Karnataka: కర్నాటక సీఎం పీఠంపై మళ్లీ చర్చ..!

కర్ణాటక కాంగ్రెస్ ప్రభుత్వంలో నాయకత్వ మార్పు అంశం మరోసారి తెరపైకి వచ్చింది. కొద్ది రోజులుగా స్తబ్దుగా ఉన్న ‘కుర్చీలాట’ వ్యవహారం, ముఖ్యమంత్రి సిద్ధరామయ్య చేసిన తాజా వ్యాఖ్యలతో మళ్లీ వేడెక్కింది. అధికారం చేపట్టిన నాటి నుంచి వినిపిస్తున్న రొటేషనల్ సీఎం ప్రచారానికి బలం చేకూర్చేలా… అటు సీఎం, ఇటు డిప్యూటీ సీఎం డీకే శివకుమార్ పరస్పర విరుద్ధమైన, ఆసక్తికరమైన వ్యాఖ్యలు చేయడం రాజకీయ వర్గాల్లో తీవ్ర చర్చకు దారితీసింది.

ముఖ్యమంత్రి సిద్ధరామయ్య తాజాగా మైసూరులో మీడియాతో మాట్లాడుతూ చేసిన వ్యాఖ్యలు ఎన్నో సందేహాలకు తావిస్తున్నాయి. “నేను పూర్తికాలం సీఎంగా కొనసాగుతానా? లేదా? అన్నది కాంగ్రెస్ హైకమాండ్ నిర్ణయంపై ఆధారపడి ఉంటుంది. అధిష్ఠానం మాటకు నేను కట్టుబడి ఉంటాను,” అని ఆయన పేర్కొన్నారు.

నిజానికి, గతంలో ఇదే ప్రశ్న ఎదురైనప్పుడు సిద్ధరామయ్య ఎంతో ఆత్మవిశ్వాసంతో సమాధానం ఇచ్చేవారు. “ఐదేళ్లు నేనే సీఎంగా ఉంటాను.. అందులో సందేహం లేదు” అని బల్లగుద్ది చెప్పిన సందర్భాలు కోకొల్లలు. కానీ, ఇప్పుడు ఆయన “అధిష్ఠానం దయాదాక్షిణ్యాల” మీద భారం వేయడం రాజకీయ విశ్లేషకులను ఆశ్చర్యానికి గురిచేస్తోంది. ముడా (MUDA) భూముల కుంభకోణం ఆరోపణలు, ప్రతిపక్షాల విమర్శల నేపథ్యంలో… సిద్ధరామయ్య రక్షణ కవచం కోసం హైకమాండ్ వైపు చూస్తున్నారా? లేక పదవి మార్పు ఒప్పందం నిజమేనని పరోక్షంగా అంగీకరిస్తున్నారా? అన్న ప్రశ్నలు తలెత్తుతున్నాయి.

మరోవైపు, ముఖ్యమంత్రి పీఠంపై ఎప్పటి నుంచో కన్నేసిన డిప్యూటీ సీఎం డీకే శివకుమార్ వ్యాఖ్యలు మాత్రం పూర్తి భిన్నంగా ఉన్నాయి. సిద్ధరామయ్య వ్యాఖ్యల పట్ల స్పందిస్తూ.. “ఆయన ఐదేళ్ల పాటు సీఎంగా కొనసాగాలని నేను మనస్ఫూర్తిగా కోరుకుంటున్నాను. ఆయనకు అంతా మంచే జరగాలి,” అని డీకే వ్యాఖ్యానించారు. అంతేకాకుండా, తమ మధ్య ఎలాంటి విభేదాలు లేవని, ఈ గందరగోళం అంతా మీడియా సృష్టేనని కొట్టిపారేశారు.

అయితే, డీకే శివకుమార్ వ్యాఖ్యలను రాజకీయ కోణంలో చూడాల్సి ఉంది. ఆయన బహిరంగంగా సీఎంకు మద్దతు ఇస్తున్నట్లు కనిపిస్తున్నప్పటికీ, ఇది ఒక వ్యూహాత్మక ఎత్తుగడగా విశ్లేషకులు భావిస్తున్నారు. ప్రభుత్వాన్ని, పార్టీని ఇబ్బందుల్లోకి నెట్టకుండా, హైకమాండ్ ముందు ‘విధేయుడైన నాయకుడి’గా మార్కులు కొట్టే ప్రయత్నంలో భాగంగానే డీకే ఈ సంయమనం పాటిస్తున్నారని సమాచారం. బహిరంగ విమర్శలకు దిగకుండా, సమయం వచ్చినప్పుడు అధిష్ఠానం ద్వారానే చక్రం తిప్పాలన్నది ఆయన వ్యూహంగా కనిపిస్తోంది.

సిద్ధరామయ్య వ్యాఖ్యల సారాంశం ఒక్కటే.. కర్ణాటకలో అధికారం ఎవరి చేతిలో ఉండాలనేది ఢిల్లీలోని కాంగ్రెస్ పెద్దల చేతిలో ఉంది. రెండున్నరేళ్ల తర్వాత డీకే శివకుమార్ కు పగ్గాలు అప్పగించాలనే అలిఖిత ఒప్పందం ఏదో జరిగిందని, దానికి కట్టుబడే సిద్ధరామయ్య ఇప్పుడు ‘హైకమాండ్ నిర్ణయం’ అనే పదాన్ని వాడుతున్నారని పార్టీలోని ఒక వర్గం గుసగుసలాడుతోంది.

ప్రస్తుత పరిణామాలు చూస్తుంటే, కర్ణాటక కాంగ్రెస్ లో అంతర్గత కుమ్ములాటలు సద్దుమణగలేదని స్పష్టమవుతోంది. సిద్ధరామయ్య తన సీటును కాపాడుకోవడానికి బీసీ కార్డును, అధిష్ఠానం మద్దతును ఆయుధాలుగా వాడుకుంటుంటే.. డీకే శివకుమార్ ఓర్పు అనే ఆయుధంతో వేచి చూస్తున్నారు.

మొత్తానికి, మీడియా సృష్టి అని నాయకులు పైకి చెబుతున్నా, నిప్పు లేనిదే పొగ రాదు అన్న చందంగా కర్ణాటక రాజకీయం మారుతోంది. సిద్ధరామయ్య పూర్తికాలం కొనసాగుతారా? లేక లోక్‌సభ ఎన్నికల ఫలితాలు, ముడా కేసు విచారణల ఆధారంగా నాయకత్వ మార్పు ఉంటుందా? అన్నది కాలమే నిర్ణయించాలి. కానీ, ప్రస్తుతానికి మాత్రం కర్ణాటక సీఎం సీటు అధిష్ఠానం చేతిలో చిక్కుకున్న పందెంలా మారింది.