజకీయ పార్టీ సభలకు కూడా పోలీసులు అనుమతి ఇవ్వరని ప్రభుత్వం స్పష్టం చేసింది.

ఈ కేసులో నిందితుడిగా ఉన్న టీవీకే కార్యకర్త దాఖలు చేసిన బెయిల్ పిటిషన్‌ను కూడా కోర్టు కొట్టివేసింది. ఈ ఘటనకు సంబంధించి, ముందస్తు బెయిల్ కోరుతూ టీవీకే నమక్కల్ జిల్లా కార్యదర్శి సతీశ్ కుమార్ దాఖలు చేసిన పిటిషన్‌ను కూడా కోర్టు కొట్టివేసింది. ఈ సందర్భంగా ర్యాలీ సమయంలో భారీ జనసమూహాన్ని నియంత్రించడంలో పార్టీ ఎందుకు విఫలమైందని న్యాయమూర్తి ప్రశ్నించారు.

అయితే, తొక్కిసలాటలో బాధితులకు అదనపు పరిహారం కోరుతూ దాఖలైన మరో పిటిషన్‌పై అభిప్రాయాన్ని తెలియజేయాలని కోర్టు రాష్ట్ర ప్రభుత్వానికి నోటీసులు జారీ చేసింది. మొత్తంగా, కరూర్ తొక్కిసలాట ఘటనపై సీబీఐ దర్యాప్తు కోరుతూ టీవీకే చేసిన ప్రయత్నం విఫలం కాగా, న్యాయస్థానం మాత్రం భవిష్యత్తులో జరిగే బహిరంగ సభల నిర్వహణపై రాజకీయ పార్టీలకు, ప్రభుత్వానికి కీలకమైన ఆదేశాలు, మార్గదర్శకాలు జారీ చేయడం ప్రాముఖ్యత సంతరించుకుంది.