Donald Trump: విదేశీ విద్యార్థులే టార్గెట్.. వర్సిటీలకు ట్రంప్ సర్కార్ మరో షాక్..!

ట్రంప్ నేతృత్వంలోని అమెరికా సర్కార్… విదేశీ విద్యార్థులకు మరో షాకిస్తోంది. అయితే అది వయా యూనివర్సిటీల రూపంలో.. ప్రభుత్వం నిధులు కావాలంటే విదేశీ విద్యార్థుల (Foreign Students) అడ్మిషన్లను పరిమితం చేయాలని శ్వేతసౌధం (White House)విశ్వవిద్యాలయాలకు తేల్చిచెప్పింది. ఈమేరకు ప్రతిపాదించిన నిబంధనలను మెమో రూపంలో దేశంలోని టాప్‌ యూనివర్శిటీలకు పంపింది. ప్రభుత్వ నిధులు కావాలంటే విదేశీ విద్యార్థుల సంఖ్యపై పరిమితి, జాతి, లింగ ఆధారిత నియామకాలు నిలిపివేయడం, విద్యార్థుల అడ్మిషన్‌ సమయంలో కచ్చితంగా ప్రామాణిక పరీక్ష నిర్వహించడం వంటివి చేపడితేనే ప్రభుత్వ నిధుల కేటాయింపులో ప్రాధాన్యం లభిస్తుందని వెల్లడించింది. ఈ నిబంధనలను అంగీకరించిన విశ్వవిద్యాలయాలు ప్రభుత్వం నుంచి వచ్చే లబ్ధిని పొందవచ్చని ఆ లేఖలో వెల్లడించారు. వీటిల్లో విద్యార్థులకు ప్రభుత్వ రుణాలు, గ్రాంట్లు, కాంట్రాక్టులు, రీసెర్చి నిధులు, విదేశీ స్కాలర్స్‌కు వీసా అనుమతులు, ట్యాక్స్‌ కోడ్‌లో ప్రాధాన్యం వంటివి పొందవచ్చని పేర్కొంది.

అమెరికాలో ఉన్నతవిద్యను పునర్‌ వ్యవస్థీకరించి తమ భావజాలానికి అనుకూలంగా మార్చుకోవడానికి ట్రంప్‌(Donald Trump) కార్యవర్గం చేస్తున్న మరో యత్నంగా దీనిని భావిస్తున్నారు. హార్వర్డ్‌ విశ్వవిద్యాలయం ప్రభుత్వంతో 500 మిలియన్‌ డాలర్ల డీల్‌ చాలా దగ్గరగా ఉందని పేర్కొన్నారు. వైట్‌హౌస్‌ (White House) నుంచి లేఖలు అందుకొన్న వాటిలో అమెరికాలోని ఎంఐటీ సహా ప్రముఖ విశ్వవిద్యాలయాలు మొత్తం ఉన్నాయి.

ట్రంప్ సర్కార్ నిబంధనలు…

విదేశీ వీసాలపై వచ్చే విద్యార్థుల సంఖ్య 15 శాతానికి మించి ఉండకూడదు. ఒకే దేశం నుంచి వచ్చిన విద్యార్థుల సంఖ్య 5 శాతానికి మించకూడదు. విదేశాల నుంచి అందే నిధుల వివరాలను బహిర్గతం చేయాలి.విద్యార్థుల అడ్మిషన్‌, ఫైనాన్షియల్‌ ఎయిడ్‌ సమయంలో లింగ, జాతి, జాతీయత, రాజకీయ భావజాలం, జెండర్‌ ఐడెంటిటీ, లైంగిక ఆకర్షణ, మతపరమైన అంశాలు పరిగణనలోకి తీసుకోకూడదు.

అండర్‌ గ్రాడ్యుయేట్‌ దరఖాస్తుదారులు కచ్చితంగా SAT లేదా ACT వంటి ప్రామాణిక పరీక్షను పూర్తిచేయాల్సిందే. విద్యా స్వేచ్ఛను కాపాడే విధానాలు అమలుచేయాలి. సంప్రదాయవాద ఆలోచన సరళిని ఇబ్బందిపెట్టే, దాడులకు పాల్పడే యూనిట్స్‌ను తొలగించడం.విద్యాలయాలను ఇబ్బందిపెట్టేలా రాజకీయ ప్రదర్శనలు, విద్యార్థులను లేదా గ్రూపులను వేధించకుండా చర్యలు చేపట్టాలి.

ఉద్యోగులు అధికారిక విధుల సమయంలో రాజకీయ ప్రసంగాలు, చర్యలకు దూరంగా ఉండాలి. బాత్‌రూమ్‌లు, లాకర్‌ రూమ్‌లు లింగ ఆధారంగా వేర్వేరుగా ఉండాలి. హార్డ్‌సైన్స్‌ విద్యను అభ్యసించే విద్యార్థులకు ఉచిత ట్యూషన్‌ ఫీజ్‌, ప్రోత్సాహకం కింద 2 మిలియన్‌ డాలర్లు మించి ఇవ్వాలని ప్రతిపాదించారు.ఈ నిబంధనలు ఏమేరకు అమలుచేస్తున్నారనే అంశాన్ని జస్టిస్‌ డిపార్ట్‌మెంట్‌ ప్రిన్సిపల్స్‌ను సమీక్షించి తెలుసుకొంటుంది. వీటిని ఉల్లంఘిస్తే ప్రభుత్వ లబ్ధిని రెండేళ్లపాటు ఆపేస్తారు.