NATS: నాట్స్‌ సంబరాలు ప్రారంభం… అగ్రహీరోల సందడి

ఫ్లోరిడా రాష్ట్రంలోని టాంపాబేలో ఉత్తర అమెరికా తెలుగు సొసైటీ(NATS) 8వ అమెరికా తెలుగు సంబరాలు జూలై 4వ తేదీ శుక్రవారం సాయంత్రం బ్యాంక్వెట్‌ విందుతో ఘనంగా ప్రారంభమయ్యాయి. భాషే రమ్యం సేవే గమ్యం నినాదంతో ప్రారంభమైన నాట్స్‌ నేడు అమెరికాలో తెలుగు సంఘాల సేవా కార్యక్రమాల్లోనే కాకుండా మహాసభల నిర్వహణలో సరికొత్త రికార్డు నెలకొల్పిందని, సభల కన్వీనర్‌ గుత్తికొండ శ్రీనివాస్‌ ప్రారంభోపన్యాసంలో పేర్కొన్నారు. వేడుకలు విజయవంతం చేయడంలో తనకు సహకరించిన వారందరికీ శ్రీనివాస్‌ ధన్యవాదాలు తెలియజేశారు. నర్తనశాల పేరుతో దిగువ భాగాన్ని, రంగస్థలం పేరుతో పైభాగాన్ని వేడుకల నిర్వహణ కోసం నామకరణం చేశారు. రంగస్థల వేదికపై బ్యాంక్వెట్‌ విందు నిర్వహించారు.

నాట్స్‌ చైర్మన్‌ పిన్నమనేని ప్రశాంత్‌ మాట్లాడుతూ టాంపా అనే ఊరు పేరును ఇకపై నది, అమెరికా సంస్కృతి అని కాకుండా.. నాట్స్‌ సంబరాలు జరిగిన నగరంగా గుర్తుంచుకుంటారని అన్నారు. కార్యక్రమానికి హాజరైన అతిథులకు ఆయన స్వాగతం పలికారు. ఈ వేడుకలకు ఫ్లోరిడా రాష్ట్ర సెనేటర్‌ జయ్‌ కాలిన్స్‌, అట్లాంటా కాన్సుల్‌ జనరల్‌ రమేష్‌ లక్ష్మణన్‌లు ముఖ్య అతిథులుగా హాజరయ్యారు. అమెరికాకు స్వాతంత్య్రం వచ్చిన జులై 4వ తేదీన ప్రవాస భారతీయ సంఘమైన నాట్స్‌ సంబరాల్లో పాల్గొనడం అమెరికాలో స్వేచ్ఛ, స్వాతంత్య్రానికి నిలువెత్తు నిదర్శనమని కొనియాడారు. డా. దేవయ్య, రుద్రమ్మ పగిడిపాటి దంపతులకు విశేష సేవా రత్న పురస్కారాన్ని అందజేశారు. రచయితలు కళ్యాణ్‌ చక్రవర్తిని అధ్యక్షుడు మందాడి శ్రీహరి, రామజోగయ్య శాస్త్రిని మాజీ అధ్యక్షుడు మంచికలపూడి శ్రీనివాస్‌లు సత్కరించారు. ఈ సందర్భంగా నిర్వహించిన బుల్లితెర నటీనటుల హాస్యవల్లరి అలరించింది.

సినీనటులు దగ్గుబాటి వెంకటేష్‌, నందమూరి బాలకృష్ణ, తారలు జయసుధ, రజిత, సుధీర్‌బాబు, దర్శకులు గోపీచంద్‌ మలినేని, మెహెర్‌ రమేష్‌, థమన్‌ తదితరులు పాల్గొన్నారు. వెంకటేష్‌ అతిథుల వద్దకు వెళ్లి వారితో ఫోటోలు దిగి మరీ సభా ప్రాంగణమంతా సందడి చేశారు.