Nara Lokesh: అలాంటి ఎమ్మెల్యేలకు 3 నెలలే టైమ్.. లోకేశ్ వార్నింగ్..

ఏపీలో టీడీపీకి (TDP) చెందిన కొందరు ఎమ్మెల్యేల పనితీరు, వ్యవహార శైలిపై ప్రజల నుంచి ఫిర్యాదులు వస్తున్నాయని విద్య, ఐటీ శాఖల మంత్రి నారా లోకేశ్ (Nara Lokesh) సంచలన వ్యాఖ్యలు చేశారు. రెండు రోజుల పర్యటన నిమిత్తం ఢిల్లీకి వెళ్లిన ఆయన మీడియా ప్రతినిధులతో చిట్‌చాట్ సందర్భంగా ఈ విషయాన్ని వెల్లడించారు. ఎమ్మెల్యేల పనితీరుపై సమీక్ష జరుగుతోందని, అసమర్థంగా వ్యవహరిస్తున్న వారిని హెచ్చరిస్తున్నామని చెప్పారు. వారి పనితీరు, మాటతీరు, వ్యవహార శైలిని మార్చుకోవడానికి మూడు నెలల సమయం ఇస్తున్నామని స్పష్టం చేశారు.

ఇటీవలి కాలంలో రాష్ట్రంలోని వివిధ నియోజకవర్గాల నుంచి ప్రజలు తమ ఎమ్మెల్యేల పనితీరుపై అసంతృప్తి వ్యక్తం చేస్తూ ఫిర్యాదులు చేస్తున్నారు. కొందరు ఎమ్మెల్యేలు ప్రజల సమస్యలను పట్టించుకోవడం లేదని, వారి వ్యవహార శైలి సరిగా లేదని ఆరోపణలు వస్తున్నాయి. ఈ ఫిర్యాదులు కేవలం ప్రజల నుంచి మాత్రమే కాకుండా, టీడీపీ కేడర్ నుంచి కూడా వస్తున్నాయి. పార్టీ కార్యకర్తలు కూడా కొందరు ఎమ్మెల్యేల తీరుపై అసంతృప్తితో ఉన్నారు. కొంతమంది ప్రజాప్రతినిధులు సొంత పార్టీ నేతలు, కార్యకర్తలను పట్టించుకోకుండా వైసీపీ (YCP) వాళ్లకు పనులు చేసి పెడుతున్నారనే ఆరోపణలు కూడా ఉన్నాయి. ఈ నేపథ్యంలో లోకేశ్ చేసిన వ్యాఖ్యలు పార్టీలోని అంతర్గత సమస్యలను బహిర్గతం చేసాయి.

తనతో సహా పార్టీలోని ప్రతి ఒక్క ఎమ్మెల్యే పనితీరుపైనా రివ్యూ జరుగుతోందని లోకేశ్ వెల్లడించారు. కొందరు ఎమ్మెల్యేల పనితీరు, మాటతీరు, వ్యవహార శైలిపై మా వాళ్ల నుంచి కూడా ఫిర్యాదులు వస్తున్నాయన్నారు. వారిని పిలిచి మాట్లాడి, పనితీరు మార్చుకోవాలని హెచ్చరిస్తున్నామని, ఇందుకు మూడు నెలల సమయం ఇస్తున్నామని ఆయన స్పష్టం చేశారు. దీన్ని బట్టి పనితీరు మార్చుకోని ఎమ్మెల్యేలపై కఠిన చర్యలు తీసుకునేందుకు కూడా వెనకాడబోమని లోకేశ్ సంకేతాలిచ్చారు. ఒక్కో ఎమ్మెల్యేని పిలిచి వారి పనితీరుపై నివేదిక అందజేస్తామని లోకేశ్ తెలిపారు. దీని ద్వారా పార్టీలో క్రమశిక్షణను నెలకొల్పడంతో పాటు, ప్రజలకు మెరుగైన సేవలు అందించే దిశగా చర్యలు తీసుకోవాలని లోకేశ్ లక్ష్యంగా పెట్టుకున్నారు.

లోకేశ్ గతంలో చేపట్టిన యువగళం పాదయాత్ర ద్వారా రాష్ట్రవ్యాప్తంగా ప్రజల సమస్యలను దగ్గరగా తెలుసుకున్నారు. పార్టీ కార్యకర్తల సంక్షేమం, ప్రజల సమస్యల పరిష్కారం కోసం ఆయన కృషి చేస్తున్నారని పార్టీ నేతలు కొనియాడుతున్నారు. అందులో భాగంగానే, ఎమ్మెల్యేల పనితీరుపై నిఘా పెట్టడం, వారిని సమీక్షించడం వంటి చర్యలు చేపడుతున్నారు. ఈ సమీక్షల ద్వారా పార్టీలో బాధ్యతాయుతమైన నాయకత్వాన్ని ప్రోత్సహించాలని, ప్రజలకు మరింత దగ్గరవ్వాలని లోకేశ్ భావిస్తున్నారు. ఇటీవల టీడీపీ ఎమ్మెల్యేలపై విమర్శలు ఎక్కువైన నేపథ్యంలో లోకేశ్ ఈ వ్యాఖ్యలు చేయడం గమనార్హం. కొందరు ఎమ్మెల్యేలు ప్రజల సమస్యలను పట్టించుకోకుండా నిర్లక్ష్యంగా వ్యవహరిస్తున్నారని, వారి మాటతీరు ప్రజలను ఆకట్టుకోవడం లేదని ఆరోపణలు ఉన్నాయి. ఈ విమర్శలను నిజం చేస్తూ, లోకేశ్ స్వయంగా ఈ విషయాన్ని ఒప్పుకోవడం ద్వారా పార్టీలో సంస్కరణలకు శ్రీకారం చుట్టారు.

లోకేశ్ చేసిన ఈ వ్యాఖ్యలు ఎమ్మెల్యేలకు ముందస్తు హెచ్చరికగా చెప్పవచ్చు. పార్టీ బలోపేతం కోసం, ప్రజల విశ్వాసాన్ని చూరగొనడం కోసం ఎమ్మెల్యేలు తమ పనితీరును మెరుగుపరచుకోవాల్సిన అవసరాన్ని ఈ వ్యాఖ్యలు సూచిస్తున్నాయి. రాబోయే రోజుల్లో ఈ సమీక్షల ఫలితాలు, ఎమ్మెల్యేల పనితీరు ఎలా మారుతుందనేది ఆసక్తికరంగా మారనుంది.