Reddy Leaders: తెలంగాణ మంత్రివర్గ విస్తరణ… రగిలిపోతున్న రెడ్డి నేతలు..!

తెలంగాణలో ముఖ్యమంత్రి రేవంత్ రెడ్డి (CM Revanth Reddy) నేతృత్వంలోని కాంగ్రెస్ ప్రభుత్వం (Congress Govt) దాదాపు ఒకటిన్నర సంవత్సరాల తర్వాత మంత్రివర్గ విస్తరణ చేపట్టింది. ఈ విస్తరణలో వెనుకబడిన వర్గాల (బీసీ, ఎస్సీ మాల, ఎస్సీ మాదిగ) నుంచి ముగ్గురు ఎమ్మెల్యేలకు కేబినెట్‌లో స్థానం కల్పించారు. సామాజిక సమతుల్యతను కాపాడేందుకు కాంగ్రెస్ అధిష్ఠానం తీసుకున్న ఈ నిర్ణయం రాష్ట్ర రాజకీయాల్లో కొత్త చర్చకు దారితీసింది. ఈ విస్తరణతో రెడ్డి సామాజిక వర్గానికి చెందిన పలువురు కీలక నేతలు తీవ్ర అసంతృప్తికి గురయ్యారు. మల్ రెడ్డి రంగారెడ్డి (Malreddy Ranga Reddy), కోమటిరెడ్డి రాజగోపాల్ రెడ్డి (Komatireddy Rajagopal Reddy), సుదర్శన్ రెడ్డి (Sudarshan Reddy) వంటి ఎమ్మెల్యేలు మంత్రి పదవులు ఆశించినప్పటికీ, వారికి అవకాశం దక్కకపోవడంతో రాజకీయ వర్గాల్లో ఉత్కంఠ నెలకొంది.

2023 డిసెంబర్ 7న రేవంత్ రెడ్డి ముఖ్యమంత్రిగా ప్రమాణ స్వీకారం చేసినప్పుడు 11 మంది మంత్రులతో కేబినెట్ ఏర్పాటైంది. ఆ సమయంలోనే రాష్ట్రంలో సామాజిక సమీకరణాలను దృష్టిలో ఉంచుకుని వివిధ వర్గాలకు ప్రాతినిధ్యం కల్పించారు. అయితే ఒకటిన్నర సంవత్సరాలు గడిచిన తర్వాత, పార్టీలోని ఇతర నేతల నుంచి మంత్రి పదవుల కోసం ఒత్తిడి పెరగడంతో విస్తరణ అనివార్యమైంది. ఈ నేపథ్యంలో ఆదివారం రాజ్ భవన్‌లో కొత్త మంత్రుల ప్రమాణ స్వీకారం జరిగింది. కొత్తగా మంత్రివర్గంలో చేరిన వారిలో ధర్మపురి ఎమ్మెల్యే అడ్లూరి లక్ష్మణ్ కుమార్, చెన్నూరు ఎమ్మెల్యే గడ్డం వివేక్, మక్తల్ ఎమ్మెల్యే వాకిటి శ్రీహరి ఉన్నారు. ఈ ముగ్గురూ వెనుకబడిన వర్గాల నుంచి వచ్చినవారే. కాంగ్రెస్ అధిష్ఠానం ఈ నిర్ణయంతో సామాజిక న్యాయం, బీసీ-ఎస్సీ వర్గాలకు ప్రాధాన్యత ఇవ్వాలనే సంకేతాలను పంపింది. ఈ విస్తరణతో కేబినెట్‌లో బీసీ, ఎస్సీ ప్రాతినిధ్యం మరింత బలపడింది.

అయితే ఈ విస్తరణలో రెడ్డి సామాజిక వర్గానికి చెందిన ఎమ్మెల్యేలకు అవకాశం దక్కకపోవడం చర్చనీయాంశంగా మారింది. ప్రస్తుత కేబినెట్‌లో ఇప్పటికే నలుగురు రెడ్డి సామాజిక వర్గానికి చెందిన మంత్రులు ఉన్నారు. ఈ నేపథ్యంలో మరిన్ని మంత్రి పదవులు రెడ్డి వర్గానికి కేటాయిస్తే సామాజిక సమతుల్యత దెబ్బతింటుందని కాంగ్రెస్ అధిష్ఠానం భావించినట్లు తెలుస్తోంది. దీంతో మంత్రి పదవులు ఆశించిన రెడ్డి నేతలు తీవ్ర అసంతృప్తికి గురయ్యారు. మల్ రెడ్డి రంగారెడ్డి, కోమటిరెడ్డి రాజగోపాల్ రెడ్డి, సుదర్శన్ రెడ్డి వంటి నేతలు తమకు అవకాశం దక్కకపోవడంపై తీవ్ర అసంతృప్తితో ఉన్నారు. తన అసంతృప్తిని వ్యక్తపరిచేందుకు మల్ రెడ్డి రంగారెడ్డి మీడియా సమావేశం కూడా ఏర్పాటు చేశారు. అయితే రాష్ట్ర కాంగ్రెస్ ఇన్ ఛార్జ్ మీనాక్షి నటరాజన్ జోక్యంతో ఆయన తన మీడియా సమావేశాన్ని వాయిదా వేసుకున్నారు. కోమటిరెడ్డి రాజగోపాల్ రెడ్డి, గతంలో బీజేపీ నుంచి కాంగ్రెస్‌లో చేరి విజయం సాధించారు. ఆ సమయంలో మంత్రి పదవి ఇస్తామని హైకమాండ్ హామీ ఇచ్చినట్లు చెప్పారు. అయితే ఇప్పటికే ఆయన సోదరుడు కోమటిరెడ్డి వెంకట్ రెడ్డి కేబినెట్ లో ఉన్నారు. దీంతో ఆయనకు అవకాశం లభించలేదు. దీంతో ఆయన కూడా అసంతృప్తితో ఉన్నారు.

ఈ అసంతృప్తిని చల్లార్చేందుకు తెలంగాణ ప్రదేశ్ కాంగ్రెస్ కమిటీ (TPCC) తీవ్ర ప్రయత్నాలు చేస్తోంది. రెడ్డి వర్గ నేతలకు ప్రభుత్వంలో ఇతర కీలక బాధ్యతలు, కార్పొరేషన్ చైర్మన్ పదవులు వంటివి ఇచ్చి సర్దుబాటు చేసే యోచనలో పార్టీ ఉన్నట్లు తెలుస్తోంది. అయితే, మంత్రి పదవుల కంటే తక్కువ హోదా ఉన్న ఈ బాధ్యతలను ఈ నేతలు ఒప్పుకుంటారా అనేది సందేహంగానే ఉంది. మరోవైపు, కాంగ్రెస్ అధిష్ఠానం రెడ్డి నేతలకు స్పష్టమైన సందేశం ఇచ్చినట్లు సమాచారం. “ప్రస్తుతం కేబినెట్‌లో రెడ్డి వర్గం నుంచి నలుగురు ఉన్నారు. మరింతమందిని చేర్చితే ఇతర వర్గాల నుంచి వ్యతిరేకత వస్తుంది” అని పీసీసీ నేతలు సర్దిచెప్పే ప్రయత్నం చేస్తున్నారు. ఈ నేపథ్యంలో రేవంత్ రెడ్డి కూడా అసంతృప్త నేతలతో వ్యక్తిగతంగా మాట్లాడి వారిని ఒప్పించే బాధ్యతను తీసుకున్నట్టు తెలుస్తోంది.