Nara Lokesh: సంస్కరణలతో మెప్పించిన లోకేశ్..ఏపికి భారీ నిధులు కేటాయించిన కేంద్రం

ఆంధ్రప్రదేశ్ (Andhra Pradesh) రాజకీయాల్లో యువ నాయకుడిగా ఎదిగిన నారా లోకేశ్ (Nara Lokesh) ప్రస్తుతం రాష్ట్ర విద్యాశాఖ మంత్రిగా కొత్త ఉత్సాహాన్ని నింపుతున్నారు. టీడీపీ (TDP) జాతీయ ప్రధాన కార్యదర్శిగా ఇప్పటికే తన ప్రతిభను నిరూపించుకున్న ఆయన, ఇప్పుడు మంత్రిత్వ బాధ్యతల్లోనూ అదే దూకుడు చూపుతున్నారు. ముఖ్యంగా కేంద్ర ప్రభుత్వాన్ని (Central Government) మెప్పించడంలో లోకేశ్ చూపుతున్న చాతుర్యం రాష్ట్రానికి పెద్ద మేలు చేస్తోంది. సాధారణంగా మిగిలిన శాఖకు కేటాయించే నిధులకంటే కూడా అదనపు నిధులు సంపాదించగలగడం చాలా అరుదు. కానీ ఇటీవలే ఆయన ఢిల్లీలో (Delhi) పర్యటించిన సందర్భంలో ఏకంగా రూ.432.19 కోట్లను రాష్ట్రానికి రప్పించగలిగారు. ఈ మొత్తం మొత్తాన్ని విద్యాశాఖ కోసం పొందడం రాష్ట్రానికి ప్రత్యేకమైన విజయంగా భావిస్తున్నారు.

విద్యాశాఖకు సాధారణంగా పెద్దగా నిధులు కేటాయించకపోవడం సర్వసాధారణం. కేంద్రం అయినా, రాష్ట్రం అయినా ప్రతీ ఏడాది ఒక స్థిరమైన మొత్తం మాత్రమే విడుదల చేస్తాయి. ఆ మొత్తంతోనే స్కూళ్లను, కళాశాలలను నెట్టుకొస్తూ ఉంటారు. అయితే లోకేశ్ బాధ్యతలు చేపట్టిన తర్వాత పరిస్థితులు మారాయి. విద్యార్థులకు ఉత్తమ స్థాయి బోధన అందించాలన్న ఉద్దేశంతో పలు సంస్కరణలు తీసుకువచ్చారు. దేశవ్యాప్తంగా “లోకేశ్ మార్క్ మోడల్” విద్యా వ్యవస్థపై చర్చ జరుగుతున్నంత స్థాయిలో మార్పులు చోటు చేసుకున్నాయి.

కేంద్ర మానవ వనరుల అభివృద్ధి శాఖ మంత్రి (Union Education Minister)తో సమావేశమైనప్పుడు, రాష్ట్రంలో జరుగుతున్న విద్యా సంస్కరణలను లోకేశ్ వివరించారు. ప్రైమరీ నుంచి సీనియర్ సెకండరీ స్థాయి వరకు తీసుకొస్తున్న ఆధునిక పద్ధతులు, వాటి ప్రభావం గురించి ఆయన స్పష్టమైన ప్రెజెంటేషన్ ఇచ్చారు. ఈ సంస్కరణలు ముందుకు సాగాలంటే కేంద్రం సహకారం తప్పనిసరి అని ఆయన చెప్పడంతో, కేంద్ర మంత్రి ప్రత్యేక నిధులు కేటాయించేందుకు ముందుకు వచ్చారు.

ఈ ఆర్థిక సహాయం కింద రాష్ట్రంలోని పాఠశాలల్లో సైన్స్ ల్యాబ్స్ ఏర్పాటుకు ముందుగా కేటాయించిన మొత్తానికి అదనంగా రూ.167.46 కోట్లు ఇవ్వాలని కేంద్రం నిర్ణయించింది. అలాగే డైట్ కళాశాలలను (DIET Colleges) ‘సెంటర్స్ ఆఫ్ ఎక్సలెన్స్’గా మార్చే ప్రాజెక్టుకు ఇప్పటివరకు 50 శాతం నిధులే ఇస్తున్న కేంద్రం, లోకేశ్ చొరవతో ఇప్పుడు 96 శాతం వరకు నిధులు ఇవ్వడానికి అంగీకరించింది. దీని కింద రూ.43.23 కోట్లు విడుదల చేయనుంది. అదనంగా ఆదివాసీ విద్యార్థుల వసతి గృహాల కోసం రూ.11 కోట్లు కేటాయించారు.

ఈ పరిణామాలు లోకేశ్ కృషికి పెద్ద నిదర్శనంగా మారాయి. ఒకవైపు రాష్ట్ర విద్యార్థులకు మెరుగైన వసతులు కల్పించడమే కాకుండా, మరోవైపు కేంద్రం నుంచి ఆశించిన దానికంటే ఎక్కువ వనరులను రాబట్టడం ఆయన రాజకీయ నైపుణ్యాన్ని చాటుతోంది. విద్యార్థుల భవిష్యత్తు కోసం తీసుకున్న ఈ చర్యలు రాష్ట్ర విద్యా రంగానికి కొత్త దిశనిస్తాయని విశ్లేషకులు భావిస్తున్నారు.