Etela Rajendar: అన్ని విషయాలూ మామా అల్లుళ్లకే తెలుసు..! కాళేశ్వరం కమిషన్ ముందు ఈటల వెల్లడి..!?

కాళేశ్వరం ప్రాజెక్టు (Kaleswaram Project) అక్రమాలపై జరుగుతున్న జ్యుడీషియల్‌ కమిషన్‌ (Judicial Commission) విచారణకు భారతీయ జనతా పార్టీ (BJP) ఎంపీ, మాజీ ఆర్థిక మంత్రి ఈటల రాజేందర్‌ (Etela Rajender) హాజరయ్యారు. బీఆర్ఎస్ ప్రభుత్వ హయాంలో ఆర్థిక మంత్రిగా పనిచేసిన నేపథ్యంలో ఈటలను కమిషన్‌ పిలిపించి పలు అంశాలపై ప్రశ్నించింది. కాళేశ్వరం ప్రాజెక్టుకు సంబంధించిన సమాచారం నాటి ముఖ్యమంత్రి కేసీఆర్‌ (KCR), నాటి నీటిపారుదల శాఖ మంత్రి హరీశ్‌ రావు (Harish Rao) వద్దే ఉందని ఈటల రాజేందర్ స్పష్టం చేశారు. ఈ ప్రాజెక్టులో ఆర్థిక శాఖ పాత్ర చాలా పరిమితమని, ఆ శాఖకు అన్ని వివరాలు తెలియవని ఆయన పేర్కొన్నారు.

కాళేశ్వరం ప్రాజెక్టు వ్యవహారంలో తనకు ఎలాంటి ప్రమేయం లేదని ఈటల రాజేందర్ నొక్కి చెప్పారు. ప్రాజెక్టు రీ-డిజైనింగ్‌ కోసం కేసీఆర్‌ నేతృత్వంలో క్యాబినెట్‌ సబ్‌-కమిటీ ఏర్పాటైందని, దీనికి హరీశ్‌ రావు ఛైర్మన్‌గా వ్యవహరించారని తెలిపారు. నీటి లభ్యతను దృష్టిలో ఉంచుకొని మేడిగడ్డ వద్ద ఆనకట్ట నిర్మాణం చేపట్టినట్లు ఆయన వివరించారు. ఆనకట్టల నిర్మాణం సాంకేతిక నిపుణులకు సంబంధించిన అంశమని, రాజకీయ నాయకులకు దీనిపై పూర్తి అవగాహన ఉండదని ఆయన అభిప్రాయపడ్డారు.

కాళేశ్వరం ప్రాజెక్టు మొదట రూ.63 వేల కోట్లతో ప్రతిపాదించగా, తర్వాత వివిధ కారణాల వల్ల ఖర్చు రూ.82 వేల కోట్లకు పెరిగినట్లు ఈటల తెలిపారు. కమిషన్‌ విచారణలో ఆర్థిక శాఖకు సంబంధించిన పలు అంశాలపై ప్రశ్నలు వచ్చాయని, ముఖ్యంగా కాళేశ్వరం కార్పొరేషన్‌ రుణాల్లో ఆర్థిక శాఖ పాత్ర గురించి అడిగినట్లు ఆయన చెప్పారు. అయితే, ఈ రుణాల విషయంలో ఆర్థిక శాఖకు ఎలాంటి ప్రమేయం లేదని, ఇది పూర్తిగా నీటిపారుదల శాఖ పరిధిలోని వ్యవహారమని ఈటల స్పష్టం చేశారు.

కాంగ్రెస్‌ ప్రభుత్వం అన్ని రిపోర్టులను ప్రజల ముందు ఉంచాలని ఈటల డిమాండ్‌ చేశారు. కాళేశ్వరం ప్రాజెక్టు అంశాన్ని రాజకీయ ప్రయోజనాల కోసం ఉపయోగించుకోవద్దని, ప్రాజెక్టు నష్టాలకు కారణమైన వారిపై కఠిన చర్యలు తీసుకోవాలని ఆయన సూచించారు. కేసీఆర్‌ ఈ ప్రాజెక్టును తన మానసపుత్రికగా వందల సార్లు పేర్కొన్నారని, తాను ఏ పార్టీలో, ఏ పదవిలో ఉన్నా నైతిక విలువలను పాటిస్తానని ఈటల అన్నారు.

కేబినెట్‌ నిర్ణయం మేరకే ఆనకట్టల నిర్మాణం జరిగిందని ఈటల కమిషన్ కు వివరించినట్లు సమాచారం. సాంకేతిక కమిటీ, క్యాబినెట్‌ సబ్‌-కమిటీ సిఫార్సుల ఆధారంగా క్యాబినెట్‌ నిర్ణయం తీసుకున్నట్లు చెప్పారు. సెంట్రల్‌ వాటర్‌ కమిషన్‌ (CWC), మహారాష్ట్ర ప్రభుత్వం లేవనెత్తిన అభ్యంతరాల దృష్ట్యా ప్రాజెక్టు స్థానాన్ని తమ్మిడిహట్టి (Tammidihatti) నుంచి మేడిగడ్డకు (Medigadda) మార్చినట్లు ఆయన పేర్కొన్నారు. నిధుల కొరత కారణంగా కాళేశ్వరం కార్పొరేషన్‌ ఏర్పాటు చేసినట్లు తెలిపారు. పారిశ్రామిక, తాగునీటి వినియోగదారుల నుంచి డబ్బు వసూలు చేయాలని డీపీఆర్‌లో ఉందని ఆయన తెలిపారు.

బ్యారేజీల నిర్మాణంలో ఆర్థిక క్రమశిక్షణ లోపించిందా అని కమిషన్ ప్రశ్నించినట్లు తెలుస్తోంది. అయితే నిర్మాణానికి సంబంధించిన అన్ని అంశాలు నీటిపారుదల శాఖ పరిధిలోనివేనని ఆయన సమాధానమిచ్చారు. కాళేశ్వరం ప్రాజెక్టు నిర్మాణంలో సాంకేతిక నిర్ణయాలు, రీ-డిజైనింగ్‌, బడ్జెట్‌ పెంపు వంటి విషయాలు ఆర్థిక శాఖ పరిధిలోకి రావని, అవన్నీ నీటిపారుదల శాఖ, సాంకేతిక నిపుణుల బాధ్యత అని ఈటల స్పష్టం చేశారు.

కాళేశ్వరం ప్రాజెక్టు వివాదంలో నిజాలు బయటకు రావాలని, బాధ్యులైన వారిపై చర్యలు తీసుకోవాలని ఈటల డిమాండ్‌ చేశారు. అదే సమయంలో.. ఈ అంశాన్ని రాజకీయంగా వాడుకోవద్దని కాంగ్రెస్‌ ప్రభుత్వాన్ని హెచ్చరించారు. తెలంగాణ ప్రజలు నిజానిజాలను విచారించి న్యాయం చేస్తారని ఆయన ఆశాభావం వ్యక్తం చేశారు.