New York: న్యూయార్క్‌లో అంగరంగ వైభవంగా బోనాల పండుగ

అమెరికా రాజధాని న్యూయార్క్‌ (New York)లో తెలంగాణ సంప్రదాయ బోనాల పండుగ అంగరంగ వైభవంగా జరిగింది. గ్రేటర్‌ న్యూయార్క్‌, న్యూజెర్సీ (New Jersey) చుట్టుపక్కల స్థిరపడిన వందలాది తెలుగు ప్రవాస  కుటుంబాలు ఒక్కచోట చేరి బోనాల జాతరను జరుపుకున్నారు. న్యూయార్క్‌ తెలంగాణ తెలుగు అసోసియేషన్‌ ( నైటా) ఆధ్వర్యంలో జరిగిన ఈ పండగ అమెరికాలో తెలంగాణ సంస్కృతీ, సంప్రదాయాలను చాటింది. న్యూయార్క్‌ లో స్థానిక ఐసన్‌ హోవర్‌ పార్కులో ఘనంగా బోనాల జాతర జరిగింది.  తెలంగాణ జానపద కళాకారులు జంగిరెడ్డి (Jangi Reddy), దండు పల్లి శ్రీనివాస్‌  ల ఆటపాటలు నైటా బోనాలకు మరింత ఉత్సాహాన్ని నింపాయి.  అలాగే అశోక్‌ చింతకుంట (Ashok Chintakunta) పోతురాజు వేషం వేయగా వీరితో పాటు ఆహుతులు అందరూ కలిసి ఆడిపాడారు. ఆటపాటలతో పాటు చిన్నారులకు వివిధ సాంస్కృతిక  కార్యక్రమాలను నిర్వహించి విజేతలకు బహుమతులు నైటా ఆధ్వర్యంలో అందించారు. న్యూయార్క్‌ మహా నగరంలో నివసిస్తూ తెలంగాణ సంస్కృతీ, సంప్రదాయాలను నిలుపుకుంటున్న తెలుగు కుటుంబాలకు నైటా అధ్యక్షురాలు వాణి ఏనుగు (Vani Enugu) శుభాకాంక్షలు తెలిపారు. కార్యక్రమ విజయవంతానికి కృషి చేసిన నైటా ఎగ్జిక్యూటివ్‌ కమిటీ సభ్యులతో పాటు ప్రముఖ ఎన్‌ఆర్‌ఐ పైళ్ల మల్లారెడ్డి, వివిధ ఈవెంట్లను స్పాన్సర్‌  చేసిన సంస్థలు, వ్యక్తులకు కృతజ్ఞతలు తెలిపారు.