Narendra Modi: విశాఖలో వైభవంగా యోగా దినోత్సవం.. మోదీ షెడ్యూల్ ఇదే ..

ఆంధ్రప్రదేశ్ ప్రభుత్వం ఎంతో ప్రతిష్ఠాత్మకంగా అంతర్జాతీయ యోగా దినోత్సవం (International Yoga Day) ను జరపడానికి సిద్ధమవుతోంది. జూన్ 21, 2025న జరిగే ఈ యోగా ఉత్సవం విశాఖపట్నం (Visakhapatnam) నగరంలో అత్యంత వైభవంగా నిర్వహించనున్నారు. ఈ భారీ ఈవెంట్‌కు కేంద్ర ప్రభుత్వం కూడా సహకరిస్తుండటంతో జాతీయ స్థాయిలో ఇది ప్రాధాన్యం పొందింది. ప్రధాన మంత్రి నరేంద్ర మోదీ (Narendra Modi) స్వయంగా హాజరుకానుండటంతో ఈ వేడుకల వేగం మరింత పెరిగింది.

విశాఖలోని ఆర్కే బీచ్ (RK Beach) నుండి భీమిలి (Bheemili) వరకూ విస్తరించిన ఈ యోగా ప్రదర్శన కార్యక్రమం కోసం సుమారు 127 విభాగాలను ఏర్పాటు చేశారు. ప్రతి విభాగం 200×14 మీటర్ల పరిమాణంలో ఉండేలా, ఒక్కో విభాగంలో 1,000 మంది వరకు పాల్గొనగల సామర్థ్యంతో ప్రణాళికలు రూపొందించారు. ఈ ప్రదేశాల్లో వాలంటీర్లు, వైద్య సిబ్బంది, ఇన్‌చార్జ్‌లు, సౌండ్ సిస్టమ్‌లు, మైకులు, ఎల్ఈడీ స్క్రీన్లు వంటి అవసరమైన ఏర్పాట్లను పూర్తిచేశారు. ఈ కార్యక్రమానికి ప్రభుత్వ ఉద్యోగులు, పాఠశాల విద్యార్థులు, NCC, NSS వాలంటీర్లు, యోగా సంఘాలు, నౌకాదళం (Navy), కోస్టల్ గార్డు (Coastal Guard), పారిశ్రామిక ప్రతినిధులు, వ్యాపారవేత్తలు పెద్దఎత్తున పాల్గొననున్నారు. మొత్తం 5 లక్షల మందికి పైగా ఒకే స్థలంలో యోగా చేయనున్న ఈ విశిష్ట ప్రయత్నం ద్వారా అనేక రికార్డులను సెట్ చేయాలన్నదే ప్రభుత్వ లక్ష్యం.

ముఖ్యమంత్రి నారా చంద్రబాబు నాయుడు (Nara Chandrababu Naidu) వెల్లడించిన వివరాల ప్రకారం, ఈ కార్యక్రమం ద్వారా 22 రికార్డులను సృష్టించాలన్న లక్ష్యంతో ముందుకు వెళ్తున్నారు. ఇందులో 20 వరల్డ్ రికార్డ్స్, 2 గిన్నిస్ రికార్డ్స్ (Guinness Records) కూడా ఉండనున్నాయి. ప్రత్యేకంగా 25 వేల మంది గిరిజన విద్యార్థులతో 1.08 నిమిషాల్లో 108 సూర్య నమస్కారాలు చేయించనున్న కార్యక్రమం ప్రత్యేక ఆకర్షణ కానుంది.

ప్రధాని మోదీ శుక్రవారం సాయంత్రం భువనేశ్వర్ (Bhubaneswar) నుండి విశాఖ చేరుకుని, అక్కడి ఈస్ట్రన్ నేవల్ కమాండ్ (Eastern Naval Command) వద్ద బస చేయనున్నారు. శనివారం ఉదయం 6:25కి RK బీచ్‌కు చేరుకుని, యోగా కార్యక్రమంలో పాల్గొంటారు. అనంతరం 7:50కి తిరిగి బయలుదేరి, మధ్యాహ్నం 11:50కి ఢిల్లీ (Delhi) వెళ్లే విమానాన్ని ఎక్కనున్నారు. ఈ కార్యక్రమం ద్వారా రాష్ట్రానికి ప్రపంచవ్యాప్తంగా గుర్తింపు వచ్చే అవకాశముండటంతో, అందరి దృష్టి విశాఖపట్నం వైపే నెలకొంది.