Banakacherla Project: బానకచర్ల ప్రాజెక్టు పై చర్చలకే ప్రాధాన్యత..వివాదం వద్దన్న చంద్రబాబు..

పోలవరం–బానకచర్ల లింక్ ప్రాజెక్టు పై ఇటీవల తెలుగు రాష్ట్రాల్లో రాజకీయ చర్చలు ఊపందుకున్నాయి. ఈ ప్రాజెక్టు వల్ల రెండు రాష్ట్రాల మధ్య వివాదం చెలరేగుతుందన్న భావన మొదట వ్యక్తమైందేమో కానీ, ఏపీ ముఖ్యమంత్రి నారా చంద్రబాబు నాయుడు (Nara Chandrababu Naidu) తీసుకుంటున్న నైతిక వైఖరితో అది మారిపోయింది. వాస్తవానికి బానకచర్ల ప్రాజెక్టు మిగులు గోదావరి (Godavari) జలాలను వినియోగించుకునే ప్రణాళికలో భాగంగా తీసుకొచ్చినది. ఏటా వేలాది టీఎంసీలు సముద్రంలోకి వృథాగా పోతున్న నేపథ్యంలో వాటిలో కొంత భాగాన్ని రాయలసీమకు మళ్లించి సాగునీటిని పెంచే ఉద్దేశంతో ఇది రూపుదిద్దుకుంది.

ఇక తెలంగాణ (Telangana) ముఖ్యమంత్రి రేవంత్ రెడ్డి (Revanth Reddy) ఇటీవల ఈ ప్రాజెక్టుపై చేసిన వ్యాఖ్యలతో రాజకీయ వాతావరణం కాస్త మారింది. ఆయన – ఏపీ ప్రాజెక్టులకు అనుమతులు ఇస్తూ, తెలంగాణ ప్రాజెక్టులకు నిరాకరించడం న్యాయమేనా? అని ప్రశ్నించడంతో, రెండు రాష్ట్రాల మధ్య విభేదాలు మళ్లీ చర్చనీయాంశమయ్యాయి. కానీ గురువారం చంద్రబాబు చేసిన వ్యాఖ్యలతో పరిస్థితి మారిపోయింది.

తెలుగు రాష్ట్రాల మధ్య నీటి విషయంలో విభేదాలు అవసరం లేదని ఆయన స్పష్టంగా తెలిపారు. మిగులు జలాలను వినియోగించాలన్న ఉద్దేశమే తాము లింక్ ప్రాజెక్ట్ చేపట్టడానికి కారణమని తెలిపారు. ఏటా సముద్రంలో కలుస్తున్న నీటిలో 200 టీఎంసీలను వినియోగించుకోవాలన్నదే ఈ ప్రాజెక్టు లక్ష్యమన్నారు. ఒకవేళ తెలంగాణకు ఈ ప్రాజెక్టుపై అభ్యంతరాలు ఉంటే, రెండు రాష్ట్రాలు కలిసి ఢిల్లీ (Delhi) లో కూర్చుని చర్చించడం ద్వారా పరిష్కారం సాధ్యమవుతుందన్న అభిప్రాయం వ్యక్తం చేశారు.

తెలంగాణలో అనుమతులు లేకుండానే ఎన్నో ప్రాజెక్టులు నిర్మితమైన నేపథ్యంలో, ఇప్పుడు ఏపీ తీసుకున్న ప్రాజెక్టులపై అభ్యంతరాలు చెప్పడం సరికాదన్న భావన కొందరిలో ఉంది. చంద్రబాబు కూడా అదే అభిప్రాయంతోనే, తమ పథకాలపై అనుమానాలు లేకుండా కేంద్రంతో పాటు తెలంగాణను కూడా నమ్మించేందుకు చర్యలు తీసుకుంటున్నారు. రాజకీయాల్లో అనుభవం కలిగిన నేతగా చంద్రబాబు, పొరుగు రాష్ట్రంతో విభేదాలు వద్దని చెప్పడం, సమస్యలు వచ్చినప్పుడు వాటిని చర్చల ద్వారా పరిష్కరించుకోవాలన్న తీరు, రెండు రాష్ట్రాల మధ్య సఖ్యతను పెంపొందించేలా ఉంది. దీంతో బానకచర్ల ప్రాజెక్టు పై ఉన్న సందేహాలు తొలగి, త్వరలోనే రెండు రాష్ట్రాల నుంచి దీనికి అనుమతులు లభించవచ్చని విశ్లేషకులు భావిస్తున్నారు.