Sonam Wangchuk: లద్దాఖ్ రణరంగం..సోనమ్ వాంగ్ చుక్ అరెస్ట్..

రాష్ట్ర హోదా కోరుతూ లద్దాఖ్ ప్రజలు రోడ్డెక్కారు. వీరి ఆందోళనలు హింసాత్మకంగా మారడంతో… ఈ ఘటనలో నలుగురు మృతి చెందగా.. 90 మందికి గాయాలయ్యాయి. దీంతో అప్రమత్తమైన హోంశాఖ.. కారకుడిగా భావిస్తున్న పర్యావరణ వేత్త సోనమ్ వాంగ్ చుక్ ను అరెస్ట్ చేశారు. రెండు రోజుల క్రితం వాంగ్‌చుక్‌ ప్రకటనలతోనే లేహ్‌లో హింసాత్మక ఘటనలు జరిగాయని కేంద్రం ప్రకటన విడుదల చేసిన సంగతి తెలిసిందే.

లద్దాఖ్‌లో కొంతకాలంగా రాష్ట్ర హోదా కోసం జరుగుతున్న ఆందోళనలు హింసాత్మకంగా మారాయి.కేంద్ర ప్రభుత్వ ప్రత్యక్ష పాలనను అక్కడి ప్రజలు మూడేళ్లుగా నిరసిస్తున్నారు. తమ భూమి, సంస్కృతి, వనరుల పరిరక్షణ కోసం రాజ్యాంగ భద్రత ఉండాలని కోరుతున్నారు. ఇందులో భాగంగానే రాష్ట్ర హోదా కోసం పర్యావరణ ఉద్యమకారుడు సోనమ్‌ వాంగ్‌చుక్‌ (Sonam Wangchuk) రెండువారాలుగా నిరాహార దీక్ష చేస్తున్నారు. లద్దాఖ్‌ను ఆరో షెడ్యూల్‌ కింద చేర్చాలని ఆయన డిమాండ్ చేస్తున్నారు. ఈ విషయంలో కొద్ది రోజులుగా ఆందోళనకారుల (Statehood Protesters)కు, పోలీసులకు మధ్య జరిగిన ఘర్షణల్లో నలుగురు మృతి చెందారు. పలువురు గాయపడ్డారు. దీంతో ఈ పరిస్థితికి వాంగ్‌చుక్‌ రెచ్చగొట్టే వ్యాఖ్యలే కారణమని హోంమంత్రిత్వ శాఖ ఓ ప్రకటనలో పేర్కొంది.

24 గంటలు తిరగకముందే ఆయనకు చెందిన స్వచ్ఛంద సంస్థ ‘ది స్టూడెంట్స్‌ ఎడ్యుకేషనల్‌ అండ్‌ కల్చరల్‌ మూమెంట్‌ ఆఫ్‌ లద్దాఖ్‌’కు పై చర్యలు చేపట్టింది. ఎన్జీవో పనితీరులో తీవ్రమైన ఆర్థిక అక్రమాలు, విదేశీ నిధుల నియంత్రణ చట్టం నిబంధనలను ఉల్లంఘన వంటి కారణాలతో లైసెన్స్‌ను రద్దు చేసింది. కాగా హోంమంత్రిత్వ శాఖ లద్దాఖ్‌ ఆందోళనకు మూలకారణంగా తన పేరు ప్రస్తావించడాన్ని వాంగ్‌చుక్‌ (Sonam Wangchuk) తప్పుబట్టారు. అసలు సమస్యను పక్కనపెట్టిన తనను బలిపశువును చేశారని ఆరోపించారు. ఇది ఎంతమాత్రం తెలివైన నిర్ణయం కాదన్నారు.