Srikakulam: శ్రీకాకుళం విభజనపై వివాదం ..కొత్త జిల్లాల ప్రతిపాదనతో ప్రజల్లో వ్యతిరేకత..

ఆంధ్రప్రదేశ్‌ (Andhra Pradesh) రాజకీయాల్లో కొత్త జిల్లాల అంశం మరోసారి ప్రధాన చర్చగా మారింది. కూటమి ప్రభుత్వం అధికారంలోకి వచ్చిన తర్వాత ఈ విషయం మళ్లీ ప్రాధాన్యం సంతరించుకుంది. 2022లో వైఎస్ఆర్ కాంగ్రెస్ పార్టీ (YSRCP) ప్రభుత్వం 13 కొత్త జిల్లాలను ఏర్పాటు చేసిన విషయం తెలిసిందే. అప్పట్లో ఈ విభజన పార్లమెంట్‌ నియోజకవర్గాల ఆధారంగా జరిగింది. అయితే, ఆ నిర్ణయం శాస్త్రీయంగా లేదని, ప్రాంతీయ ప్రజల అభిప్రాయాలను పరిగణలోకి తీసుకోలేదని అప్పటి ప్రతిపక్ష పార్టీలు తీవ్రంగా విమర్శించాయి.

ప్రజల ఆమోదంతో కొత్త జిల్లాలను సవరించి మరలా రూపొందిస్తామని అప్పట్లో కూటమి నేతలు హామీ ఇచ్చారు. ప్రస్తుతం వారు అధికారంలోకి వచ్చిన నేపథ్యంలో ఆ దిశగా చర్యలు మొదలయ్యాయి. రాష్ట్ర ప్రభుత్వం జిల్లాల పునర్విభజనపై మంత్రివర్గ ఉప సంఘం (Cabinet Sub-Committee)ని ఏర్పాటు చేసింది. ఈ కమిటీకి వచ్చిన అభ్యర్ధనలు, సూచనలు, ఫిర్యాదులను పరిశీలించి సమగ్ర నివేదిక సిద్ధం చేసినట్లు సమాచారం. తాజాగా ఈ కమిటీ మరోసారి సమావేశమై తుది నివేదికను రూపొందించేందుకు చర్చలు జరుపుతున్నట్లు తెలుస్తోంది.

విశ్వసనీయ వర్గాల సమాచారం ప్రకారం, కొత్తగా ఆరు జిల్లాలను ఏర్పాటు చేసే అవకాశం ఉందని చెబుతున్నారు. వాటిలో ఒకటి ఉత్తరాంధ్ర (Uttarandhra) ప్రాంతంలోని శ్రీకాకుళం (Srikakulam) జిల్లా అని వార్తలు వినిపిస్తున్నాయి. ఈ కొత్త జిల్లాకు పలాస (Palasa) కేంద్రంగా ఏర్పాటుచేస్తారన్న ప్రచారం కూడా బలంగా సాగుతోంది. పలాస, టెక్కలి (Tekkali), ఇచ్చాపురం (Ichchapuram), పాతపట్నం (Pathapatnam) నియోజకవర్గాలను కలిపి ఒక కొత్త జిల్లా రూపుదిద్దుకుంటుందని అంటున్నారు. పలాసను జిల్లా కేంద్రంగా చేస్తే ఆ ప్రాంత అభివృద్ధి వేగంగా జరుగుతుందని అధికార వర్గాలు భావిస్తున్నాయి.

ఈ ప్రాంతంలోనే మూలపేట పోర్టు (Mulapeta Port) నిర్మాణం జరుగుతోంది. అలాగే కార్గో ఎయిర్‌పోర్టు (Cargo Airport) ప్రతిపాదన కూడా ముందుకు వెళ్తోంది. కేంద్ర పౌర విమానయాన మంత్రి కింజరాపు రామ్మోహన్ నాయుడు (Kinjarapu Ram Mohan Naidu) ఈ ప్రాజెక్ట్‌పై ప్రత్యేక ఆసక్తి చూపుతున్నారని చెబుతున్నారు. ఉద్ధానం కొబ్బరి తోటలు, జీడి పరిశ్రమలు వంటి వ్యాపార కార్యకలాపాలు ఈ ప్రాంతంలో అధికంగా ఉండటంతో, జిల్లా ఏర్పడితే స్థానికంగా ఉపాధి అవకాశాలు పెరుగుతాయని అభిప్రాయం వ్యక్తమవుతోంది.

అయితే, మరోవైపు శ్రీకాకుళం జిల్లా ప్రజలు దీనికి వ్యతిరేకంగా స్పందిస్తున్నారు. ఇప్పటికే 2022లోనే పెద్ద జిల్లా చిన్నదైపోయిందని, ఇప్పుడు కీలక అసెంబ్లీ నియోజకవర్గాలను విడగొడితే అభివృద్ధి దెబ్బతింటుందని వారు చెబుతున్నారు. శ్రీకాకుళం ఒకప్పుడు చరిత్ర కలిగిన ప్రధాన జిల్లా అని, ప్రస్తుతం ఎనిమిది నియోజకవర్గాలతోనే మిగిలిపోయిందని ప్రజల వాదన. పలాస జిల్లాగా మారితే శ్రీకాకుళం భవిష్యత్తు అభివృద్ధి మరింత మందగిస్తుందని ఆందోళన వ్యక్తం చేస్తున్నారు. ఈ నేపథ్యంలో ప్రభుత్వం ప్రజాభిప్రాయం తెలుసుకుని మాత్రమే తుది నిర్ణయం తీసుకుంటుందనే సంకేతాలు కనిపిస్తున్నాయి. అయినప్పటికీ, కొత్త జిల్లాల అంశం ఏపీలో మళ్లీ రాజకీయ వాతావరణాన్ని కుదిపేస్తోంది.