Nara Lokesh: నారా లోకేష్ చొరవతో ఏపీలో మెగా ఇన్వెస్ట్మెంట్.. ఆర్.ఎం.జెడ్తో కీలక భాగస్వామ్యం
- Published By: Bhuvana
- January 21, 2026 / 11:21 AM IST
ఆంధ్రప్రదేశ్ (Andhra Pradesh) రాష్ట్రానికి భారీ పెట్టుబడులు ఆకర్షించడమే లక్ష్యంగా ముఖ్యమంత్రి చంద్రబాబు నాయుడు (N. Chandrababu Naidu), మంత్రులు నారా లోకేష్ (Nara Lokesh), టీజీ భరత్ (TG Bharat) స్విట్జర్లాండ్లోని దావోస్ (Davos) లో పర్యటిస్తున్నారు. ఈ పర్యటనలో భాగంగా రాష్ట్ర భవిష్యత్తును మార్చే స్థాయి కీలక పెట్టుబడి ప్రతిపాదనకు రూపు దిద్దుకుంది. ఏపీలో లక్ష కోట్ల రూపాయల మేర పెట్టుబడులతో దాదాపు లక్ష మందికి ఉపాధి కల్పించే ప్రాజెక్టుకు ముందడుగు పడటం రాజకీయ, పారిశ్రామిక వర్గాల్లో చర్చనీయాంశంగా మారింది.
దావోస్లో జరుగుతున్న వరల్డ్ ఎకనామిక్ ఫోరం (World Economic Forum – WEF) వార్షిక సమావేశం 2026 సందర్భంగా ఏపీ ప్రభుత్వం, ఆర్.ఎం.జెడ్ కార్పొరేషన్ (RMZ Corporation) మధ్య వ్యూహాత్మక పెట్టుబడి భాగస్వామ్యం ప్రకటించారు. ఈ ఒప్పందం రాష్ట్రంలో డిజిటల్ మౌలిక సదుపాయాలు, పారిశ్రామిక వృద్ధి, లాజిస్టిక్స్ అభివృద్ధికి బలమైన పునాది వేస్తుందని ప్రభుత్వం భావిస్తోంది. మంత్రి నారా లోకేష్ చొరవతో ఈ స్థాయి పెట్టుబడి ప్రతిపాదన ముందుకు రావడం విశేషంగా చెప్పుకుంటున్నారు.
ఈ భాగస్వామ్య ప్రకటన ఆర్.ఎం.జెడ్ గ్రూప్ చైర్మన్ మనోజ్ మెండా (Manoj Menda) సమక్షంలో జరిగింది. రాయలసీమ (Rayalaseema) ప్రాంతాన్ని పారిశ్రామిక, లాజిస్టిక్స్ కేంద్రంగా తీర్చిదిద్దడంతో పాటు, విశాఖపట్నం (Visakhapatnam) ను తదుపరి తరం డిజిటల్ హబ్గా అభివృద్ధి చేయాలన్న ప్రభుత్వ దార్శనికతకు ఈ ప్రాజెక్టులు అనుగుణంగా ఉన్నాయని అధికారులు చెబుతున్నారు. రాష్ట్రంలో సమతుల్య అభివృద్ధి లక్ష్యంగా ఈ పెట్టుబడులు కీలకంగా మారనున్నాయి.
ప్రతిపాదిత ప్రాజెక్టుల్లో భాగంగా విశాఖపట్నంలోని కాపులుప్పాడ (Kapuluppada) ఫేజ్-1 ఐటీ పార్క్లో సుమారు 50 ఎకరాల్లో 10 మిలియన్ చదరపు అడుగుల విస్తీర్ణంలో గ్లోబల్ కెపాబిలిటీ సెంటర్ (Global Capability Center – GCC) పార్క్ను ఏర్పాటు చేయాలని ఆర్.ఎం.జెడ్ గ్రూప్ యోచిస్తోంది. ఇది ఐటీ, డిజిటల్ సేవల రంగంలో వేలాది ఉద్యోగాలకు మార్గం వేస్తుందని అంచనా వేస్తున్నారు.
అదే విధంగా విశాఖ ప్రాంతంలో హైపర్ స్కేల్ డేటా సెంటర్ క్లస్టర్ ఏర్పాటు ప్రతిపాదన కూడా ఉంది. దశలవారీగా 1 గిగావాట్ సామర్థ్యాన్ని అభివృద్ధి చేయాలన్న లక్ష్యంతో ఈ ప్రాజెక్ట్ రూపొందుతోంది. దీనికోసం 500 నుంచి 700 ఎకరాల భూమి అవసరం అవుతుందని చెబుతున్నారు. ఈ డేటా సెంటర్లు రాష్ట్రాన్ని డిజిటల్ ఎకానమీకి కేంద్రంగా మార్చే అవకాశముందని నిపుణులు అభిప్రాయపడుతున్నారు.
రాయలసీమలోని టేకులోడు (Tadipatri–Tekulodu region) సమీపంలో సుమారు వెయ్యి ఎకరాల్లో భారీ పారిశ్రామిక, లాజిస్టిక్స్ పార్క్ను ఏర్పాటు చేయాలన్న ప్రతిపాదన కూడా ఉంది. ఈ పార్క్ తయారీ రంగం, గిడ్డంగులు, రవాణా కార్యకలాపాలకు కేంద్రంగా మారి స్థానిక యువతకు పెద్ద ఎత్తున ఉపాధి కల్పించనుంది. మొత్తం ప్రాజెక్టులు ఐదు నుంచి ఆరు సంవత్సరాల్లో దాదాపు 10 బిలియన్ డాలర్ల పెట్టుబడిని సూచిస్తున్నాయని, ఫలితంగా లక్ష మంది వరకు ఉద్యోగాలు సృష్టించే అవకాశం ఉందని అంచనా. దావోస్ వేదికగా ఏపీకి ఇది అతిపెద్ద గుడ్ న్యూస్గా పరిశీలకులు భావిస్తున్నారు.
