Pawan kalyan: ప్రజా సమస్యల పరిష్కారంలో దూకుడు చూపిస్తున్న పవన్ కళ్యాణ్..

ఆంధ్రప్రదేశ్ (Andhra Pradesh) ఉప ముఖ్యమంత్రి పవన్ కళ్యాణ్‌ (Pawan Kalyan) ప్రస్తుతం పూర్తిగా అధికార బాధ్యతల్లో నిమగ్నమై ఉన్నారు. పదేళ్ల పాటు ప్రతిపక్షంగా కొనసాగిన పవన్, గత పదిహేనునెలలుగా అధికారంలో ఉన్న తర్వాత తన పనితీరులో గణనీయమైన మార్పు చూపిస్తున్నారు. తొలి దశలో కొంత పరిపాలనా అనుభవం లేకపోవడం వల్ల తడబాటు ప్రదర్శించినప్పటికీ, ఇప్పుడు మాత్రం పూర్తి స్థాయి నిర్వాహకుడిగా మారిపోయారని రాజకీయ వర్గాలు విశ్లేషిస్తున్నాయి.

ప్రజల మధ్యకు వెళ్లినప్పుడు హామీలు ఇవ్వడం, ఆ తరువాత వాటిని మరచిపోవడం అనే అలవాటు పవన్‌లో కనిపించడం లేదు. ఆయన చెప్పినదే చేయాలన్న నిబద్ధతతో ముందుకు సాగుతున్నారని అధికార వర్గాలు చెబుతున్నాయి. ముఖ్యమంత్రి నారా చంద్రబాబు నాయుడు (N. Chandrababu Naidu) ఆధ్వర్యంలో పాలనపై లోతైన అవగాహన పెంపొందించుకున్న పవన్ కళ్యాణ్ ఇప్పుడు స్వయంగా పరిపాలనా నిర్ణయాలు తీసుకునే స్థాయికి చేరుకున్నారు.

తాజాగా కాకినాడ (Kakinada) జిల్లాలో సముద్ర కాలుష్యంపై క్షేత్రస్థాయి పర్యటన చేసిన పవన్, వెంటనే చర్యలు ప్రారంభించారు. మంగళగిరి (Mangalagiri) క్యాంప్ కార్యాలయంలో కాలుష్య నియంత్రణ మండలి (PCB) అధికారులతో సమావేశమై కాలుష్య నివారణకు కఠిన ప్రణాళిక సిద్ధం చేయాలని ఆదేశించారు. ఉప్పాడ (Uppada) మత్స్యకారుల సమస్యలను పరిష్కరించేందుకు రూపొందించే నమూనా రాష్ట్రంలోని ఇతర ప్రాంతాలకు కూడా ఆదర్శంగా ఉండాలని సూచించారు.

గతంలో కాకినాడలో రేషన్ బియ్యం నకిలీ వ్యవహారం బయటపడినప్పుడు సముద్ర తీరానికి వెళ్లి “సీజ్ ది షిప్” (Seize the Ship) అన్న ఆదేశాలు ఇచ్చి అందరినీ ఆశ్చర్యపరిచిన పవన్ కళ్యాణ్, ఆ ఘటన తర్వాత పరిపాలనాపరమైన అధికారాలు ఏ మేరకు ఉన్నాయో అర్థం చేసుకున్నారు. ఆ సమయంలో విపక్షం తీవ్రంగా విమర్శించినా, ఆ అనుభవం ఆయనను మరింత జాగ్రత్తగా మారేలా చేసిందని అంటున్నారు.

ఇప్పటి పవన్ కళ్యాణ్ నిర్ణయాలు, వ్యవహార శైలి చూసినప్పుడు పరిపక్వ నాయకుడిగా మారుతున్నారని పరిశీలకులు భావిస్తున్నారు. ఇటీవల మంత్రి వర్గ సమావేశంలో ‘లులు గ్రూప్’ (Lulu Group) అంశంపై తన అభిప్రాయాన్ని స్పష్టంగా వ్యక్తపరచిన పవన్, అదే సమయంలో ఉప్పాడ మత్స్యకారుల సమస్య పరిష్కారానికి 100 రోజుల ప్రణాళిక సిద్ధం చేయమని అధికారులకు ఆదేశించారు.

ఇక ముందు పవన్ కళ్యాణ్ సినిమాల వల్ల కొంతవరకు అందుబాటులో ఉండరని విమర్శలు వినిపించినా, ఇప్పుడు ఆయన సినిమా షూటింగులు పూర్తయిన తరువాత పూర్తి సమయం రాజకీయాలకే అంకితం చేస్తున్నారు. తన మాటలకంటే పనితో చూపించాలని భావిస్తున్న పవన్, ప్రస్తుతం ఎక్కువ సమయం అధికారిక కార్యక్రమాలకే కేటాయిస్తున్నారు. ఇలా గత కొన్ని నెలలుగా ఆయన ప్రవర్తన, నిర్ణయాలు, ప్రజలతో అనుసంధాన ..ఇలా అన్ని అంశాలు కలిసి పవన్ కళ్యాణ్ రాజకీయ జీవితంలో కొత్త దశను తెచ్చాయని చెబుతున్నారు. రాష్ట్ర రాజకీయాల్లో ఉప ముఖ్యమంత్రి పవన్ కళ్యాణ్ పనితీరు ఇప్పుడు ఆసక్తికర చర్చగా మారింది.