Jagan: ఫ్లెక్సీలకు రక్తాభిషేకాల కేసులు.. నాలుగు జిల్లాల్లో అరెస్టులు, రాజకీయ దుమారం..

వైసీపీ అధినేత, మాజీ ముఖ్యమంత్రి వైఎస్ జగన్‌మోహన్ రెడ్డి (Y.S. Jagan Mohan Reddy) పుట్టిన రోజు వేడుకలు ఈసారి తెలుగు రాష్ట్రాలకే పరిమితం కాకుండా విదేశాల్లో కూడా నిర్వహించారు. పార్టీ శ్రేణులు, అభిమానులు కేకులు కట్ చేయడం, పండ్లు పంచడం, అన్నదానాలు, వస్త్రదానాలు, రక్తదాన శిబిరాలు నిర్వహించడం ద్వారా వేడుకలను జరుపుకున్నారు. అయితే ఈ కార్యక్రమాల మధ్య కొన్ని చోట్ల చోటుచేసుకున్న ఘటనలు తీవ్ర చర్చకు దారి తీశాయి. ముఖ్యంగా పొట్టేళ్ల బలులు, రక్తంతో ఫ్లెక్సీలకు అభిషేకాలు చేయడం వంటి చర్యలు వివాదాస్పదంగా మారాయి.

ఈ నెల 21న జగన్ పుట్టిన రోజు సందర్భంగా రాష్ట్రంలోని పలు ప్రాంతాల్లో ఇలాంటి ఘటనలు జరిగాయని ఆరోపణలు వచ్చాయి. పొట్టేళ్లను నరికి ఆ రక్తాన్ని జగన్ ఫోటోలు ఉన్న ఫ్లెక్సీలపై పోసిన వీడియోలు సోషల్ మీడియాలో వైరల్ కావడంతో పోలీసులు స్పందించారు. ఈ వ్యవహారంపై వివిధ ప్రాంతాల నుంచి ఫిర్యాదులు అందడంతో పోలీసులు కఠినంగా చర్యలు చేపట్టారు. మొత్తం నాలుగు జిల్లాల్లో కేసులు నమోదు చేసినట్లు సమాచారం. అనంతపురం జిల్లా (Anantapur District), శ్రీసత్యసాయి జిల్లా (Sri Sathya Sai District)ల్లో 6 కేసులు, చిత్తూరు జిల్లా (Chittoor District)లో మూడు, తూర్పుగోదావరి జిల్లా (East Godavari District)లో ఒక కేసు నమోదు అయ్యాయి.

ఈ కేసుల్లో వంద మందికి పైగా నిందితులు ఉన్నారని పోలీసులు చెబుతున్నారు. ఇప్పటికే 63 మందిని అదుపులోకి తీసుకుని కోర్టులో హాజరుపరిచారు. మరికొందరు పరారీలో ఉండగా, వారిని పట్టుకునేందుకు ప్రత్యేక బృందాలు గాలింపు చేపట్టాయి. కొంతమందికి నోటీసులు జారీ చేసి విచారణ కూడా నిర్వహించారు. శ్రీసత్యసాయి జిల్లా కనగానపల్లె మండలం (Kanaganapalle Mandal) భానుకోట గ్రామంలో (Bhanukota) ప్రభుత్వ పాఠశాల సమీపంలో పొట్టేలు తల నరికి రక్తాభిషేకం చేసిన ఘటనలో 13 మందిని పోలీసులు అరెస్టు చేశారు. వారిని కోర్టులో హాజరుపరచగా న్యాయమూర్తి రిమాండ్ విధించారు. ఇదే తరహాలో ధర్మవరం (Dharmavaram)లో జరిగిన ఘటనలో ఎనిమిది మందిని అదుపులోకి తీసుకున్నారు.

తూర్పుగోదావరి జిల్లా నల్లజర్ల మండలం (Nallajerla Mandal) తూర్పు చోడవరం (Chodavaram)లో జరిగిన ఘటన మరింత సంచలనం సృష్టించింది. నడిరోడ్డుపై పెద్ద కత్తితో పొట్టేలు తల నరికి రక్తంతో ఫ్లెక్సీకి అభిషేకం చేశారనే ఆరోపణలపై ఏడుగురిని పోలీసులు అరెస్టు చేశారు. వారిని నల్లజర్ల చెక్‌పోస్ట్ నుంచి ప్రభుత్వాసుపత్రి వరకు నడిపిస్తూ తీసుకెళ్లిన విధానంపై భిన్న అభిప్రాయాలు వ్యక్తమయ్యాయి.

ఇదిలా ఉండగా, ఈ కేసులో అరెస్టైన ఏడుగురు నిందితులకు తాడేపల్లిగూడెం కోర్టు (Tadepalligudem Court) బెయిల్ మంజూరు చేసినట్లు వైసీపీ సోషల్ మీడియా రాష్ట్ర కార్యదర్శి వాముశెట్టి పరమేశ్వరరావు (Vamusetti Parameswara Rao) వెల్లడించారు. నిందితుల వాదనలు విన్న అనంతరం కోర్టు బెయిల్ ఇచ్చిందని తెలిపారు. మొత్తంగా జగన్ పుట్టిన రోజు వేడుకలతో పాటు జరిగిన ఈ ఘటనలు రాజకీయంగా, సామాజికంగా పెద్ద చర్చకు దారి తీస్తూ రాష్ట్రంలో ఉద్రిక్తతను సృష్టిస్తున్నాయి.