Putin: సంధికొస్తారా..? సైనిక చర్య ప్రారంభించాలా..? ఉక్రెయిన్ కు రష్యా వార్నింగ్..!

ఉక్రెయిన్‌ కు రష్యా అధ్యక్షుడు పుతిన్ తీవ్ర హెచ్చరిక చేశారు. ఉక్రెయిన్ పాలకులకు శాంతి విధానంలో సమస్య పరిష్కరించుకోవడం ఇష్టం లేదన్నారు పుతిన్. ఒక వేళ దౌత్యం విఫలమైతే.. ప్రత్యేక సైనిక చర్య తప్పదని హెచ్చరించారు. తమ లక్ష్యాలన్నింటినీ బలప్రయోగం ద్వారా సాధిస్తామన్నారు పుతిన్. పుతిన్ ఈ హెచ్చరికలు చేస్తున్న సమయంలో.. రష్యా దళాలు ఉక్రెయిన్‌పై కనీవినీ ఎరుగని రీతిలో దాడులకు తెగబడ్డాయి. ఈ దాడుల్లో సుమారు 500 డ్రోన్లు, 40 క్షిపణులను రష్యా ప్రయోగించింది. ఈ భీకర దాడిలో ఒకరు మృతి చెందగా, 27 మంది గాయపడ్డారు. రష్యాకు యుద్ధం ఆపే ఉద్దేశం లేదనడానికి ఈ 10 గంటల విధ్వంసమే నిదర్శనమని ఉక్రెయిన్ అధ్యక్షుడు వ్లాదిమిర్ జెలెన్‌స్కీ ఆగ్రహం వ్యక్తం చేశారు.

దాదాపు నాలుగేళ్లుగా సాగుతున్న ఈ యుద్ధానికి ముగింపు పలికే మార్గాలను వెతకడానికి జెలెన్‌స్కీ నేడు అమెరికాలో డొనాల్డ్ ట్రంప్‌తో భేటీ కానున్నారు. ఫ్లోరిడాలో జరగనున్న ఈ సమావేశంలో భద్రతా హామీలు, వివాదాస్పద ప్రాంతాలపై చర్చించనున్నారు. ట్రంప్‌తో భేటీకి ముందు కెనడా చేరుకున్న జెలెన్‌స్కీ శాంతి స్థాపన కోసం తాము చేస్తున్న ప్రయత్నాలకు రష్యా అడ్డుతగులుతోందని ఆవేదన వ్యక్తం చేశారు.

ఉక్రెయిన్‌పై రష్యా జరుపుతున్న దాడులను కెనడా ప్రధాని మార్క్ కార్నీ తీవ్రంగా ఖండించారు. ఈ దాడులను ఆయన ‘అమానవీయమైనవి’గా అభివర్ణించారు. శాంతి స్థాపన జరగాలంటే రష్యా సహకారం అవసరమని ఆయన పేర్కొన్నారు. అదే సమయంలో ఉక్రెయిన్ పునర్నిర్మాణం కోసం కెనడా ప్రభుత్వం 2.5 బిలియన్ కెనడియన్ డాలర్ల (సుమారు 1.82 బిలియన్ యూఎస్ డాలర్లు) భారీ ఆర్థిక సాయాన్ని ప్రకటించింది.