Chandra Babu: తెలుగువారు ఎక్కడ ఉన్నా ఒకటే..అంతర్జాతీయ తెలుగు మహాసభలలో చంద్రబాబు..

ఆంధ్రప్రదేశ్ ముఖ్యమంత్రి నారా చంద్రబాబు నాయుడు (Chandra Babu ) హైదరాబాద్‌లో జరిగిన అంతర్జాతీయ తెలుగు మహాసభల్లో (World Telugu Federation Conference) ముఖ్య అతిథిగా పాల్గొన్నారు.ఈ  ప్రసంగంలో ఆయన తెలుగువారి ఐక్యత, అభివృద్ధి, ప్రపంచవ్యాప్తంగా వారి ప్రతిభ గురించి మాట్లాడారు.  “తెలుగువారు ఎక్కడ ఉన్నా ఒకటే” అని చంద్రబాబు అన్నారు. అనంతపురం నుంచి ఆదిలాబాద్ దాకా, శ్రీకాకుళం నుంచి పాలమూరు వరకు తెలుగువారు ఐక్యంగా ఉండాలని ఆయన పిలుపునిచ్చారు. విదేశాలలో తెలుగు వాసులు అత్యంత ప్రతిభావంతులుగా నిలుస్తున్నారని, వారికి ప్రపంచ వ్యాప్తంగా గుర్తింపు లభిస్తోందని చెప్పారు.

చంద్రబాబు మాట్లాడుతూ, తన “విజన్ 2020” ద్వారా హైదరాబాద్‌ను ఐటీ హబ్‌గా మార్చిన అనుభవాన్ని గుర్తుచేశారు. భారత ప్రధాని నరేంద్ర మోదీ రూపొందించిన “విజన్ 2047” లక్ష్యాలను అనుసరిస్తూ, భారత్‌ను 2047 నాటికి నెంబర్ వన్ దేశంగా మార్చే దిశలో తెలుగు ప్రజలు కూడా పాత్ర పోషించాలని అన్నారు.  ఆర్టిఫిషియల్ ఇంటెలిజెన్స్ (AI), డీప్ టెక్నాలజీ వంటి అంశాలను తెలుగువారు ఆచరిస్తే ప్రపంచంలో వారు ముందుండగలరని చెప్పారు. ప్రతి ఇంట్లో ఒక పారిశ్రామికవేత్త ఉండాలని, ఐడియాలకు పెట్టుబడుల కంటే ఎక్కువ ప్రాముఖ్యత ఇవ్వాలని సూచించారు.

జనాభా తగ్గుదల సమస్యను దక్షిణ కొరియా, జపాన్, చైనా వంటి దేశాలు ఎదుర్కొంటున్నాయని, భారతదేశం కూడా ముందుగా చర్యలు తీసుకుంటే ప్రపంచానికి నాయకత్వం వహించగలదని అభిప్రాయపడ్డారు.  జీరో పావర్టీ లక్ష్యాన్ని సాధించడానికి ప్రతి వ్యక్తి పేదవారిని దత్తత తీసుకొని వారికి సహాయం చేయాలని చంద్రబాబు పిలుపునిచ్చారు. “సమాజానికి మనం బాగు చేయగలిగితే అది నిజమైన సేవ” అని అన్నారు.

తెలుగువారి ప్రతిభను ప్రస్తావిస్తూ, అమెరికాలో ఎక్కువ ఆదాయం సంపాదించే వలసవాసులలో తెలుగువారే ముందున్నారని చంద్రబాబు గర్వంగా చెప్పారు. “తెలుగువారి ఐక్యత ప్రపంచానికి దిశా నిర్దేశం చేస్తుంది” అని అన్నారు.  అంతర్జాతీయ తెలుగు మహాసభలు తెలుగువారి సాంస్కృతిక, సామాజిక ఐక్యతకు చిహ్నంగా నిలుస్తాయని, ప్రతి రెండేళ్లకు వీటిని జరుపుకుంటూ గొప్ప సంస్కృతిని అందరికీ చాటాలని అన్నారు.