Yogandhra: విశాఖలో ‘యోగాంధ్ర 2025’ మెగా ఈవెంట్.. ఘనంగా ఏర్పాట్లు

అంతర్జాతీయ యోగా దినోత్సవం (International Yoga Day) కోసం విశాఖ (Vizag) సర్వాంగ సుందరంగా ముస్తాబైంది. ‘యోగాంధ్ర 2025’ (Yogandhra 2025) పేరిట శనివారం జరగనున్న ఈ కార్యక్రమం కోసం రాష్ట్ర ప్రభుత్వం భారీ ఏర్పాట్లు చేసింది. సాగర తీరంలో 5 లక్షల మందితో యోగాసనాలు వేసే ఈ కార్యక్రమం ద్వారా ప్రపంచ రికార్డు సృష్టించాలని రాష్ట్ర ప్రభుత్వం లక్ష్యంగా పెట్టుకుంది. ఈ మెగా ఈవెంట్‌కు ప్రధానమంత్రి నరేంద్ర మోదీ (PM Modi) ముఖ్య అతిథిగా హాజరుకానున్నారు. ఆయనతో పాటు ఆంధ్రప్రదేశ్ ముఖ్యమంత్రి చంద్రబాబు (CM Chandrababu), ఉప ముఖ్యమంత్రి పవన్ కల్యాణ్ (Dy CM Pawan Kalyan) కూడా యోగాసనాల్లో పాల్గొననున్నారు.

విశాఖ ఆర్కే బీచ్‌లోని కాళీమాత ఆలయం నుంచి విజయనగరం జిల్లా భోగాపురం వరకు సుమారు 34 కిలోమీటర్ల సాగర తీరాన్ని యోగా వేదికగా మలిచారు. ఈ భారీ కార్యక్రమం కోసం బీచ్ రోడ్డులో 326 కంపార్ట్‌మెంట్లను ఏర్పాటు చేశారు. ప్రతి 40 అడుగులకు ఒక చిన్న వేదికను నిర్మించి, పాల్గొనేవారి సౌకర్యం కోసం విస్తృత ఏర్పాట్లు చేశారు. శుక్రవారం నుంచే బీచ్ రోడ్డులో వాహన రాకపోకలను పూర్తిగా నిలిపివేశారు. పాల్గొనేవారందరికీ ముందస్తు రిజిస్ట్రేషన్ ద్వారా క్యూఆర్ కోడ్ ఆధారంగా ప్రవేశం కల్పిస్తారు. ఉచితంగా యోగా మ్యాట్‌లు, టీ-షర్టులు అందిస్తారు.

‘యోగాంధ్ర 2025’ కార్యక్రమం కోసం రూ.62 కోట్ల బడ్జెట్‌తో విస్తృత ఏర్పాట్లు చేసింది రాష్ట్ర ప్రభుత్వం. పాల్గొనేవారి సౌకర్యం కోసం 3వేల తాత్కాలిక మరుగుదొడ్లు, ప్రతి ఐదు కంపార్ట్‌మెంట్‌లకు ఒక వైద్య శిబిరం, ప్రధాన వేదిక వద్ద 10 పడకల తాత్కాలిక ఆసుపత్రి సిద్ధం చేశారు. ప్రజల తరలింపు కోసం 3,600 ఆర్టీసీ బస్సులు, 7,295 ప్రైవేటు బస్సులను ఏర్పాటు చేశారు. కార్యక్రమ పర్యవేక్షణ కోసం 26 మంది ప్రముఖ యోగా గురువులు, 1,500 మంది శిక్షకులు, 6,300 మంది వాలంటీర్లు సేవలందించనున్నారు.

ఒకవేళ శనివారం వర్షం కురిసినా కార్యక్రమానికి అంతరాయం లేకుండా ఆంధ్ర విశ్వవిద్యాలయం ఇంజినీరింగ్ కళాశాల మైదానంలో ప్రత్యామ్నాయ ఏర్పాట్లు చేశారు. ఈ మైదానంలో సుమారు 20,000 మంది గిరిజన విద్యార్థులతో ప్రత్యేక యోగా కార్యక్రమం నిర్వహించనున్నారు. ఇక్కడ కూడా 10 పడకల తాత్కాలిక ఆసుపత్రిని ఏర్పాటు చేశారు.

ప్రధాని మోదీ పర్యటన సందర్భంగా విశాఖలో భారీ భద్రతా ఏర్పాట్లు చేశారు. 10,000 మంది పోలీసులతో బందోబస్తు ఏర్పాటు చేశారు. బీచ్ రోడ్డు వెంబడి 2,000 సీసీ కెమెరాలు అమర్చారు. ప్రధాని కాన్వాయ్ కోసం ఐఎన్‌ఎస్ డేగ నుంచి కమాండ్ గెస్ట్ హౌస్ వరకు పోలీసులు ట్రయల్ రన్ నిర్వహించారు. తూర్పు నౌకాదళం కూడా ఈ కార్యక్రమంలో పాల్గొంటుంది. 11 యుద్ధ నౌకలపై యోగా సాధన జరగనుంది.

‘యోగాంధ్ర 2025’ ద్వారా గిన్నిస్ వరల్డ్ రికార్డు సృష్టించేందుకు సిద్ధంగా ఉన్నామని రాష్ట్ర మంత్రి నారాయణ తెలిపారు. యోగా ప్రాముఖ్యతను ప్రపంచానికి చాటడమే ఈ కార్యక్రమం లక్ష్యమని నిర్వాహకులు పేర్కొన్నారు. బీచ్ రోడ్డు పరిసర ప్రాంతాల్లో పారిశుధ్యం కోసం సిబ్బందిని సిద్ధంగా ఉంచినట్లు అధికారులు వెల్లడించారు. ఈ అపూర్వ యోగా ఉత్సవం ద్వారా విశాఖపట్నం ప్రపంచ దృష్టిని ఆకర్షించనుంది. ఆరోగ్యం, శాంతి, సమతుల్య జీవనానికి యోగా ఎలా దోహదపడుతుందో ప్రపంచానికి చాటిచెప్పేందుకు ఈ కార్యక్రమం ఒక మైలురాయిగా నిలవనుంది.