Telangana Parties: తెలంగాణ పార్టీలకు పెరుగుతున్న తలనొప్పులు

తెలంగాణ రాజకీయ పార్టీలు (Telangana Political Parties) ప్రస్తుతం అంతర్గత విభేదాలతో సతమతమవుతున్నాయి. అధికార కాంగ్రెస్, ప్రతిపక్ష భారత రాష్ట్ర సమితి (BRS), భారతీయ జనతా పార్టీ (BJP)లలో ఏర్పడిన అసంతృప్తులు, విమర్శలు, రాజీనామాలు ఈ పార్టీలకు సవాల్ గా మారాయి. ఈ అంతర్గత కలహాలను వీలైనంత త్వరగా పరిష్కరించుకోకపోతే మున్ముందు మరిన్ని ఇబ్బందులను కొనితెచ్చుకునే ప్రమాదం కనిపిస్తోంది. అందుకే ఆయా పార్టీలు వీటిపై సీరియస్ గా దృష్టి పెట్టినట్లు తెలుస్తోంది.

అధికార కాంగ్రెస్ పార్టీలో కోమటిరెడ్డి రాజగోపాల్ రెడ్డి (Komatireddy Rajagopal Reddy) ఈ మధ్య వ్యతిరేక స్వరం వినిపించారు. 2023లో కాంగ్రెస్ అధికారంలోకి వచ్చినప్పటికీ, రాజగోపాల్ రెడ్డికి కేబినెట్‌లో చోటు దక్కకపోవడం ఆయనలో అసంతృప్తిని రేకెత్తించింది. గతంలో కాంగ్రెస్‌ను వీడి బీజేపీలో చేరిన రాజగోపాల్, 2023లో తిరిగి కాంగ్రెస్‌లో చేరారు. అయితే ఆయన అంచనాలు నెరవేరలేదు. ఆయన తన అసంతృప్తిని అప్పుడప్పుడు పార్టీ నాయకత్వంపై, ముఖ్యమంత్రి రేవంత్ రెడ్డిపై విమర్శల రూపంలో వెల్లడిస్తున్నారు. తాజాగా పదేళ్లు తానే సీఎం అన్న రేవంత్ రెడ్డి (CM Revanth Reddy) కామెంట్స్ ను కోమటిరెడ్డి రాజగోపాల్ తప్పుబట్టారు. సీఎంను నిర్ణయించేది హైకమాండ్ అని, ఇలాంటి ఒంటెద్దు పోకడలు కాంగ్రెస్ పార్టీలో ఉండవని స్పష్టం చేశారు. ఇలాంటి అసంతృప్తులు రాజగోపాల్‌తో పాటు ఇతర నాయకుల్లో కూడా కనిపిస్తున్నాయి. ఇది కాంగ్రెస్ పార్టీకి ఒక పెద్ద సవాల్‌గా మారింది. స్థానిక సంస్థల ఎన్నికలు సమీపిస్తున్న తరుణంలో, ఈ అంతర్గత గందరగోళం పార్టీ ఐక్యతను బలహీనపరచవచ్చని విశ్లేషకులు అంచనా వేస్తున్నారు.

ప్రతిపక్ష బీఆర్ఎస్ పార్టీలో కూడా పరిస్థితి భిన్నంగా లేదు. పార్టీ అధినేత కేసీఆర్ కుటుంబంలోని విభేదాలు పార్టీకి పెద్ద తలనొప్పిగా మారాయి. ముఖ్యంగా కేటీఆర్ (KTR), కవిత (Kavitha) మధ్య విభేదాలు బీఆర్ఎస్‌ను బలహీనపరుస్తున్నాయి. కవిత కేటీఆర్ నాయకత్వ శైలిపై విమర్శలు చేయడం, పార్టీలో సమాంతర రాజకీయాలు నడపడం బీఆర్ఎస్ కార్యకర్తల్లో గందరగోళాన్ని సృష్టిస్తోంది. ఈ విభేదాలను నియంత్రించడం కేసీఆర్‌కు సవాల్‌గా మారింది. 2023 అసెంబ్లీ ఎన్నికల్లో ఓటమి తర్వాత, పార్టీలో నాయకుల మధ్య సమన్వయం లోపించడం, కొందరు నాయకులు ఇతర పార్టీల వైపు చూడటం బీఆర్ఎస్‌కు మరింత ఇబ్బందికరంగా మారింది. కేసీఆర్ ఈ సమస్యలను పరిష్కరించకపోతే, పార్టీ భవిష్యత్తు మరింత అనిశ్చితంగా మారే అవకాశం ఉంది.

బీజేపీలోనూ అంతర్గత విభేదాలు ఉద్ధృతంగా కనిపిస్తున్నాయి. గోషామహల్ ఎమ్మెల్యే రాజాసింగ్ (Raja Singh) పార్టీకి రాజీనామా చేయడం, దానిని బీజేపీ ఆమోదించడం ఆ పార్టీలో అసంతృప్తిని బహిర్గతం చేసింది. రాజాసింగ్ రాజీనామా వెనుక పార్టీ నాయకత్వంతో విభేదాలు, స్థానిక నాయకులతో సమన్వయ లోపం కారణం. అదే సమయంలో, ఎంపీ ఈటల రాజేందర్ (Etela Rajendar) కేంద్రమంత్రి బండి సంజయ్‌పై (Bandi Sanjay) ఆగ్రహం వ్యక్తం చేయడం బీజేపీలో మరో వివాదానికి తెరలేపింది. ఈటల, బండి సంజయ్ మధ్య విభేదాలు కొంతకాలంగా కొనసాగుతున్నాయి. అయితే ఇటీవల ఈ విభేదాలు మరింత బహిర్గతమయ్యాయి. ఈ వివాదాలను బీజేపీ రాష్ట్ర అధ్యక్షుడు రామచందర్ రావు తగ్గించే ప్రయత్నం చేసినప్పటికీ, పార్టీలో ఐకమత్యం లోపించడం స్పష్టంగా కనిపిస్తోంది.

తెలంగాణలోని ఈ మూడు ప్రధాన పార్టీలలోని అంతర్గత విభేదాలు రాజకీయ స్థిరత్వాన్ని దెబ్బతీస్తున్నాయి. కాంగ్రెస్‌లో అసంతృప్త నాయకులు పార్టీ ఐక్యతను బలహీనపరిస్తే, బీఆర్ఎస్‌లో కుటుంబ విభేదాలు పార్టీ సంస్థాగత నిర్మాణాన్ని దెబ్బతీస్తున్నాయి. బీజేపీలో రాజీనామాలు, విమర్శలు పార్టీ బలాన్ని తగ్గిస్తున్నాయి. స్థానిక సంస్థల ఎన్నికలు సమీపిస్తున్న తరుణంలో, ఈ విభేదాలు పార్టీల ఎన్నికల వ్యూహాలపై ప్రతికూల ప్రభావం చూపవచ్చు.