Charan Preet Singh : ఆస్ట్రేలియాలో భారత విద్యార్థిపై దాడి

ఆస్ట్రేలియాలో ఓ భారతీయ విద్యార్థిపై కొందరు దుండగులు దాడికి పాల్పడ్డారు. దీంతో తీవ్ర గాయాలపాలైన ఆ విద్యార్థి ఆసుపత్రిలో చేరాడు. ఈ నెల 19న ఆడిలైడ్‌ (Adelaide)లో జరిగిన ఈ ఘటన ఆలస్యంగా  వెలుగు లోకి వచ్చింది. భారత్‌కు చెందిన చరణ్‌ ప్రీత్‌ సింగ్‌ (Charan Preet Singh)  తన భార్యతో కలిసి బయటకు వెళ్లాడు. ఈ క్రమంలో తమ కారును ఓ పక్కన పార్క్‌ చేసిన నడుస్తుండగా, ఐదుగురు దుండగులు వేరే వాహనం లో  అక్కడికి వచ్చి చరణ్‌పై భౌతిక దాడికి దిగారు. పదునైన వస్తువులతో కొడుతూ అతన్ని దూషించారు.ఈ ఘటనలో చరణ్‌ ముఖం, వెనక భాగాల్లో తీవ్ర గాయాలయ్యాయి. అపస్మారక స్థితిలో ఉన్న అతడినిక స్థానికులు ఆసుపత్రి (Hospital) లో చేర్పించి చికిత్స అందించారు. ఈ ఘటనకు సంబంధించిన దృశ్యాలను ఎవరో వీడియో తీసి సామాజిక మాధ్యమాల్లో పోస్టు పెట్టారు. కారు పార్కింగ్‌ కారణంగానే  వివాదం జరిగిందని ప్రత్యక్ష సాక్షులు పేర్కొన్నట్లు  తెలిసింది. ఈ దాడి తనను కలచి వేసిందని, ఇలాంటి జరిగినప్పుడు భారత్‌కు తిరిగి వెళ్లిపోవాలనిపిస్తుందని చరణ్‌ పేర్కొన్నాడు. మరోవైపు దాడికి  పాల్పడిన దుండగుల్లో 20 ఏళ్ల వ్యక్తిని అదుపులోకి తీసుకున్నట్లు పోలీసులు (Police) తెలిపారు. సీసీటీవీ (CCTV)  దృశ్యాల ఆధారంగా మిగిలిన వారిని కూడా పట్టుకునేందుకు ప్రయత్నాలు చేస్తున్నామన్నారు.