BRS – BJP: బీఆర్ఎస్-బీజేపీ విలీనం చర్చలు.. బాంబ్ పేల్చిన సీఎం రమేశ్

భారత రాష్ట్ర సమితి (BRS)ను భారతీయ జనతా పార్టీ (BJP)లో విలీనం (merge) చేసేందుకు ప్రయత్నాలు జరిగాయన్న ఆరోపణలు తీవ్ర చర్చనీయాంశంగా మారాయి. బీఆర్ఎస్ ఎమ్మెల్సీ కల్వకుంట్ల కవిత (Kalvakuntla Kavitha) ఈ విషయాన్ని కొంతకాలం కిందట బయటపెట్టినప్పుడు, చాలా మంది దీన్ని కేవలం ఆమె తన సోదరుడు, బీఆర్ఎస్ వర్కింగ్ ప్రెసిడెంట్ కేటీఆర్ పై కోపంతో చేసిన వ్యాఖ్యలుగా భావించారు. అయితే, బీజేపీ ఎంపీ సీఎం రమేశ్ (CM Ramesh) ఇవాళ కవిత వాదనలను సమర్థిస్తూ, కేటీఆర్ (KTR) తనతో ఈ విలీన ప్రతిపాదనపై చర్చించినట్లు వెల్లడించడం రాజకీయ వర్గాల్లో సంచలనం రేపింది. ఈ వివాదం బీఆర్ఎస్‌ను ఇరకాటంలోకి నెట్టింది. అదే సమయంలో రాష్ట్ర రాజకీయ డైనమిక్స్‌ పై కొత్త చర్చలకు తెరలేపింది.

ఢిల్లీ లిక్కర్ స్కామ్ (Delhi Liquor Scam) కేసులో తాను జైలులో ఉన్న సమయంలో బీఆర్ఎస్‌ను బీజేపీలో విలీనం చేసేందుకు ప్రతిపాదనలు వచ్చాయని కొంతకాలం కిందట ఆ పార్టీ ఎమ్మెల్సీ, కేసీఆర్ కుమార్తె కవిత వెల్లడించారు. అయితే తాను దీన్ని తీవ్రంగా వ్యతిరేకించానని వెల్లడించారు. “నేను జైలులో ఉన్నప్పుడు బీఆర్ఎస్‌ను బీజేపీలో కలిపే ప్రతిపాదన వచ్చింది. నేను గట్టిగా నో చెప్పాను. బీఆర్ఎస్ తెలంగాణ ప్రజల ఆకాంక్షలను సమర్థించే ప్రాంతీయ పార్టీగా ఉండాలి” అని కవిత పేర్కొన్నారు. ఆమె తన తండ్రి, కేసీఆర్ ను తన ఏకైక నాయకుడిగా పేర్కొంటూ, కేటీఆర్‌ను పరోక్షంగా లక్ష్యంగా చేసుకుని విమర్శలు గుప్పించారు. పార్టీలోని కొందరు దయ్యాలున్నారని, తనను లక్ష్యంగా చేసుకుని, పార్టీని బలహీనపరిచేందుకు ప్రయత్నిస్తున్నారని ఆమె ఆరోపించారు.

కవిత లేఖ లీక్ వివాదం కూడా ఈ సందర్భంగా చర్చనీయాంశమైంది. కేసీఆర్‌కు ఆమె రాసిన ఆరు పేజీల లేఖ, పార్టీలోని సమస్యలను, ముఖ్యంగా బీజేపీపై మెతక ధోరణిని విమర్శిస్తూ లీక్ కావడం గుసగుసలకు కారణమైంది. “నేను రాసిన లేఖను ఎవరు లీక్ చేశారో తెలుసుకోవాలి. నా బృందం దీన్ని లీక్ చేయలేదు,” అని కవిత స్పష్టం చేశారు. ఈ లేఖ లీక్ వెనుక కేటీఆర్ అనుచరులు ఉన్నారన్న అనుమానాలు ఆమెలో రగిల్చాయి.

ఈ వివాదం తాత్కాలికంగా సద్దుమణిగినట్లు అనిపించినప్పటికీ, బీజేపీ ఎంపీ సీఎం రమేశ్ ఇవాళ చేసిన వ్యాఖ్యలు మళ్లీ రచ్చకు తెరలేపాయి. కేటీఆర్ తనపై చేసిన ఆరోపణలకు స్పందిస్తూ, సీఎం రమేశ్ సంచలన వ్యాఖ్యలు చేశారు. “నాలుగు నెలల క్రితం ఢిల్లీలో నా ఇంటికి వచ్చి కేటీఆర్ ఏం మాట్లాడారో గుర్తు లేదా? కవితను జైలు నుంచి విడిపిస్తే బీఆర్ఎస్‌ను బీజేపీలో విలీనం చేస్తానని చెప్పారు” అని రమేశ్ వెల్లడించారు. అయితే, బీజేపీ హైకమాండ్ ఈ ప్రతిపాదనను అంగీకరించలేదని, అందుకే విలీనం జరగలేదని ఆయన స్పష్టం చేశారు. సీఎం రమేశ్ మరో అడుగు ముందుకేసి, కేటీఆర్ తన ఇంటికి వచ్చిన సమయంలోని సీసీటీవీ విజువల్స్ అవసరమైతే బయటపెడతానని వ్యాఖ్యానించడం బీఆర్ఎస్‌కు మరింత ఇబ్బందికరంగా మారింది. ఈ వ్యాఖ్యలు కవిత ఆరోపణలకు బలం చేకూర్చాయి. అదే సమయంలో కేటీఆర్‌ను రక్షణాత్మక స్థితిలోకి నెట్టాయి. ఈ ఆరోపణలు నిజమైతే, బీఆర్ఎస్ లోపలి సమన్వయ లోపాలు, నాయకత్వ విభేదాలు మరింత స్పష్టమవుతాయి.

2023 అసెంబ్లీ ఎన్నికల్లో ఓటమి, 2024 లోక్‌సభ ఎన్నికల్లో ఒక్క సీటు కూడా గెలవకపోవడంతో బీఆర్ఎస్ ఇప్పటికే బలహీన స్థితిలో ఉంది. ఈ నేపథ్యంలో, విలీన చర్చల ఆరోపణలు పార్టీకి మరింత నష్టం కలిగించే అవకాశం ఉంది. కాంగ్రెస్ ప్రభుత్వం ఇప్పటికే బీఆర్ఎస్‌ను బలహీనపరచడానికి కొందరు ఎమ్మెల్యేలు, ఎమ్మెల్సీలను తమవైపు తిప్పుకుంది. ఈ సమయంలో విలీన చర్చలు బీఆర్ఎస్ ఓటు బ్యాంకును, ముఖ్యంగా ప్రాంతీయ గుర్తింపును దెబ్బతీసే అవకాశం ఉంది. మొత్తంగా, కవిత, సీఎం రమేశ్ వ్యాఖ్యలు బీఆర్ఎస్‌లోని అంతర్గత విభేదాలను, నాయకత్వ సంక్షోభాన్ని బహిర్గతం చేశాయి.