Amaravati: అమరావతిలో ఆర్బీఐతో పాటు 25 బ్యాంకుల నిర్మాణాలకు ముహూర్తం ఖరారు..

అమరావతి (Amaravati) రాజధానిలో నిర్మాణాల వేగం రోజురోజుకు పెరుగుతోంది. ప్రభుత్వం చేపట్టిన భవనాలతో పాటు, కేంద్ర సంస్థలు , ప్రైవేటు రంగ ప్రాజెక్టులు కూడా ముందుకు వస్తున్నాయి. ఈ నేపథ్యంలో ఎంతోకాలంగా ఎదురు చూస్తున్న జాతీయ, ప్రైవేట్ బ్యాంకుల కార్యాలయాల నిర్మాణానికి మళ్లీ ముహూర్తం ఖరారైంది. గత నెల నిర్వాహణకు సిద్ధమైన శంకుస్థాపన కార్యక్రమం మెంథా తుఫాన్ ప్రభావంతో వాయిదా పడింది. ఇప్పుడు పరిస్థితులు అనుకూలించడంతో ఈ నెల 28న కార్యక్రమం నిర్వహించేందుకు ఏర్పాట్లు జరుగుతున్నాయి.

ఈ కార్యక్రమానికి కేంద్ర ఆర్థిక మంత్రి నిర్మలా సీతారామన్ (Nirmala Sitharaman) హాజరవుతారు. ఆమె చేతుల మీదుగా ఆర్బీఐ (RBI) ప్రాంతీయ కార్యాలయంతో పాటు మరో 25 బ్యాంకుల నిర్మాణానికి శంకుస్థాపన చేయనున్నారు. అమరావతి పరిధిలోని నేలపాడు (Nelapadu) వద్ద ఆర్బీఐకి కేటాయించిన 3 ఎకరాల స్థలంలో ప్రాంతీయ కార్యాలయం నిర్మించేందుకు ప్రణాళికలు సిద్ధంగా ఉన్నాయి. గత నెలలో జరగాల్సిన ఈ కార్యక్రమం మరోసారి అదే తేదీకి రావడం విశేషంగా మారింది. ఈ సందర్భంగా సీఆర్డీఏ (CRDA) కార్యాలయం వద్ద భారీ బహిరంగ సభ కూడా ఏర్పాటు చేస్తున్నారు. ఈ సభకు ముఖ్యమంత్రి చంద్రబాబు (N. Chandrababu Naidu), ఉప ముఖ్యమంత్రి పవన్ కళ్యాణ్ (Pawan Kalyan) తో పాటు రాష్ట్రానికి చెందిన ముగ్గురు కేంద్ర మంత్రులు హాజరుకానున్నారు.

కూటమి ప్రభుత్వం వచ్చిన తర్వాత అమరావతి నిర్మాణాలు వేగవంతమయ్యాయి. ప్రధానమంత్రి నరేంద్ర మోదీ (Narendra Modi) పనులు పునఃప్రారంభించిన తర్వాత పాతకాలంగా నిలిచిపోయిన అనేక పనులు మళ్లీ సహజగతిలో కొనసాగాయి. సీఆర్డీఏ పరిపాలన భవనం ఇప్పటికే ప్రారంభమై ప్రజలకు సేవలు అందిస్తోంది. హోటళ్లు, విద్యాసంస్థలు, గ్రావిటీ కాల్వలు, ప్రధాన రహదారుల పనులు వేగంగా జరుగుతున్నాయి. జాతీయ బ్యాంకుల విషయానికి వస్తే, 2014–19 మధ్యలోనే 12 బ్యాంకులకు అమరావతిలోని ఉద్దండరాయునిపాలెం (Uddandarayunipalem)లో భూములు కేటాయించారు. అయితే 2019లో ప్రభుత్వం మారడంతో బ్యాంకులు నిర్మాణాల నుండి వెనక్కి తగ్గాయి. ఆ సమయంలో మూడు రాజధానుల ప్రతిపాదన రావడంతో భూములపై హక్కులు కూడా నిలిచిపోయాయి. ఇప్పుడు పరిస్థితులు మారడంతో బ్యాంకులు మళ్లీ ముందుకు వచ్చాయి.

శంకుస్థాపనకు సిద్ధమైన బ్యాంకులలో ఎస్బీఐ (SBI)కి 3 ఎకరాల స్థలం కేటాయించగా, 14 అంతస్తుల్లో రాష్ట్ర కార్యాలయాన్ని నిర్మించనున్నారు. కెనరా బ్యాంక్ (Canara Bank), యూనియన్ బ్యాంక్ (Union Bank), బ్యాంక్ ఆఫ్ బరోడా (Bank of Baroda), ఇండియన్ బ్యాంక్ (Indian Bank), ఏపీ స్టేట్ కో-ఆపరేటివ్ బ్యాంక్ (APCOB), పంజాబ్ నేషనల్ బ్యాంక్ (PNB), బ్యాంక్ ఆఫ్ ఇండియా (BOI), సెంట్రల్ బ్యాంక్ ఆఫ్ ఇండియా (CBI) కూడా అమరావతిలో తమ కార్యాలయాలను నిర్మించేందుకు సిద్ధంగా ఉన్నాయి. అన్ని బ్యాంకులు ఒకేచోట ఏర్పడటం వల్ల ప్రజలకు సౌకర్యాలు పెరుగుతాయని, అమరావతి ఆర్థిక కేంద్రంగా అభివృద్ధి చెందడానికి ఇది కీలకంగా నిలుస్తుందని అధికారులు భావిస్తున్నారు.