Pawan Kalyan: జూన్ 4 ఉత్సవాలు ..పవన్ vs జగన్ ఆందోళనల మద్య ఏపీ రాజకీయాల్లో ఉత్కంఠ..

ఆంధ్రప్రదేశ్‌లో (Andhra Pradesh) కూటమి ప్రభుత్వం విజయం సాధించి పార్టీని ఏర్పాటు చేసి ఇప్పటికీ ఒక సంవత్సరం పూర్తి కావడంతో, ఇది పీడ విరగడైన రోజు అనే ఉత్సాహంలో శ్రేణులు సంబరాలకు సిద్ధమవుతున్నాయి. దీనిపై జనసేన (JanaSena) అధినేత పవన్ కళ్యాణ్ (Pawan Kalyan) తమ కార్యకర్తలకు ఉత్సవంగా జరుపుకోవాలని పిలుపునిచ్చారు. అయితే అదే రోజు, జూన్ 4న, వైఎస్సార్ కాంగ్రెస్ పార్టీ (YSRCP) అధ్యక్షుడు వైఎస్ జగన్ (YS Jagan) వెన్నుపోటు దినంగా గుర్తించి నిరసన కార్యక్రమాలు నిర్వహించాలని నిర్ణయించారు.

వైఎస్సార్సీపీ నేత జగన్ ఇటీవల జరిగిన ఎన్నికల తర్వాత అధికారానికి దూరమైన సంగతి తెలిసిందే. ఆయన ఆధ్వర్యంలో జరుగుతున్న ఈ నిరసన కార్యక్రమాలు కూటమి అధికార పార్టీలు ప్రజలకు ఇచ్చిన హామీలు ఇప్పటిదాకా అమలు చేయలేదన్న ఆరోపణలపై ఆధారపడినవి. అదే సమయంలో, కూటమి నేతలు ఈ ఆరోపణలను తోసిపుచ్చుతూ ప్రజల్లో సానుకూలత పెంచేలా కార్యకలాపాలు చేపడుతున్నారు. జనసేన నేత పవన్ కళ్యాణ్ పిలుపు మేరకు, జూన్ 4న ఉదయం రంగవల్లుల పోటీలు, మధ్యాహ్నం సంప్రదాయ కార్యక్రమాలు, సాయంత్రం దీపాల వెలుగుతో పాటు బాణసంచా పేల్చి దీపావళి (Diwali) వాతావరణంలో వేడుకలు జరుపుకోవాలని పార్టీ నేతలు కోరుతున్నారు. ఈ వేడుకల ఫొటోలు సోషల్ మీడియాలో షేర్ చేయాలని జనసేన కార్యకర్తలకు సూచనలూ ఇచ్చారు.

పిఠాపురం (Pithapuram) నియోజకవర్గంలో జరిగిన పార్టీ సమావేశంలో మంత్రి నాదెండ్ల మనోహర్ (Nadendla Manohar) మాట్లాడుతూ, గత ప్రభుత్వంలో స్థానిక సంస్థల ఎన్నికల్లో ఏకపక్ష నిర్ణయాలు తీసుకునేందుకు ఆ ప్రభుత్వం కుట్రలు పన్నిందని, అలాంటి పరిస్థితులకు జనసైనికులు, మహిళలు ధైర్యంగా ఎదురైన విషయాన్ని గుర్తు చేశారు. పవన్ కళ్యాణ్ నేతృత్వంలో వచ్చిన చైతన్యం వల్లే అలాంటి తప్పుడు ప్రయత్నాలు విఫలమయ్యాయని అన్నారు.

పవన్ రాజకీయాల్లో పదవుల కోసమే రాలేదని, ఎప్పుడూ ప్రజల సమస్యలే ప్రాధాన్యంగా చూసారని మంత్రి తెలిపారు. ప్రస్తుతం అధికారంలో ఉన్న కూటమి ప్రజలు పెట్టిన నమ్మకాన్ని నిలబెట్టుకోవడానికి మరింత కృషి చేయాలన్నారు. గత పాలకుల వల్ల రాష్ట్రం ఎదుర్కొన్న పరిస్థితులు చక్కదిద్దడానికి ఇప్పటి ప్రభుత్వం కనీసం పదిహేను సంవత్సరాల పాటు పనిచేయాల్సిన అవసరం ఉందని స్పష్టం చేశారు. కొంతమంది రాజకీయ నిరుద్యోగులు సోషల్ మీడియాలో దుష్ప్రచారానికి తెగబడుతున్నారని, అలాంటి వ్యవహారాలతో జాగ్రత్తగా వ్యవహరించాలని సూచించారు.