Maganti Gopinath: జూబ్లీహిల్స్ ఎమ్మెల్యే మాగంటి గోపినాథ్ ఆరోగ్యం అత్యంత విషమం

జూబ్లీహిల్స్ నియోజకవర్గ ఎమ్మెల్యే (Jubilee Hills MLA) మాగంటి గోపినాథ్ (Maganti Gopinath) తీవ్ర అనారోగ్యంతో గచ్చిబౌలిలోని ఆసియన్ ఇన్స్టిట్యూట్ ఆఫ్ గ్యాస్ట్రోఎంటరాలజీ (AIG) ఆసుపత్రిలో చికిత్స పొందుతున్నారు. ఆయన వయస్సు 62 ఏళ్లు. మాగంటి గోపినాథ్ ఆరోగ్య పరిస్థితి విషమంగా ఉన్నట్లు వైద్య వర్గాలు తెలిపాయి. ప్రస్తుతం ఆయన ఇంటెన్సివ్ కేర్ యూనిట్ (ICU)లో వెంటిలేటర్ సహాయంతో చికిత్స పొందుతున్నారు. ఈ విషయం తెలిసిన వెంటనే బీఆర్ఎస్ నాయకులు, శ్రేయోభిలాషులు ఆసుపత్రికి చేరుకుని ఆయన ఆరోగ్యంపై ఆరా తీశారు.

గురువారం సాయంత్రం మాగంటి గోపినాథ్ అకస్మాత్తుగా తీవ్ర అస్వస్థతకు గురయ్యారు. ప్రాథమిక సమాచారం ప్రకారం, ఆయనకు గుండె సంబంధిత సమస్యలు (Heart Issues) తలెత్తినట్లు వైద్యులు గుర్తించారు. వెంటనే ఆయనను గచ్చిబౌలిలోని ఏఐజీ ఆసుపత్రికి తరలించారు. అక్కడ వైద్యులు ఆయనకు సీపీఆర్ (CPR) చేసి గుండె పనితీరును సాధారణ స్థితికి తీసుకొచ్చారు. అయితే అప్పటికే శరీరంలో కొన్ని అవయవాల పనితీరు దెబ్బతిన్నట్టు తెలిపారు. దీంతో ఆయన్ను వెంటిలేటర్ పై ఉంచి చికిత్స అందిస్తున్నారు. గోపినాథ్‌కు గుండె సంబంధిత సమస్యలతో పాటు ఇతర సమస్యలు కూడా ఉన్నాయని, దీంతో ఆయనను 48 గంటలపాటు వైద్యుల పర్యవేక్షణలో ఉంచారు.

మాగంటి గోపినాథ్ అనారోగ్యం గురించి తెలియగానే బీఆర్ఎస్ (BRS) నాయకులు ఆసుపత్రికి చేరుకున్నారు. మాజీ మంత్రి, సిద్ధిపేట ఎమ్మెల్యే హరీష్ రావు (Harish Rao) ఆసుపత్రికి వెళ్లి గోపినాథ్ ఆరోగ్య పరిస్థితిని విచారించారు. “మాగంటి గోపినాథ్ గారు ప్రస్తుతం ఐసీయూలో చికిత్స పొందుతున్నారు. వైద్యులు 48 గంటలపాటు ఆయనను నిశితంగా పరిశీలిస్తున్నారు. ఆయన త్వరగా కోలుకోవాలని ఆకాంక్షిస్తున్నాము” అని తెలిపారు. ఇతర బీఆర్ఎస్ నాయకులు కూడా గోపినాథ్ క్షేమంగా తిరిగి రావాలని ప్రార్థిస్తున్నట్లు సోషల్ మీడియా వేదికలపై తెలిపారు.

మాగంటి గోపినాథ్ జూబ్లీహిల్స్ నియోజకవర్గం నుంచి బీఆర్ఎస్ తరపున ఎమ్మెల్యేగా ఎన్నికయ్యారు. హైదరాబాద్‌ బీఆర్ఎస్ పార్టీ అధ్యక్షుడిగా కూడా ఆయన బాధ్యతలు నిర్వర్తిస్తున్నారు. టీడీపీ నుంచి రాజకీయ ప్రవేశం చేసిన ఆయన.. రాష్ట్ర విభజన అనంతరం బీఆర్ఎస్ లో చేరారు. ఆయన రాజకీయ ప్రస్థానం, ప్రజాసేవలో చురుకైన పాత్ర ఆయనను ప్రజల్లో ప్రముఖ నాయకుడిగా నిలిపింది. జూబ్లీహిల్స్ నియోజకవర్గంలో అభివృద్ధి, ప్రజల సమస్యల పరిష్కారంలో ఆయన చేసిన కృషి గుర్తించదగినది.

మాగంటి గోపినాథ్ అనారోగ్య వార్త వెలువడిన వెంటనే నియోజకవర్గ ప్రజలు, బీఆర్ఎస్ కార్యకర్తలు ఆందోళన వ్యక్తం చేశారు. ఆయన త్వరగా కోలుకోవాలని కోరుకుంటూ సోషల్ మీడియాలో పోస్టులు చేశారు. ఆయన ఆరోగ్యం కోసం ప్రార్థనలు చేస్తున్నట్లు అనేకమంది తమ సందేశాల్లో పేర్కొన్నారు.

గోపినాథ్ ఆరోగ్యం గురించి కొందరు తప్పుడు సమాచారాన్ని సోషల్ మీడియాలో ప్రచారం చేస్తున్నారని బీఆర్ఎస్ నాయకులు ఆవేదన వ్యక్తం చేశారు. దయచేసి తప్పుడు వార్తలు ప్రచారం చేయొద్దని విజ్ఞప్తి చేశారు. గోపినాథ్ ఏఐజీ ఆసుపత్రిలో చికిత్స పొందుతున్నారని.. ఆయన ఆరోగ్యంపై ఖచ్చితమైన సమాచారం కోసం కుటుంబసభ్యులు లేదా వైద్యులు చెప్పే వరకూ ఆగాలని కోరారు.