Y.S.Sharmila: 2025లో కాంగ్రెస్ ఏపీ చీఫ్‌గా షర్మిల ప్రయాణం.. ఆశలు–అంచనాల మధ్య చర్చ..

ఆంధ్రప్రదేశ్‌ (Andhra Pradesh) రాజకీయాల్లో కాంగ్రెస్ పార్టీ (Indian National Congress)కు మళ్లీ ప్రాధాన్యం తీసుకురావాలనే లక్ష్యంతో పార్టీ పగ్గాలు చేపట్టిన వైఎస్ షర్మిల (Y. S. Sharmila) రాజకీయ ప్రయాణం 2025లో ఎలా సాగింది అనే విషయం పై విస్తృతంగా చర్చ జరుగుతోంది. మాజీ ముఖ్యమంత్రి వైఎస్ రాజశేఖర రెడ్డి (Y. S. Rajasekhara Reddy) తనయగా రాజకీయాల్లోకి వచ్చిన షర్మిల, పార్టీ చీఫ్‌గా బాధ్యతలు స్వీకరించిన తర్వాత ఆమె పనితీరు ఏ స్థాయిలో ఉందన్నది ఆసక్తిగా మారింది. కాలం గడుస్తున్న కొద్దీ నాయకులపై అంచనాలు పెరుగుతాయి. అదే విధంగా వారి రాజకీయ గ్రాఫ్ కూడా పైకి వెళ్లాలన్న ఆశ పార్టీ శ్రేణుల్లో ఉంటుంది.

ఈ ఏడాది పరిస్థితిని పరిశీలిస్తే, కాంగ్రెస్ ఏపీ చీఫ్‌గా షర్మిల రాజకీయంగా పుంజుకున్నారా? లేక ఒకే స్థాయిలోనే ఉన్నారా? అన్న ప్రశ్నలు వినిపిస్తున్నాయి. పార్టీ వర్గాల మాటల్లో చెప్పాలంటే, ఆమె రాజకీయ ప్రస్థానం ఇప్పటివరకు పెద్దగా ఊపు అందుకోలేదన్న అభిప్రాయం బలంగా ఉంది. అధిష్టానం (High Command)తో షర్మిలకు మంచి అనుబంధం ఉన్నప్పటికీ, రాష్ట్రస్థాయి నాయకులతో ఆమెకు కావాల్సినంత సమన్వయం లేదన్న విమర్శలు ఉన్నాయి.

పార్టీలోని సీనియర్ నేతలు, షర్మిల వ్యక్తిగత రాజకీయ శైలిపై అసంతృప్తిగా ఉన్నారనే చర్చ సాగుతోంది. ప్రజలతో, క్షేత్రస్థాయి నాయకులతో నేరుగా మమేకం కాకుండా రాజకీయాలు చేయడం వల్ల పార్టీకి దూరం పెరుగుతోందని వారు భావిస్తున్నారు. మరోవైపు, అధిష్టానం మద్దతు ఉండటంతో సీనియర్లను పక్కన పెట్టి యువ నాయకులకు ఎక్కువ ప్రాధాన్యం ఇస్తున్నారన్న ఆరోపణలు కూడా వినిపిస్తున్నాయి. దీని వల్ల పార్టీలో అంతర్గత అసంతృప్తి పెరుగుతోందన్న వాదన ఉంది.

ఏ రాజకీయ పార్టీ అయినా ప్రజల మద్దతే ప్రధాన బలం. ముఖ్యంగా మహిళా నాయకురాలిగా ఉన్న షర్మిల, మహిళా ఓటర్లు ఎక్కువగా ఉన్న రాష్ట్రంలో ఆ వర్గాన్ని ఆకట్టుకోవడంలో ఆశించిన స్థాయిలో విజయం సాధించలేకపోయారనే విమర్శలు ఉన్నాయి. 2024 ఫిబ్రవరిలో పార్టీ అధ్యక్ష బాధ్యతలు చేపట్టినప్పటికీ, మహిళల్లో ప్రత్యేకమైన రాజకీయ ముద్ర వేయలేకపోయారని సొంత పార్టీ నాయకులే బహిరంగంగా చర్చించుకుంటున్నారు.

ఇక మరో అంశంగా, షర్మిలకు ‘విజిటింగ్ లీడర్’ అన్న ముద్ర పడిందన్న అభిప్రాయం ఉంది. పార్టీ చీఫ్‌గా బాధ్యతలు తీసుకున్న తర్వాత విజయవాడలోనే (Vijayawada) ఉంటానని ఆమె ప్రకటించారు. ఆ క్రమంలోనే అక్కడ ఒక భవనాన్ని అద్దెకు తీసుకున్నట్టు సమాచారం. కానీ ఇప్పటివరకు ఆ ఇంట్లో పాలు పొంగించకపోవడం, ఎక్కువగా హైదరాబాద్‌ (Hyderabad)లోనే ఉంటూ అప్పుడప్పుడు విజయవాడకు వచ్చి మీడియా సమావేశాలు పెట్టి వెళ్లిపోవడం వంటి అంశాలు విమర్శలకు దారి తీస్తున్నాయి.

ఈ అన్ని అంశాలను కలిపి చూస్తే, 2025లో షర్మిల రాజకీయ ప్రయాణం పెద్దగా ముందుకు వెళ్లలేదన్న అభిప్రాయం కాంగ్రెస్ వర్గాల్లోనే వ్యక్తమవుతోంది. రాజకీయంగా పతనం కాకపోయినా, ఆశించిన స్థాయిలో పురోగతి లేకుండా ఒకే చోట నిలిచిపోయినట్టుగా ఆమె గ్రాఫ్ ఉందన్న మాట వినిపిస్తోంది. భవిష్యత్తులో క్షేత్రస్థాయిపై దృష్టి పెట్టి, పార్టీ శ్రేణులతో బలమైన అనుసంధానం పెంచుకుంటేనే కాంగ్రెస్‌లో ఆమె నాయకత్వానికి కొత్త ఊపు వచ్చే అవకాశముందని రాజకీయ విశ్లేషకులు భావిస్తున్నారు. మరి కొత్త సంవత్సరంలో షర్మిల కొత్త రాజకీయ శైలిని ప్రదర్శిస్తుందేమో చూడాలి..