AP Politics: పెచ్చుమీరుతున్న బూతుల సంస్కృతి

ఆంధ్రప్రదేశ్ రాజకీయాల్లో ప్రస్తుతం నెలకొన్న పరిస్థితులు, ముఖ్యంగా మాజీ మంత్రి అంబటి రాంబాబు వ్యాఖ్యలు, తదనంతర పరిణామాలు రాష్ట్రవ్యాప్తంగా చర్చనీయాంశమయ్యాయి. రాజకీయాల్లో విమర్శలు సహజం, కానీ ఆ విమర్శలు స్థాయి దాటినప్పుడు అవి పార్టీల మనుగడకే ప్రమాదకరంగా మారుతాయి.

ఆంధ్రప్రదేశ్ రాజకీయ క్షేత్రం ప్రస్తుతం విమర్శలు, ప్రతివిమర్శలతో కాక, వ్యక్తిగత దూషణలు, అభ్యంతరకర భాషతో కలుషితమవుతోంది. సాక్షాత్తూ ముఖ్యమంత్రి హోదాలో ఉన్న చంద్రబాబుపై అంబటి రాంబాబు చేసిన వ్యాఖ్యలు నాగరిక సమాజం తలదించుకునేలా ఉన్నాయి. ఒక సీనియర్ నేతగా, మాజీ మంత్రిగా బాధ్యతాయుతమైన పదవిలో పనిచేసిన వ్యక్తి, ఇలాంటి భాషను వాడటం కేవలం వ్యక్తిగతం కాదు, అది ఆ పార్టీ సంస్కృతినే ప్రతిబింబిస్తోంది.

రాజకీయ పార్టీలకు అధికారం ముఖ్యం కావచ్చు, కానీ నైతికత అంతకంటే ముఖ్యం. గతంలో ఐటీడీపీకి చెందిన ఒక కార్యకర్త వైఎస్ భారతిపై అనుచిత వ్యాఖ్యలు చేసినప్పుడు, టీడీపీ వెంటనే స్పందించింది. అతడిని పార్టీ నుండి సస్పెండ్ చేయడమే కాకుండా, చట్టపరమైన చర్యలకు సహకరించింది. ఇది ఒక పార్టీకి ఉండాల్సిన బాధ్యతాయుతమైన వైఖరి.

కానీ వైసీపీ విషయంలో పరిస్థితి భిన్నంగా ఉంది. అంబటి రాంబాబు వ్యాఖ్యలను ఖండించాల్సింది పోయి, పార్టీ శ్రేణులు ఆయన్ను సమర్థిస్తున్నాయి. దీనికి తోడు కులం కార్డును తెరపైకి తెచ్చి, అంబటిపై దాడిని కాపు సామాజికవర్గంపై దాడిలా చిత్రీకరించే ప్రయత్నం చేయడం రాజకీయ దిగజారుడుతనానికి పరాకాష్టగానే చూడాలి. తప్పు చేసినప్పుడు వ్యక్తిని తప్పు పట్టాలి తప్ప, దానికి కులాన్ని అంటగట్టడం ద్వారా రాజకీయ ప్రయోజనం పొందాలని చూడటం పార్టీకి దీర్ఘకాలంలో నష్టమే చేకూరుస్తుంది.

గతంలో వైసీపీ అధికారంలో ఉన్నప్పుడు టీడీపీ నేత పట్టాభి చేసిన వ్యాఖ్యలను సాకుగా చూపి, టీడీపీ కేంద్ర కార్యాలయంపై దాడులు చేశారు. నాడు ముఖ్యమంత్రిగా ఉన్న జగన్ మోహన్ రెడ్డి ఆ దాడులను సమర్థిస్తూ, “అధినేతను తిడితే కేడర్‌కు బీపీ రావడం సహజం” అని వ్యాఖ్యానించారు. ఇప్పుడు అదే సూత్రాన్ని టీడీపీ కేడర్‌కు వర్తింపజేస్తే వైసీపీ ఎందుకు గగ్గోలు పెడుతోంది? వైసీపీ కేడర్ దాడి చేస్తే అది ‘ఆవేశం’. టీడీపీ కేడర్ నిరసన వ్యక్తం చేస్తే అది ‘హత్యాయత్నమా?’. ఇలాంటి ద్వంద్వ ప్రమాణాలు ప్రజల్లో ఆ పార్టీ విశ్వసనీయతను దెబ్బతీస్తున్నాయి. రాజ్యాంగబద్ధమైన పదవిలో ఉన్న వ్యక్తిని దూషించినప్పుడు వచ్చే స్పందన కూడా అంతే తీవ్రంగా ఉంటుందని వైసీపీ గ్రహించలేకపోతోంది.

2024 ఎన్నికల్లో వైసీపీకి ప్రజలు కోలుకోలేని దెబ్బ తీశారు. 151 సీట్ల నుండి 11 సీట్లకు పడిపోవడానికి ప్రధాన కారణం ఆ పార్టీ నేతల అహంకారం, భాషా శైలేనని రాజకీయ విశ్లేషకులు భావించారు. అయితే, ఓటమి తర్వాత కూడా వైసీపీ తన ధోరణిని మార్చుకున్నట్లు కనిపించడం లేదు. నేటికీ ఎదురుదాడి, అసత్య ప్రచారాలు, వ్యక్తిగత దూషణలనే ఆయుధాలుగా వాడుతోంది.

రాజకీయ పార్టీ అంటే కేవలం ఎన్నికల్లో గెలవడం మాత్రమే కాదు, సమాజానికి ఒక దిశానిర్దేశం చేయడం. బూతులు మాట్లాడే నేతలను వెనకేసుకురావడం ద్వారా వైసీపీ తన కేడర్‌కు తప్పుడు సంకేతాలు పంపుతోంది. అంబటి రాంబాబు వంటి నేతలపై కఠిన చర్యలు తీసుకోకపోతే, ఆ పార్టీపై ఉన్న బూతుల పార్టీ అనే ముద్ర మరింత బలపడే అవకాశం ఉంది. ఇప్పటికైనా వైసీపీ ఆత్మపరిశీలన చేసుకుని, విమర్శలను అర్థవంతంగా చేయడం నేర్చుకోకపోతే ప్రజల నుండి మరింత దూరమయ్యే ప్రమాదం ఉంది.