Trump Govt: అమెరికాలో ఉద్యోగాలు మావాళ్లకే అంటున్న ట్రంప్ సర్కార్…!
- Published By: techteam
- November 13, 2025 / 01:44 PM IST
ట్రంప్ (Trump) సర్కార్ ముసుగు తొలగిపోయింది. మొన్నటివరకూ విదేశీ ఉద్యోగుల్లో ప్రతిభా వంతులు ఉండాలి.. మిగిలిన ఉద్యోగాలు మాకే అన్న ట్రంప్ యంత్రాంగం…ఇప్పుడు తమ అసలు రంగు బయట పెట్టింది. అందేంటంటే… హెచ్ 1 బీవీసా ఉద్యోగులు.. మీరు జాగ్రత్తగా వినండి.. మీరు ఇక్కడకు వచ్చారు. మా దగ్గర ఉద్యోగాలు చేస్తున్నారు. మా దగ్గర చాలా ప్రతిభావంతులు ఉన్నారు. వారికి ట్రైనింగ్ ఇవ్వండి.. వారు ఆ ఉద్యోగాలు చేస్తారు. మీరు మీ దేశాలకు వెళ్లిపోండి. చాలా చక్కగా అరటిపండు ఒలిచి చెప్పినట్లు చెప్పింది ట్రంప్, అతని అధికార యంత్రాంగం.
తాజాగా దీనిగురించి అగ్రరాజ్య ఆర్థికశాఖ మంత్రి స్కాట్ బెసెంట్ కీలక వ్యాఖ్యలు చేశారు. అమెరికన్లకు శిక్షణ ఇప్పించేందుకే హెచ్1బీ ఉద్యోగాలని అన్నారు. ‘‘అమెరికన్లకు శిక్షణ ఇవ్వండి.. తరువాత తిరిగి వెళ్లిపోండి.. ఉద్యోగాలను పూర్తిగా అమెరికన్లే తీసుకొంటారు’’ అనేదే వీసా విషయంలో ట్రంప్ కొత్త విధానం అని వెల్లడించారు.‘‘విదేశీ కార్మికులపై దీర్ఘకాలికంగా ఆధారపడకుండా.. అధిక నైపుణ్యం కలిగిన ఉద్యోగాలు పొందేలా అమెరికన్లకు శిక్షణ ఇవ్వాలి. అందుకోసం నైపుణ్యం కలిగిన విదేశీ కార్మికులను తాత్కాలికంగా అమెరికాకు తీసుకురావడమే ఈ కొత్త విధానం’’ అని బెసెంట్ అన్నారు (visa).
అమెరికాలో తయారీ రంగాన్ని పునరుద్ధరించేందుకు నాలెడ్జ్ ట్రాన్స్‌ఫర్‌ కోసం చేస్తోన్న ప్రయత్నమిదని బెసెంట్ అభివర్ణించారు. ‘‘రాత్రికి రాత్రే నౌకల్లో వస్తువులు ఎగుమతి అవుతాయని తాము చెప్పడం లేదన్నారు. ‘‘మేం సెమీకండక్టర్ పరిశ్రమను అమెరికాకు తీసుకురావాలని అనుకుంటున్నాం. ఆరిజోనాలో అందుకు తగ్గ సౌకర్యాలు ఉంటాయి. అందుకే అమెరికా కార్మికులకు శిక్షణ ఇవ్వడానికి కొన్నేళ్ల కోసం విదేశీ శ్రామికశక్తిని రప్పించడమే అధ్యక్షుడి ఉద్దేశం అని నేను భావిస్తున్నాను. తర్వాత వారు ఇంటికి వెళ్లొచ్చు. ఆ తరువాతే అమెరికా కార్మికులు బాధ్యత స్వీకరిస్తారు’’ అని పేర్కొన్నారు.
డొనాల్డ్ ట్రంప్ (Donald Trump) హెచ్-1బీ వీసా (H-1B Visa) సంస్కరణలపై స్వరం మార్చిన నేపథ్యంలో ఈ రకమైన స్పందనలు వచ్చాయి. తమ శ్రామిక శక్తిలో కీలక స్థానాలను భర్తీ చేయడానికి ప్రత్యేక నిపుణులైన విదేశీ ఉద్యోగులను నియమించుకోవడం అవసరమేనన్నారు. తమవద్ద అనుకున్న స్థాయిలో ప్రతిభావంతులు లేరని అంగీకరించారు. అయితే అమెరికాకు చెందిన ఉద్యోగులు బయట నుంచి వచ్చే వారి దగ్గర నైపుణ్యాలు నేర్చుకోవాలని సూచించారు. సరైన శిక్షణ లేకుండా తయారీ, రక్షణరంగాల్లోని ముఖ్యమైన స్థానాల్లో నిరుద్యోగ అమెరికన్లను నియమించుకోలేమన్నారు.
