గూగుల్ క్రోమ్ కొత్త ఫీచర్.. ఇకపై

గూగుల్‌ క్రోమ్‌ ఒక కొత్త ఫీచర్‌ తీసుకువచ్చింది. ఇకపై క్రోమ్‌ బ్రౌజర్‌ నుంచి సైట్లను సందర్శించే సమయంలో పాస్‌వర్డ్‌ ఇవ్వవలసిన అవసరం లేకపోవడమే ఈ కొత్త సదుపాయం. ఇందుకు వీలుగా గూగుల్‌ పాస్‌ కీస్‌ను ప్రవేశపెట్టింది. పాస్‌ కీ అన్నది ప్రతి యూజర్‌కు ప్రత్యేకమైన ఐడెంటిటీతో కూడుకుని ఉంటుంది. ఇవి వ్యక్తిగత కంప్యూటర్లు, ఫోన్లు లేదా యూఎస్‌బీ సెక్యూరిటీ డివైస్‌లలోనే స్టోర్‌ అవుతాయి. అంటే ఆన్‌లైన్‌లో ఎక్కడా స్టోర్‌ కావు. పాస్‌ కీస్‌ ఇలా స్టోర్‌ అవ్వడం వల్ల ఇక ఆ తరువాత నుంచి వివిధ వెబ్‌సైట్లు, యాప్‌లలో పాస్‌వర్డ్‌ అవసరం లేకుండా లాగిన్‌ అయిపోవచ్చు.  దీనితో ప్రతి పోర్టల్‌కు సంబంధించి యూజర్‌ పాస్‌వర్డ్‌లను గుర్తు పెట్టుకోవలసిన ఇబ్బంది తప్పిపోతుంది. పాస్‌వర్డ్‌ అన్నది ఒక వ్యక్తికి సంబంధించిన గుర్తింపును ధ్రువీకరించేందుకు, అనధికారికంగా డేటాను మరొకరు పొందకుండా అడ్డుకునేందుకు ఉపయోగపడుతుంది. పాస్‌వర్డ్‌ మరొకరికి తెలిస్తే? నష్టం ఏర్పడుతుంది. కానీ, పాస్‌ కీస్‌ మరొకరికి తెలిసే అవకాశం ఉండదు. సర్వర్‌ బ్రీచ్‌ అయినప్పటికీ, ఈ పాస్‌ కీస్‌ లీక్‌ కాపు,  పిషింగ్‌ దాడుల నుంచి యూజర్లకు రక్షణ ఉంటుందని గూగుల్‌ తన బ్లాగ్‌ పోస్ట్‌లో పెట్టింది.