అమెరికాలో ఏపీ వాసికి అరుదైన గౌరవం.. ఓ వీధికి

అమెరికాలో స్థిరపడిన తెలుగు వైద్యుడు బావికాటి జయరాం నాయుడుకు అరుదైన గౌరవం లభించింది. వైద్య వృత్తిలో ఆయన చేసిన విశేష సేవలను గుర్తించిన అక్కడి ప్రభుత్వం ఓ వీధికి ఆయన పేరు పెడుతూ నిర్ణయం తీసుకుంది. ఆంధ్రప్రదేశ్‌ రాష్ట్రంలోని అనంతపురం జిల్లా విడపనకల్లు మండలం పెద్దకొట్టాలపల్లికి చెందిన జయరాం ప్రస్తుతం టెక్సాస్‌లో ఉంటున్నారు. 1968లో అమెరికాకు వెళ్లిన ఆయన గుండె వైద్యనిపుణుడిగా ఖ్యాతి గడించారు. గుండె సంబంధిత రోగుల కోసం 300 పడకల ఆసుపత్రి నిర్మించారు. ఆయన సేవలను గుర్తించిన అక్కడి ప్రభుత్వం టెక్సాస్‌ మెడికల్‌ బోర్డు సభ్యుడిగాను నియమించింది. తల్లిదండ్రుల పేరు మీద బావికాటి రంగప్ప, లక్ష్మమ్మ మెమోరియల్‌ ట్రస్టు ఏర్పాటు చేసి సొంత ఊరిలో వివిధ సేవా కార్యక్రమాలు చేపడుతున్నారు. తమ ఊరికి చెందిన జయరాం నాయుడికి దక్కిన గౌరవంపై పెద్ద కొట్టాలపల్లి గ్రామస్థులు హర్షం వ్యక్తం చేస్తున్నారు.