Shani Trayodashi: శివ-కేశవులకు అత్యంత ప్రీతిపాత్రమైన శని త్రయోదశి.. ఏలినాటి శని ప్రభావం తగ్గాలంటే!

హైదరాబాద్:  భారతీయ జ్యోతిష్య శాస్త్రం ప్రకారం, శనీశ్వరుడిని ‘కర్మ ఫల ప్రదాత’గా, న్యాయాధికారిగా కొలుస్తారు. మనం చేసే మంచి చెడుల ఫలితాలను అందించే ఈ దేవుడి అనుగ్రహం పొందేందుకు ‘శని త్రయోదశి’ అత్యంత అనుకూలమైన రోజు. శనివారం, త్రయోదశి తిథి కలిసిన ఈ అరుదైన సమయం శివుడికి, విష్ణువుకు, శనిదేవుడికి ముగ్గురికీ అత్యంత ప్రీతిపాత్రమైనది. 2026 సంవత్సరపు తొలి శని త్రయోదశి జనవరి 31న రావడం విశేషం.

తిథి, సమయ వివరాలు:

త్రయోదశి ప్రారంభం: జనవరి 30, శుక్రవారం ఉదయం 11:09 గంటలకు.

త్రయోదశి ముగింపు: జనవరి 31, శనివారం ఉదయం 08:26 గంటలకు. శాస్త్రోక్తంగా ‘ఉదయ తిథి’ ప్రాధాన్యతను బట్టి జనవరి 31, శనివారం రోజే భక్తులు ఈ పర్వదినాన్ని జరుపుకోవాలి. సూర్యోదయ సమయానికి త్రయోదశి తిథి ఉండటం వల్ల ఆ రోజు చేసే పూజలకు అత్యంత శక్తి ఉంటుందని పండితులు చెబుతున్నారు.

దోష నివారణ – ఆధ్యాత్మిక ఫలితాలు: ముఖ్యంగా ఏలినాటి శని, అష్టమ శని, అర్ధాష్టమ శని వంటి దశల ద్వారా తీవ్ర ఇబ్బందులు, అనారోగ్యం, ఆర్థిక సంక్షోభం ఎదుర్కొంటున్న వారికి ఈ రోజు ఒక వరం.

• ఆయురారోగ్యాలు: దీర్ఘకాలిక వ్యాధుల నుండి ఉపశమనం లభిస్తుంది.
• ఆర్థికాభివృద్ధి: రుణ బాధలు తొలగి, ఆదాయ మార్గాలు మెరుగుపడతాయి.
• శాంతి: కుటుంబంలో కలహాలు తగ్గి, మానసిక ప్రశాంతత సిద్ధిస్తుంది.

ఆచరించాల్సిన  పూజా విధులు:

అశ్వత్థ ప్రదక్షిణ: శనివారం రోజున శ్రీమహాలక్ష్మి, నారాయణుడు అశ్వత్థ వృక్షం (రావి చెట్టు) పై కొలువై ఉంటారు. అందుకే ఈ రోజు రావి చెట్టుకు 11 లేదా 108 ప్రదక్షిణలు చేయడం వల్ల పితృ దోషాలు కూడా తొలగుతాయి.

నువ్వుల నూనె దీపం: శని దేవుడి ఆలయంలో లేదా రావి చెట్టు కింద నువ్వుల నూనెతో దీపారాధన చేయాలి.

నైవేద్యం, దానం: నల్ల నువ్వులు కలిపిన అన్నాన్ని కాకులకు నైవేద్యంగా పెట్టాలి. అలాగే పేదలకు నల్లని వస్త్రాలు, గొడుగు లేదా పాదరక్షలను దానం చేయడం ద్వారా శని దేవుడు శాంతిస్తాడు.

శ్లోక పఠనం: రోజంతా వీలైనన్ని సార్లు ‘శని గాయత్రి’ లేదా ‘శని స్తోత్రాన్ని’ పఠించడం మేలు చేస్తుంది.

శని ఆలయానికి వెళ్ళినప్పుడు దర్శనం ముగించుకుని బయటకు వచ్చేటప్పుడు వెనక్కి తిరిగి చూడకూడదు. ఇది శని ప్రభావం మళ్ళీ పడకుండా ఉంటుందని పెద్దల నమ్మకం.