Nara Lokesh: పిల్లల భద్రతే లక్ష్యం… ఆస్ట్రేలియా మోడల్‌పై అధ్యయనం చేస్తున్న ఏపీ ప్రభుత్వం..

ఆంధ్రప్రదేశ్‌లో (Andhra Pradesh) సోషల్ మీడియా (Social media) వినియోగం రోజురోజుకు పెరుగుతున్న నేపథ్యంలో, దానికి సంబంధించిన దుష్పరిణామాలపై కూడా చర్చలు ఎక్కువవుతున్నాయి. ముఖ్యంగా అసభ్యకరమైన పోస్టులు, బాధ్యతలేని వ్యాఖ్యలు, తప్పుడు సమాచారంతో కూడిన కంటెంట్ కారణంగా పోలీసుల చర్యలు తరచుగా కనిపిస్తున్నాయి. ఈ పరిస్థితులపై ప్రభుత్వం సీరియస్‌గా స్పందిస్తూ, సోషల్ మీడియా వినియోగంపై కఠినమైన నిర్ణయాల దిశగా ఆలోచన చేస్తోంది. ఈ క్రమంలోనే 16 ఏళ్లలోపు పిల్లలకు సోషల్ మీడియాను పరిమితం చేసే అంశం ఇప్పుడు రాష్ట్రంలో హాట్ టాపిక్‌గా మారింది.

ఈ అంశంపై తాజాగా ఏపీ ఐటీ, మానవ వనరుల శాఖ మంత్రి నారా లోకేష్ (Nara Lokesh) కీలక వ్యాఖ్యలు చేశారు. వరల్డ్ ఎకనామిక్ ఫోరం (World Economic Forum) సమావేశాల కోసం స్విట్జర్లాండ్‌లోని దావోస్ (Davos) కు వెళ్లిన ఆయన, బ్లూమ్‌బర్గ్ న్యూస్ (Bloomberg News) కు ఇచ్చిన ఇంటర్వ్యూలో ఈ విషయాన్ని ప్రస్తావించారు. ఆస్ట్రేలియా (Australia) లో అమలులో ఉన్న అండర్-16 సోషల్ మీడియా నిషేధ చట్టాన్ని అధ్యయనం చేస్తున్నామని, అలాంటి విధానాన్ని రాష్ట్రంలో అమలు చేసే అవకాశాలపై పరిశీలన జరుగుతోందని ఆయన తెలిపారు. చిన్న వయస్సులో ఉన్న పిల్లలు సోషల్ మీడియాలో చూసే కంటెంట్‌ను సరైన రీతిలో అర్థం చేసుకునే స్థాయికి చేరుకోలేదన్న ఆందోళనతోనే ఈ ఆలోచన వచ్చిందని లోకేష్ పేర్కొన్నారు.

ఒక నిర్దిష్ట వయస్సుకు లోపు ఉన్న పిల్లలు ఆన్‌లైన్‌లో లభించే ప్రతికూలమైన, హానికరమైన సమాచారానికి సులభంగా గురవుతారని ప్రభుత్వం భావిస్తోంది. అశ్లీలత, హింస, ద్వేషపూరిత వ్యాఖ్యలు వంటి అంశాలు వారి మానసిక వికాసంపై తీవ్ర ప్రభావం చూపే ప్రమాదం ఉందని నిపుణులు కూడా హెచ్చరిస్తున్నారు. అందుకే ప్రపంచవ్యాప్తంగా అమలులో ఉన్న ఉత్తమ విధానాలను అధ్యయనం చేసి, చట్టపరంగా బలమైన వ్యవస్థను రూపొందించాల్సిన అవసరం ఉందని ఏపీ ప్రభుత్వం భావిస్తున్నట్లు తెలుస్తోంది.

ఈ అంశానికి న్యాయపరమైన మద్దతు కూడా లభించడం గమనార్హం. ఇప్పటికే మద్రాస్ హైకోర్టు (Madras High Court) ఈ విషయంపై స్పందించింది. ఆస్ట్రేలియా తరహాలో 16 ఏళ్లలోపు పిల్లలకు సోషల్ మీడియా నిషేధంపై ఆలోచించాలంటూ మదురై బెంచ్ (Madurai Bench) కేంద్ర ప్రభుత్వానికి సూచనలు చేసింది. ఎస్ విజయ్ కుమార్ (S. Vijay Kumar) అనే వ్యక్తి దాఖలు చేసిన ప్రజాప్రయోజన వ్యాజ్యంపై విచారణ సందర్భంగా ధర్మాసనం ఈ వ్యాఖ్యలు చేసింది. అప్పటి వరకు కేంద్ర, రాష్ట్ర ప్రభుత్వాలు , బాలల హక్కుల కమిషన్ ఈ అంశంపై అవగాహన కల్పించే బాధ్యత తీసుకోవాలని కూడా కోర్టు పేర్కొంది.

ఇప్పుడీ పరిణామాలన్నీ కలిసి, సోషల్ మీడియా వినియోగంపై నియంత్రణ అవసరమా? పిల్లల భద్రత కోసం కఠిన నిబంధనలు అవసరమా? అనే చర్చను రాష్ట్రవ్యాప్తంగా మరింత ఊపందించాయి. భవిష్యత్తులో ఏపీ ప్రభుత్వం ఈ దిశగా ఎలాంటి నిర్ణయం తీసుకుంటుందన్నది ఆసక్తిగా మారింది.