1908 నాటి హార్లీ డేవిడ్ సన్ బైక్… వేలంలో రూ.7.72 కోట్లు

ఓల్డ్‌ ఈజ్‌ గోల్డ్‌ అని ఎందుకంటారో ఈ విషయం తెలిస్తే అర్థం అవుతుంది. 1908 నాటి స్ట్రాప్‌ ట్యాంక్‌ హార్లీ డేవిడ్‌సన్‌ బైక్‌కు వేలంలో అదిరిపోయే ధర పలికింది. గత నెలలో లాస్‌ వేగాస్‌లోని మెకమ్‌ ఆక్షన్‌ సంస్థ నిర్వహించిన వేలంలో సైకిల్‌ను పోలిన ఈ పాతకాలం నాటి బైక్‌కు 9,35,000 డాలర్లు. భారత కరెన్సీలో 7.72 కోట్ల  రూపాయల ధర పలికింది. ఈ బైక్‌ పేరు స్ట్రాప్‌ ట్యాంక్‌. దానికీ పేరు పెట్టడం వెనుక ఒక కారణం ఉంది. దాని ఆయిల్‌, ఇంధన ట్యాంకులు సైకిలు ఫ్రేమ్‌పైన అమర్చారు కనుకే దానికి ఆ పేరు పెట్టారు. ప్రపంచంలో అటువంటివి 12 మాత్రమే ఉన్నాయి. 1907 నాటి స్ట్రాప్‌ ట్యాంక్‌ అప్పట్లో 7,15,000 డాలర్లకు అమ్ముడుపోయింది. ఈ బైక్‌లో ఇప్పటికీ చాలా వరకు ఒరిజినల్‌ పార్ట్స్‌ ఉండడం గమనార్హం. ఆ బైక్‌ను తాము బాగా మార్కెట్‌ చేసినట్లు మెకమ్‌ వేలంలోని మోటర్‌ సైకిల్‌ డివిజన్‌ మేనేజర్‌ గ్రెస్‌ ఆర్నాల్డ్‌ పేర్కొన్నారు.